“Lik Kulond Kwen Kwikala . . . Kutadila Mudi Mungu”
1. Ov, chirumburikin ik ‘kutek mungu ku mazu metu’?
1 “Lik kulond kwen kwikala ni ranaken machuku mawonsu, kutadila mudi mungu, chakwel wijikany mwa kwakwil nawamp kudi muntu ni mukwau.” (Kol. 4:6) Kutek mungu ku mazu metu kurumburikin kutond mazu mawamp ni kulond chakwel anch yirumburil yetu yiyisangaresha in kututesh. Chidi cha usey nakash kusal mwamu pitulejena.
2. Mutapu ik watwishay Yesu kupan uman kudi mband mwin Samaria?
2 Chilakej Cha Yesu: Padingay ni kupim piswimp ni dijiy, Yesu wasambisha kwisamb ni mband mwin Samaria weza kuvit mem. Yisu yivud padingau ni kwisamb, ndiy walangwisha manans mamekesha ukankuny wadingaku kudiosh pasak pakach pa Ayuda ni in Samaria. Walejana kand yitiyij yend anch in Samaria avadikina mu dijuku dia Yakob, ap anch Ayuda ading atongin mu mutapu ukash anch in Samaria avadikina kudi angez. Pa ndond pa kutadikijan nend, Yesu wasala anch minsamb yikala yisangareshina. Mudi chibudikin, ndiy watwisha kupan uman wa mukwasha ndiy ni antu a mu musumb.—Yoh. 4:7-15, 39.
3. Mutapu ik tukutwisha kulondul chilakej cha Yesu pitudia mu kulejan?
3 Pitulejena tufanyidin kulam mu manangu rutong retu— ra “[kulejan] rusangu ruwamp.” (Rom 10:15) Tusotin kwilej pamwing ni mwin chikumbu chitongijok chisangareshina ni chikasikeshina chidia mu Bibil, kitusotinap kumushikij ku kutong anch tukat kurishish yitiyij yend. Anch walet chitongijok chiyimp, chakul chetu chifanyidinap kumulej kapamp kamwing anch urumbukin. Ov, mu yilondinay mudi chom twitiyijina ap tukutwisha kusadil mudi mufulandal mulong wa kumujikitish? Pamwing ap tukutwish twatang verse umwing ni kulond anch: “Ov, watongin kal anch chitwishikin kwikal mwamu?”
4. Chom ik tufanyidina kusal anch mwin chikumbu ukat kusalan?
4 Chikwikal nchik anch mwin chikumbu ukat kusalan ap chimeken anch usotin kwend kutadikijan? Tufanyidin kudandamen kumekesh uwamp ni kwitudish mu yisal ni mu mazu. (2 Tim. 2:24, 25) Anch muntu kakatishinap uruu wa Want, chiwapidil kusadil manangu chakwel kumusha.—Mat. 7:6; 10:11-14.
5. Mutapu ik wamanay nambaz yibudikin yiwamp mu kwakul nich kalimish?
5 Yibudikin Yiwamp: Papakishay nambaz umwing kupan uman kudi mutej nend, mband umwing wabaroka nich ujim, ni kusambish kusalan. Nambaz wamuleja nich kalimish anch: “Nlikishinaku amboku anch wov kal kuyip mwamu. Shalany nawamp.” Kupwa kwa ambing aad, mband winou weza kukokal ku chis cha nambaz, wita dilikishin mulong wa mwikadil wend, ni wamekesha anch usotin kutesh yadingay nambaz ni kulond. Chakul cha kalimish chikat kulet yisu yivud yibudikin yiwamp!—Jinsw. 15:1; 25:15.
6. Mulong wak chidi cha usey kudi etu kusadil mazu makweta mungu mu kulejan?
6 Sal usu wa kusadil mazu matadila mudi mungu piulejena rusangu ruwamp. Ap anch mwin chikumbu kasotinap kutesh, ukutwish pamwing ap wasot dichuku dikwau kuyitesh Atuman a Yehova akweza kwol kwend.