Yijikish

◼ Mikand ya kupan pa Kalang ni Kachirikin 2014: Chom ik Chakin Kamu Chifundishinay Bibil? ap umwing wa ku matrakt madiaku mulong wa kusambish nich malejan ma Bibil. Pa Chiwong ni Kasan 2015: Broshir Rusangu Ruwamp Ridiokila Kudi Nzamb! mulong wa kusambish nich malejan ma Bibil. Chiyul: Broshir winou udiaku amboku mu jindim 22 jilondinau mu teritwar wetu: Alur, Cibemba, Kanyok, Kikongo ya Leta, Kiluba, Kinande, Kinyarwanda, Kipende, Kisonge, Kituba (Brazzaville), Kongo, Lega, Lingala, Lomongo, Mashi, Ngbaka, Otetela, Sanga, Swahili (Congo), Tshiluba, Uruund, Zande.

◼ Shikol ya Mudimu wa Uchibol yikez kusadik pa rubing rikusambisha pa Kachirikin 22 ap 29, 2014. Ngond umwing kurutu kwa kusambish shikol winou, kalam wa munyingumuku ukez kumutumin mwan ni mwan a shikol winou mukand umutazukinau nich ni buku musu mulong wa shikol. Itekinany amboku chisu cha kwirijek mulong wa chinship chinech cha pakampwil.​—Esidera 7:10.