MASHAKAMIN MA MWIN KRISTU

Yom Yisu Piur pa Chikumangan Chetu cha Mukach mwa Rubing

Kusambish Ngond wa 1, 2018, mu chikumangan cha mukach mwa rubing mukwikal chikunku chilondina anch yom ya kwilej ni yom yikwau yidia mu Les Saintes Écritures. Traduction du monde nouveau (nwtsty) udia pa Internet, ap anch dichap dia kwilej kandikal dikalaku mu dizu dien. Chakin rusangu riner rikuwapish mutapu wey wa kurijek yikumangan. Cha usey nakash, yom yiney yikutwish kukusejish piswimp ni Tatukwetu wa rukat Yehova!

YOM YA KWILEJ

Chikunku mulong wa kwilej, chilejen yishankur, jindond ni mutapu usadidinau mazu mu maverse mavud ma mu Bibil.

Mateu 12:20

Moj wa lamp ukimbina kujim: Pasak asadinang mu yikumbu lamp ukweta ndond ya kutek many ma oliv. Moj wapwitang many chakwel waka kasu. Dizu dia Grek “moj wa lamp ukimbina kujim” dikutwish kumekesh moj ubudishina mish mulong kudi ka dikal kakweta kasu pakwez muzuzu wajimang kal. Uprofet udia mu Isay 42:3 wasambela kulejan piur pa ranaken ra Yesu; kafanyinap kudiwul ka risis ka nsudien ka kasu ka antu in kwikepish ni azengodilau.

Mateu 26:13

Mu win yakin: Mu dizu dia Grek, a·menʹ, ulondinau mu dizu dia Hebereu anch ʼa·menʹ, dirumburikin “chikala kamu mwamu,” ap anch “chakin kamu.” Yesu wasadinang yisu yivud dizu dined mulong wa kusambish mambamb, chisu chikaninay, ap chisambidinau piur pa uprofet, pamwing ap mulong wa kukasikeshin pa yom yidia yakin. Yesu wasadinang dizu “chakin kamu,” ap amen, mulong wa kumekesh anch ndiy ulondina yom yidia yakin. Pachirikinangay tupamp tuvud dizu (a·menʹ a·menʹ), mudi muyidia mu Evanjil wa Yohan, mazu minam ma Yesu amakarumwin anch “chakin chakin.”—Yoh 1:51.

YOM YIKWAU

Mafoto, yipich, ni mavideo makad kulond ni yifatul yimekeshina yom yivud yidia mu Bibil.

Betefaj, Mukandu wa Mitond mudi ya Mpach, ni Yerusalem

Video winou mwiswimp ulejen njil yidiokila kwi ngangel kwa Yerusalem, kudiokal ku ul utazukinau nlel anch Tir—utonginau anch wading Betefaj wa pasak—wading piur pa Mukandu wa Mitond mudi ya Mpach. Betaniy udi kwingangel kwa Betefaj kwimbet kwa Mukandu wa Mitond mudi ya Mpach. Payangangau mu Yerusalem, Yesu nau in kwilejend alala mu Betaniy mudi mwasalangau machuku makwau, utazukinau nlel anch musumb wa el-ʽAzariyeh, mu dizu dia Arab autazukin anch “Ndond ya Lazar.” Chakin Yesu washakamang kwol kwau, kwa a Mart, Mariy, nend Lazar. (Mt 21:17; Mr 11:11; Lu 21:37; Yoh 11:1) Padiokalangay kwol kwau mulong wa kuya ku Yerusalem, Yesu pamwing ap wayilang mwi njil yiney yilejenau mu video. Pa Nisan 9, 33 C.C., pakandamay pa mwan a chimbur ku Mukandu wa Mitond mudi ya Mpach mulong wa kuya ku Yerusalem, chimeken anch Yesu wasala mwamu mulong wa kudiokal ku Betefaj ni kulondul njil yiyila ku Yerusalem.

Njil ya ku Betaniy yiyila ku Betefaj
Betefaj
Mukandu wa Mitond mudi ya Mpach
Nkurubuk ya Sederon
Mukandu wa ku Tempel

Musumad mu Difup dia Kapolantundu

Chinech chid chipich cha kapolantundu ka muntu kapampinau musumad wa kulep kwa asantimetre 11 ni chikunku. Difup dined aditana mu muvu wa 1968, chisu chakimbijolau kurul kwa Yerusalem, ni didiaku kudiosh pa chirung cha in Rom. Chinech chipanin uman wakin wa yom ya pakur anch asadinang misumad mulong wa kumupampin nich muntu ku mutond. Musumad winou ukutwish kwikal wa mutapu umwing ni wasadinau amasalay a in Rom mulong wa kumupamp nich Yesu Kristu ku mutond. Chom chinech achitana mu mushet wa diyal utazukinau anch mushet wa mafup mwatekangau mafup ma muntu ufila kupwa kwa kuvund. Chinech chimekeshin anch muntu wajipinangau ku mutond afanyinang kumujik.—Mt 27:35.