Tumekeshany Kusanger kwa Pakampwil—Mu Kwikal Adimukina
1 Pa vurikinay kapamp ka kusambish kasankanay umwing wa Atuman a Yehova, mband umwing wadinga uyikisina atuman walonda anch: “Nivurikinap kamu chakin yom twambambina, pakwez yinivurikina udi mutapu wimekeshay udimukina kud am, ni mutapu wadingay mwin kwakan ni kwitudish. Niyova chakin piswimp kudiay ndiy mud muntu.” Yirumburil yiney yikasikeshidin usey wa kumekesh kusanger kwa pakampwil mudiau antu tufundishina.—Filp. 2:4.
2 Rukat Ridimukin: Mutapu umwing tukutwisha kumekesh rukat mulong wa akwetu udi kusutil ku kwikal adimukina. (1 Kor. 13:4) Muntu udimukina ukat kusot chakin musangar wa akwau, kusot kuyisadil yom ya ukwash. Mwawiy, mudimu wa kulejan udi chakin kamu chisal cha kudimuk. Pakwez kubangin kwetu kwa kashinsh mulong wa antu kukez kamekan chidiap kusu kwau mu kuyilej. Mutapu wetu wawonsu wa kushakam nau antu—urund wetu, kalimish ketu, mutapu tuteshina, yom tulondila ni mutapu tuyilondila, ap mutapu tuyitadila antu—yikez kamekesh anch tuyibangidin kamu chakin.—Mat. 8:2, 3.
3 Rukat ra kashinsh mulong wa antu rikutubachik kand kuyikwash mu mitapu yakin. Padingay ni kulejan ku chis ni chis, chibol umwing amwopata pakad kulab kud mwadia-mufu ipal chisu chijikay anch wadinga Kaman. Ndiy walonda anch wading pa chikandamin mwi mpish ukat kupakish kurijek dilayit chisu chabulangay chibol rupwambu ra ku chis. Chibol walonda anch: “Chiwapinap kusal yiney amwiney.” Mwadia-mufu wamuleja kwandam. Ndiy waswimpa dilayit ni kupwa waya kwend. Pezay mwan ikundj wa mband winou chisu chikemp kwinyim chakwel kumutal, ndiy wamulejamu yom yasadika. Ndiy washimoka nakash ni wasota kumuman mukadivar mulong wa kumujikitish. Chinech chashikija ku mambamb mawamp, mwan ikundj witiyija dilejan dia Bibil.
4 Kusutil ku kwikal adimukina, tumekeshin rukat ra Yehova mulong wa antu ni kuwapish uruu wa Want. Chawiy lel, chisu chawonsu ‘tusotany kwimekesh mudi in mudimu a Nzamb . . . kusutil ku kwikal adimukina.’—2 Kor. 6:4, 6.