Les merveilles de la création révèlent la gloire de Dieu
Antu avud asangering kutal chitangil. Pakwez antu akemp ajingunining anch chitangil chimekeshining yom yivud piur pa yitongijok ni yovil ya Sakatang wetu Mujim. (Rom 1:20) Pasutil kal mivu, David wileja piur pa Yehova kusutil ku Dizu Diend dipepidilau. Pakwez ndiy “wamumana” kand ni wikala piswimp nend Ndiy kusutil ku chitangil. (Kus. 8:3, 4) Video ukweta mutu wa mulong ulondina anch: Les merveilles de la création révèlent la gloire de Dieu utukwashin etu, anetu, ni in kwilej etu a Bibil chakwel tushinshikin nawamp pa chitangil cha Yehova, kuman mikadil ni untu wa Sakatang wetu Mujim, ni mudi chibudikin cha kwikal piswimp nend. Kupwa kwa kutal video winou, tal anch ukutwish kwakul ku yipul yilondwilaku ey.
(1) Ov, mutapu ik kujimb ni kutenchik kwa diur yikasikeshina musangar wen mudiay Yehova? (Isay 40:26) (2) Chisu tushinshikidina nawamp mem, ov, chom ik tukutwisha kwilej piur pa Nzamb? (Kuj. 14:7) (3) Ov, mutapu ik kujimb kwa divu ni kwikal piswimp ni muten yimekeshina manangu ma Yehova? (4) Ov, ngond usadining mudimu ik? (Kus. 89:37) (5) Ov, mutapu ik Yehova watonday antu chakwel asangera mwom? (6) Ov, ADN chom ik? (Kus. 139:16) (7) Ku yitangil yawonsu ya Yehova yidia pa divu, ov, mutapu ik yishalijadina ni antu? (Dis. 1:26) (8) Ov, yom ik uchingedina mu mangand masu?
Yom Yikwau: (9) Ov, kwisu kudiokilinga ulombu? (10) Ov, mutapu ik mem makupandakanamu usu ukata kupwitan kudiokal mwiur kuya pansh chakwel mashika ni ku mitu kwa mitond? (11) Ov, mudimu ik usadininga mem mu mujimbu wetu? (12) Pan yilakej ya kwovijan kudiaku pakach pa yom yikweta mwom. (13) Ov, mutapu ik wija yitangil kuta urund ni yikwau? (14) Ov, “dikonk dia or” chom ik, ni mutapu ik dimekeninga mu chitangil? (Tal Réveillez-vous ! wa pa Mwinses 2006, pa paj wa 24).
“Tutalany” Yatangay Yehova: Yesu watukasikesha chakwel ‘tutala atujil a mwisuku’ ni ‘tutala yisalamb ya mu masuku.’ (Mat. 6:26, 28) Kusal mwamu kukutwish kukasikesh ritiy retu, kukasikesh ruchingej mudiay Sakatang, ni kukutwish kukudish kusanger kwetu mulong wa manangu, usu wa kumupandish muntu, ni rukat ra Yehova. Pa ndond pa kwikal uzuwodilau chamwamu nich midimu ya mangand minam, itekinany chisu ni salany usu wa kushinshikin yitang yishimokishina ya Yehova, ni tonginany pa mutapu yitulejina piur pa Nzamb wetu.—Kus. 19:1.