Tukudishany Ukaliweny Wetu mu Mudimu wa Kulejan—mu Kuyifumb in Kwilej Bibil Chakwel Akudisha Yaku Yiwamp ya Kwilej

Chidia cha Usey: Chakwel in kwilej Bibil aya kurutu muspiritu afanyidin kudish manangu mau ni michim yau nich mafundish ma dishin ma Dizu dia Nzamb. (Heb. 5:12–6:1) Kwilej kwitining kusal usu. Chitining kuwejaku jinsangu jisu jitwija ni kutongijokin pa yom ya usey ya kusadin. (Jinsw. 2:1-6) Anch muntu wilej panrend mutapu wa kukimbijol kukumukwash mwin kwilej chakwel akula ku yipul ya Bibil pakusadinay mikand yetu ya win Kristu. Usu usadiningau nich mushiku wa kusadil yom yilejiningau ukuyikwash chakwel awanyina kurish nich yoziu padiau in Kristu.—Luka 6:47, 48.

Mutapu wa Kusal:

Kasikesh usey wa kukimb ukwash wa Yehova mu malembil piutakedila chikunku ni chikunku cha dilejan.—Yoh. 14:26; 1 Kor. 2:10.
Kwisambishin, mukasikesha mwin kwilej chakwel irijeka kurutu kwa chisu mulong wa kwilej nend Bibil. Muleja mukand wey ni murumburila mutapu wa kutek mifund ap kasikeshin pa manans ma usey ap milong yijim.
Muleja mwin kwilej chakwel akula ku yipul mu mazu mend. Kangal wasal dilejan dikala mudi chikunku cha yipul ni yakul mu kusal anch mwin kwilej akula kwend ching yom yifundinau mu buku.
Mukasikesha mwin kwilej wey chakwel atangang Dizu dia Nzamb pichuku-pichuku. Muleja program wa kutang Bibil udia pa kapend ka jw.org, ukasikeshina yom ya usey yikutwishay kusadil. Kukudish chaku cha kutang Bibil pichuku-pichuku kwitining kukwat mupak, pakwez mupak winou uding wa usey.—Kus. 1:2, 3.
Muleja mwin kwilej wey mutapu ukutwishay kutan yakul ku yipul ya Bibil mu kusadil Watchtower Library ap Watchtower ONLINE LIBRARY. Mukwasha mwin kwilej chakwel ijika majin ma mikand yitukata kusadil ku yikumangan ya chikumangen.

Pakish Kusal Mwamu pa Ngond:

Kupwa kwa kushinshikin tumitu tukemp tukemp ap kwa shapitre, mwipula mwin kwilej wey Bibil chakwel alonda mu wiswimp yom yilejay kal. Anch ukwetap muntu wa kwilej nend, sadil mu wiswimp ma verse ma mu Bibil ap ma paragraf madia mu Chinong cha Kalam chakwel ukudisha nawamp mutapu wey wa kutesh yom.