Miminy Yisu Mulong wa Difukwil!
1 Ku chitentam cha pa muvu cha Watch Tower Bible and Tract Society of Pennsylvania, chasadikina pa Mwinkind 4, 2014, ijikishaku anch buku wetu wa miminy akez kumuchirikin mu kumufund kand kapamp kakwau. Riner ridi rusangu risangareshina chakin kamu mud ik! In kukumangan awonsu avurika usey ukwetinga miminy yetu ya Want mu difukwil dietu.—Kus. 96:2.
2 Ukutwish kwiyipul anch: ‘Ov, usey ik udiaku wa kuchirikin kufund kand kapamp kakwau buku wa muminy?’ Kudi mayingish mavud. Diyingish dia kusambish didi anch kutesh kwetu kwa kurumburik kwa Mifund kudandamedin kwikal zwang ni chinech chikutwish kwikal nich chibachikin pa miminy yetu. (Jinsw. 4:18) Diyingish dia kaad dia kuchirikin kufund kand didi anch: Mazu mavud makusadinau mu buku wetu wa katat wa muminy makez kukwatijan kamu nich dichap dia Traduction du monde nouveau. Mazu ma miminy yiney ma kukwatijan katat nich mazu madia mu dichap dia katat. Mulong chikwit mudimu uvud chakwel achirikina miminy yiney yikala ya katat, akukwat mupak wa kuwejinaku miminy yisu yikemp ku buku wa miminy.
3 Ov, tukez kuchingel djat ni pa kupwishau kufund buku musu wa miminy yiney chakwel tusambisha kusadil miminy yiney yisu? Bwat. Tukwet musangar wa kukwijikishany anch mu kusutil kwa angond avud, uvud kanang wa miminy yisu akez kuyitek pa kapend ketu ka Web, jw.org. Chisu chikubudika muminy usu, akez kuutek pa program kwinsudiel kwa Chikumangan cha Mudimu ni akuufund anch “muminy usu.”
4 Mutapu wa Kwilej Miminy Yisu: Chikutwish kukasikan kwilej muminy winou usu. Pakwez, mudi nfund a kuseng, tusotining kuwang mu yikumangan pakad ‘kuninet.’ (Kus. 30:12) Chakwel wileja muminy usu, londul amboku mitapu yiswapela ey.
Tesh tupamp tuvud melodi wawangau nich piano ukutekau pa kapend ketu ka Web. Piuteshina tupamp tuvud melodi winou, ukutwish kuvurik swa.
Ileja mazu ma melodi minam ni pakish kumalam mu manangu.
Wang melodi winou kukwatijan ni mazu mend. Sal mwamu djat ni piukeza kwijik nawamp muminy winou.
Chirikin miminy yisu mu yisu yikemp pa chisu cha Kwifukwil mu Dijuku djat ni pakushikena dijuku diey kuwang nawamp.
5 Mu angond a kurutu chisu muminy usu ukwikala kwinsudiel kwa Chikumangan cha Mudimu, chikumangen chikez kutesh kapamp ka kusambish muminy uwanginau nich piano. Kupwa, in kukumangan akez kuwang muminy wawangau nich piano mudi mutuwangininga miminy yikwau.
6 Anch watongijokin pa miminy yiney yiwanginau ku yikumangen yetu chiding chisu chimwing cha kunung mazu metu mu uumwing nich musangar mulong wa kumuwangin Yehova. Chawiy lel, tufanyidinap kwikal nich chaku cha kumbundikang pa chisu cha muminy wa nsambishil ku yikumangen yetu ya Win Kristu.
7 Kudi mutapu ukwau tukutwisha kumekesh anch tusangaredining miminy yetu yitumbila. Ku yitentam ya region ni ya munyingumuku tuteshining mizik ya kusambish nich chikunku ni chikunku cha chitentam. Tupamp twaad pa muvu, akadivar ni anambaz ipanina kal adiokilinga mu jingand kushalijan afutining nfalang jau mulong wa kuya ku Patterson, Mu New York mulong wa kuwang miminy yiwamp ya kusadil mu difukwil dietu. Chawiy lel, anch ntakel watwit chakwel tutumbuka ni tutesha miminy yarijekau, tufanyidin kutumbuk. Kusal mwamu kukez kutukwash turijeka michim yetu mulong wa miminy tukuwanga.—Esi. 7:10.
8 Tukez kupwish yikumangen ya nlel unou, mu kuwang muminy ukweta mutu wa mulong: “Want Wasambishin Kal Kuyikel.—El Weza!” Muminy winou auwanga ku chitentam cha pa muvu, aufunda pakampwil mulong wa kumekesh chijingidij chivurikish cha kwikalaku kwa Want pasutin kal mivu 100.
9 Miminy yisu yidi chakin kamu “yom yiwamp” yidiokila kudiay Yehova. (Mat. 12:35) El amboku etu awonsu tukwatany mupak wa kwilej miminy yiney yisu ni tuyiwangany nich michim yetu, mu kumushiman ni kumutumbish Nzamb wetu!—Kus. 147:1.