Ov, Ukutwish Wasal Nakash mu Mudimu Wey wa Kulejan?
1. Maswir ik makash madia mu mudimu wa kulejan, ni mulong wak?
1 Pamanay mutapu wadingau antu avud ni kusanger rusangu ruwamp ra Want, Yesu wayileja in kwilejend chakwel amwilembila “Mwant wa yir chakwel ayituma in kwangul mu yir.” (Mat. 9:37, 38) Chitudia mu yisu ya kwisudiel ya chirung cha mudimu wa kwangul, mudimu wetu wikadil kal wa kusal swa-swa kupandakanamu chiwadinga pasak. Chom chinech chirumburikin anch tufanyidin kulembil nakash chakwel tumana mutapu wa kwikal akwatikena nakash mu mudimu wa kulejan.—Yoh. 14:13, 14.
2. Mutapu ik witiyijiningau antu amwing ku rubil ra kukimb in kusal mudimu wa kulejan avud?
2 Sal Nakash Mudimu Wey wa Kulejan: Antu avud amen anch chiyiswapediling kusal mudimu wa uchibol nich umutakel ni ukwash wa Yehova. (Kus. 26:2, 3; Filip. 4:6) Antu amwing asadiling usu wa pakampwil chakwel asala mudi ayibol ankwash pa ngond umwing ap avud pa muvu. Chom chinech chiyikwashining kusal nakash mudimu wa kulejan mu mutapu uwamp. Musangar utaniningau pa kwikal nich chisend chinech wayishikija kal antu avud ku kwikal ayibol a rawonsu.—Mid. 20:35.
3. Anch wadinga chibol pasak, chom ik ukusota katat kusal?
3 Ov, Ukutwish Wasal Kand Uchibol?: Anch wasalap kal mudi chibol, pakad kwidjidjek uvurikin yom yakusangaresha pa chisu chinicha. Ov, ukat kutongijokin ni kulembil chakwel umana kand mutapu wa kwikal chibol? Mikadil yakushikija ku kulik mudimu wa uchibol pamwingap yapwa kal. Chisu chikutwish chikal chawanyin kal chakwel usangera kand chisend chinech cha pakampwil.—1 Yoh. 5:14, 15.
4. Chom ik cha pakampwil chidia kurutu kwa umwing ni umwing wetu?
4 Mudimu wa kwangul ukupwa katat kamu. (Yoh. 4:35, 36) El tushinshikinany etwawonsu mwikadil wetu wa katat chakwel tumana anch tukwitenchik chakwel tusala nakash mu mudimu wetu wa kulejan. Pakwez anch chakin kamu tukutwishap kusal nakash mu mudimu wetu wa kulejan, ov, tukutwish twakimb mitapu yikwau mutukutwisha kwikal ayifuvu mu mudimu? (Marko 12:41-44) Chisend chiwamp mudi ik chiyitekidinau katat antu awonsu akweta mikadil yiyitwishishina kwikal asadidilau kudi Yehova mwinjil mudi yiney ya pakampwil!—Kus. 110:3.