Ov, ‘Kwibaz Kwen Ayinen’ Kudi kwa Mutapu Ik?
1. Ov, kwibaz kwetu kudi kwa mutapu ik chisu chipwilinga ngond ni ngond?
1 Chisu chipwilinga ngond ni ngond, ayitining antu awonsu chakwel izwisha rapor wau wa mudimu wa chingand, ov, ‘kwibaz kwen ayinen’ kudi kwa mutapu ik? (Gal. 6:4) Ap anch tudi ayibol a pakampwil apanininga rapor wa asaa 130 mu mudimu wa kulejan ap in kulejan itiyijinau kupan rapor wa aminit 15, antu awonsu pakach petu afanyidin kusangar mu mudimu wa kumusadin Yehova nich muchim wawonsu.—Kus. 100:2.
2. Ov, mulong wak tufanyidin kwipan ayinetu mu mudimu wa Yehova?
2 Chidiay Mwant Mujim wa mangand, Yehova usangaredining yom yipandikena usey tumwinkishininga. (Mal. 1:6) Mulong wa rukat rend, twapanin kal mwom wetu chakwel tusala rusot rend. Chawiy lel, kwisudiel kwa dichuku ap kwa ngond, anch tukwet kashinsh anch twapanin “yom yipandikena kuwap” ya chisu chetu, ukaliweny, ni usu wetu mu mudimu wa Yehova, tukutwish ayinetu kwibaz. (Jinsw. 3:9) Pakwez anch, kom ketu katufish nich, tufanyidin kushinshikin mutapu tukutwisha kusal chakwel tukawapisha.—Rom 2:15.
3. Ov, mulong wak chidiap cha manangu kwiyilikej ayinetu ni antu akwau?
3 Pakad “Kwiyilikej ni Yisalijok ya Muntu Mukwau”: Chidiap cha manangu kwiyilikej ayinetu ni antu akwau anch tukwet usu ukash. Mashakamin maswimpining. Ukaliweny ushalijadining. Yisu yivud kwiyilikej kumushikijining muntu ku kubambel ap kutong anch kakwetap usey. (Gal. 5:26; 6:4) Yesu kiyilikejap. Pakwez, ndiy wajikitisha kwambatan nich yom yadinga yifanyidinay muntu kusal.—Mar. 14:6-9.
4. Ov, dilejan ik dia usey tukutwisha kwilej ku chishimu cha Yesu cha talent?
4 Mu chishimu cha Yesu cha talent, mwin mudimu ni mwin mudimu watambula talent “mudi mwilikedila manangu mend.” (Mat. 25:15, TMK) Chisu chachirikay mwant wa mudimu ndiy wita rapor piur pa mudimu wau, chawiy antu asala nakash kwambatan nich ukaliweny wau ni mashakamin atambula kujikitish ni asangara pamwing ni mwant wau wa mudimu. (Mat. 25:21, 23) Chilik chimwing kand, anch twashal akwachikina nakash mu mudimu wa kulejan Want, tukutwish kwikal nich kuchingel kwitiyik kwa Nzamb ni tukutwish kwibaz!