Kangal Washa Rukat Rey Riwadinga Nich pa Kusambish
1 Yesu utumbila wayula chikumangen cha mu mivu chitot ya kusambish cha mu Efesus anch: “Chinikisila kudi ey chawiy ech, ey washil kal rukat rey riwading nich pa kusambish.” (Kubur. 2:4) Chimeken anch, antu avud ashadisha kal rukat rau ra kusambish mulong wa Yehova. Pitwasambisha kwilej uyakin, twakudisha rukat rikash mulong wa Nzamb ni mukwetu muntu, ni yiney yatubachika kulejan ruchingej retu risu nich mushiku. Yik yikeza kutukangesh kushadish rukat twadinga nich pa kusambish ni kushadish mushiku wetu mu mudimu wa kulejan?
2 Dilejan dia Muntu Ipend ni Kukumangan ku Yikumangan: Ov, chom ik chasala anch tumukata Nzamb nakash ni mukwetu muntu pitwadinga ni kwilej uyakin pa kusambish? Ov, yidiap yawonsu twileja piur pa Yehova kusutil ku dilejan dietu dia Bibil yatusala anch tukudisha rukat riner? (1 Yohan 4:16, 19) Chawiy lel, chakwel rukat retu “rujimba kamu kakwau ni kakwau,” tufanyidin kudandamen kwilej ronganyin rakin, kusand mu “yom ya Nzamb yikurikina.”—Filip. 1:9-11, MM; 1 Kor. 2:10.
3 Kulam chaku chiwamp cha dilejan dia Bibil kukutwish kukasikan mu machuku minam ma nsudiel mizwila too nich yakamish yivud ni yizuwol. (2 Tim. 3:1) Tufanyidin kwitekin chisu mu program wetu mulong wa kudia yakudia ya mu spiritu. Kukumangan pakad kujing kudi kwa usey, mulong twij anch “dichuku dikat kusej piswimp.”—Heb. 10:24, 25.
4 Mudimu wa Kulejan: Kusal mudimu wa kulejan nich mushiku kutukwashin kulam rukat retu ritwadinga nich pa kusambish mulong wa Nzamb. Pitukata kulejan rusangu ruwamp, tukat kwivurish ayinetu kushilamu kwa rukat kwa Yehova, ni chinech chitukwashin kulam ruchingej retu rikash ni rukat rikash. Chakwel kufundish uyakin wa Bibil tufanyidin kukimbijol chakwel kuutesh nawamp ayinetu, ni chinech chikukasikesh ritiy retu.—1 Tim. 4:15, 16.
5 Yehova ufanyidin kutambul yom yawonsu, kuwejaku ni rukat retu. (Kubur. 4:11) Kangal walik rukat rey rikepa. Lam rukat rey riwadinga nich pa kusambish rikash kusutil ku dilejan diey diakin dia Bibil, kukumangan pakad kujing, ni kulejan kudi antu akwau nich mushiku yom ukatina nakash mu muchim wey.—Rome 10:10.