Uman wa Ritiy Rikash!
1. Ov, yinship ik ya mar yatakelau kulejan kudi Yesu?
1 Apostol atesha nawamp pisambidinay Yesu piur pa kwez kwend ni kwisudiel kwa ditenchik dia yom. Yinship ya mar yela kuyishiken antu—njit, kabwakat, chipupu. Kupwa, Yesu walonda anch in kwilej end akez kuyikis, kuyipan ku mar, ni kuyijip. Kukez kalank aprofet a makasu, ni akuyipumbul antu avud. Rukat ra avud rikez kutalal zong.
2. Mulong wak chimeken patok anch rusangu ruwamp arilejen mwin ngand yawonsu?
2 Chinyim nich mwikadil winou, chafanyidina kumekan chom chishimokishina kudi apostol payilejau kudi Yesu anch rusangu ruwamp ra Want wa Nzamb akez kurilejan ku mangand mawonsu. (Mat. 24:3-14) Nlel unou tumen kuwanyin kukash kwa uprofet winou wamushena. Ap anch tudi mu chisu cha mar makash, Atuman a Yehova alejen nich mushiku rusangu ruwamp. Pakata kutalal zong rukat ra mangand, rukat retu rikwet chirungul ni rimeken patok. Ap anch atukisin kudi “michid yawonsu,” pakwez tulejen ku michid yawonsu.
3. Ov, uvud ik ukasikeshina umena pa rapor wa Mangand Mawonsu?
3 Chidi chom chikasikeshina mudi ik pa kuchirikin mujikit wa Atuman a Yehova mu muvu wa mudimu wasutina mudi mu mekeshinau pa tablo udia pa paj wa 3 kushik ku 6! Mulong mivu 16 yilondulijadina, asutishin asaa miliyar umwing ni kusut mu mudimu wa kulejan ni wa kwikadish in kwilej. Udi uman wa ritiy rikash mudi ik! Kwading kuvulijan kwa 5,8 pa chitot mu uvud wa ayibol, 3,1 pa chitot wa in kulejan, ni 4,4 pa chitot wa in kwilej Bibil. Abatishau ashika pa 20,1 pa chitot mu muvu wa mudimu wasutina. Chidi chom chikasikeshina mudi ik pa kuman antu piswimp ni tutikit sambwad akat kumusadin Yehova nich kushinshaman—nakash kamu katat kupandakanamu pa chisu chin chawonsu chikwau mu rusangu a antu! Piushinshikidina tablo winou, chom ik umena anch chikukasikeshin ey pakampwil?
4. Ov, milong ik yalikay muntu umwing padingay ni kwirijek chakwel atambula dibabatish?
4 Ap anch uvud wa antu udi upandakena awinau tufanyidinap ap dichuku dimwing kuvuramen anch ulejen antu amekesha ritiy rau. Tal chilakej chimwing. Guillermo wapamina mu Bolivie. Wavadika mu muvu wa 1935, ndiy wasala mu chir chimwing cha mitond ya coca kudiosh padingay ni mivu chidivu. Kudiosh wanikanch, ndiy wading ni kudiang mayij ma coca chakwel apwisha mar ma mudimu ukash, mudimu wa ku mujimbu. Kupwa wasambisha kuna rutuk nakash ni ruwand. Pasambishay kwilej piur pa yimwitinay Yehova kusal, Guillermo walika kuna ruwand ni rutuk. Chamukasikena nakash kulik chaku chend cha kudia mayij ma mutond wa coca. Ndiy walembila pakad kujing ni walika chaku chinech. Palikay chaku chinech chiyimp, ndiy watambula dibabatish. Ulondin anch: “Katat, niyovil zwaang ni musangar ukash.”
5. Ov, yik usotina?
5 Yehova uyisangaredin antu chakin kamu. Ndiy usotin anch awonsu akarumuna michim yau. (2 Pita 3:9) Ni etu rawiy rusot retu. El, michim yetu yitubachik amboku ku kusal yawonsu yitukutwisha kusal chakwel tudandamena kuyikwash antu a kashinsh chakwel ashikena ku kumwijik ni ku kumukat Yehova pitusadina.