Yakul Ku Yipul Yen

◼ Ov, chom ik tufanyidina kushinshikin anch tusotin chom kanang ap mapit metu mawonsu tumapana mu dirijek dia Yehova kurutu kwa rufu retu?

Pafilingau antu, awiy kakwetingap kand dizu dia kulond piur pa yom yau bwat. (Mul. 9:5, 6) Chawiy lel, antu avud afundining mukand wijikena ujimbwilingau anch testama, chirumburikin anch udi mukand ulejeninga mutapu ufanyidinau kusadin dipit diau kupwa kwa rufu rau. (2 Ant 20:1) Yisu yivud, mu testama winou witiyijinau kudi mburamatad afundiningamu dijin dia muntu ufanyidina kulam ap kwangan dipit din. Mu jingand jivud, anch muntu kafundap nawamp testama, antakel a mburamatad awiy amekeshininga mutapu ukutwishau kwangan dipit diend. Chawiy, anch tusotin anch yom yetu yisuta mu mutapu windjing, chilakej, anch tusotin anch dirijek dia Yehova ditambula yom yin yawonsu, tufanyidin kufund testama wijikena ni witiyijinau kudi mburamatad pamwing ni kufund dijin dia muntu twatondina kuwanyish chisend chinech.

Muntu winou ukwet chisend chijim nakash. Anch yom niyawiy yidi yivud, kuyikungij ni kuyangan kwitin yom yivud ni kukutwish kwatambul chisu chivud. Chikwau, yisu yivud kuding mbil ja mburamatad tufanyidina kuziyil. Chidiap ching kusu chid chawonsu cha chikumangen chifanyidina kwikal nich chisend chinech. Muntu tukutonda ufanyidin kwikal muntu twija anch uwanyishining chisend chinech nawamp, chidi chiwamp kumuchingejin, ni ukez kulondul kamu yom tufundina.—Tal mutu wa mulong ulondina anch “Préparer sa succession : une mesure sage,” udia mu Réveillez-vous ! wa pa Kachirikin 8, 1998, mu Français.

Anch Akwit Kuwanyish Chisend Chinech: Anch muntu kanang wakwit kuwanyish chisend chinech kupwa kwa rufu rend, chakusambish ufanyidin kushinshikin nawamp win kamu ni kulembil chakwel wijika anch ufanyidin kuchisal ap bwat. (Luka 14:28-32) Kupwa kwa rufu ra muntu win wang, ufanyidin kwijikish muntu mwin mwawonsu wafundau dijin diend pa mukand winou chakwel atambula yom. Kupwa, anch watambul mbil ya kuwanyish chisend chinech, chikwit wangana yom ni kulondul yany kukwatijan nich umutakel ufundinau mu testama. Muntu ukweta chisend cha mutapu winou, ufanyidin kwijik anch yom yikalap yivud ap yikemp, ndiy ufanyidin kusal ching mutapu ufundinau mu testama. Chom chin chawonsu chatekinau mu makas ma dirijek dia Atuman a Yehova ni chambatena ni yany ya mburamatad chikushal cha dirijek dia Yehova.—Luka 16:10; 21:1-4.