“Ukez Kusalangany Mwamu” Chivurikish Chikusadik pa Ndol 5
1. Ov, mulong wak Chivurikish chidi chisu cha usey nakash?
1 “Ukez kusalangany mwamu mulong wa kwinvurik am.” (Luka 22:19) Ku mazu minam, Yesu wayileja in kwilej end chakwel avurikang chakupesh cha rufu rend. Mulong wa yom yawonsu yawanyishau kudi difut, kwikil dichuku ap dimwing dia usey nakash ap dipandakenamu Chivurikish cha pa muvu. Pichishejina piswimp chivurikish cha pa Ndol 5 cha muvu unou, ov, mutapu ik tukutwisha kumekesh kujikitish kwetu kudiay Yehova?—Kol. 3:15.
2. Ov, mutapu ik tukutwisha kumekesh kujikitish kwetu mulong wa Chivurikish kusutil ku kwilej ni kutongijokin pa mifund?
2 Twirijekany: Twirijekining kwetu mulong wa yom tumening anch yidi ya usey. Tukutwish kurijek michim yetu mulong wa Chivurikish kusutil ku kwilej pamwing mu dijuku yinship yashikena mu machuku mansudiel ma Yesu pa divu ni kusutil ku kutongijokin piur pay. (Esi. 7:10) List wa mifund udia mu kalandriye ni mu Examinons les Écritures chaque jour, ukwet uvud wawonsu wa majin wilikena nich mashapitre madia mu buku Le plus grand homme, udi pa paj wa 23-24 mu nimero wa Chinong cha Kalam cha pa Kasan 1, 2011.
3. Ov, mutapu ik tukutwisha kumekesh kujikitish kwetu mulong wa chivurikish kusutil ku kutanduril mudimu wetu wa kulejan?
3 Tulejanany: Tukutwish kand kumekesh kujikitish kwetu kusutil ku kwipan nakash mu mudimu wa kulejan. (Luka 6:45) Kampany wa pa mangand mawonsu wa kuyitazuk antu akwau ku Chivurikish ukez kusambish pa Diampos, Rish 17. Ov, ukutwish watenchik program wey chakwel usutisha chisu chivud mu mudimu wa kulejan, pamwing ap mudi chibol nkwash? Ov, mulong wak wisambidinap Chivurikish mu dijuku pa chisu chikwau cha urel wa Kwifukwil mu Dijuku?
4. Ov, yiyukish ik tukutwisha kutambul ku kwikalaku ku Chivurikish?
4 Chiyukish mud ik tutanidinamu kusutil ku kwikalaku ku Chivurikish muvu ni muvu! Kumusanger kwetu ni kumukat kwetu Nzamb kuyil ni kupandakan pitutongijokidininga pa riy ra Yehova mu kupan Mwanend kapwokal mudi difut. (Yoh. 3:16; 1 Yoh. 4:9, 10) Chinech chikat kutusadish etu chakwel tulika kushakam mulong wetwetu ayinetu. (2 Kor. 5:14, 15) Chibachikin kand rusot retu ra kumushiman Yehova patok. (Kus. 102:19-21) Chakin kamu, atushalapol in kumujikitish Yehova achingejin nich musangar chisu chikeza kuwanyin dichuku dia kukumangan ku Chivurikish pa Ndol 5 chakwel ‘ijikisha rufu ra Nsalejetu.’—1 Kor. 11:26.