Imburijany Ritiy Rau
1. Buku ik tukwileja ku Dilejan dia Bibil dia Chikumangen pa rubing ra 19 Ngond wa 10?
1 Pa rubing ra 19 Ngond wa 10, 2015, tukusambish kwilej buku Imitez leur foi mu Dilejan dia Bibil dia Chikumangen. Buku winou wisambidin jinsangu ja mu Bibil ja amakundj ni amband 14, adinga ni ritiy. Buku winou amufunda mulong wa kutukwash kuyiman antu inay ashinshamena mu manangu metu, kutukwash chakwel tuyimana mudi antu akin arisha nich milong yikash pamusadinangau Yehova. Buku winou ukutufundish kand mutapu wa kusadil jinsangu jinej mu mwom wetu nlel unou.—Heb. 6:12.
2. Rumburil piur pa mitu ya milong yimwing yidia mu buku Imitez leur foi.
2 Mitu ya Milong: Buku winou ulejen mivu ni makart mulong wa kutukwash chakwel twijika chisu ni ndond yashakamau antu inay. Chikwau kand, shapitre ni shapitre ukwet mutu wa mulong ulondina anch “Qu’en penses-tu ? ” ukutukwash kutongijokin ni kusadil malejan ma usey tukwileja. Buku winou ukwet kand yipish yiwamp nakash yikutwisha kutukwash chakwel tutesha nawamp rusangu ra mwom wau.
3. Chom ik tufanyidina kusal chakwel tutaninamu mu dilejan dia buku winou?
3 Mutatapu Ukutwisha Kutaninamu: Mukand udia kwinsambishil wafundau kudi Chisak Chitakedila utukasikeshin nich mazu minam anch: “Tongin bil pa yom utangina; yiteka mu yovil yey. Pakish kwiyov mudi mwiyovau antu ajimbwilau mu Bibil, shinshikin yom yamanau. Isikej mutapu wasalau mu mashakamin kanang ni mutapu ukutwisha niyey kusal mwamu.” Chawiy lel, kutongijokin kurumburikinap anch tufanyidin kutongijokin pakad rutong, pakwez tufanyidin kutongijokin pa mazu ma jinsangu jinej japepilau ni tukasikeshin pa yom yayishikena antu inay. Kusal mwamu yitin chisu ni kutongijokin. (Neh. 8:8) Anch dilejan diasambish mukach mwa shapitre, mwin kutakel ukusadil masekond 30 ap 60 mulong wa kuchirikin yom yilejau. Ukwipul chipul chimwing ap yaad ya kuchirikin anch shapitre winou kakwetap mutu wa mulong ulondina anch: “Qu’en penses-tu?”
4. Mulong wak tufanyidina kwilej buku Imitez leur foi?
4 Tudi mu mangand makimbining dichuku ni chichuku kushesh ritiy retu mu mitapu kushalijan. Buku winou—ukwet mitu ya milong kushalijan yidiokila mu Chinong cha Kalam—chidi chipan chidiokila kudi Yehova chitukwashina kukasikesh ritiy retu. (Jak. 1:17) Tutaninanyamu amboku mu kukumangan ku Dilejan dia Bibil dia Chikumangen pakad kujing ni mu kwakul kuyipul anch chitwishikin pitukwileja buku winou pamwing!