Mitapu Yisatu ya Kumuchingejin Yehova

David wamujipa Goliat mulong wading umuchingejidin Yehova. (1Sam 17:45) Yehova ukatining kumekesh usu wend mulong wa kuyiking atushalapol end awonsu. (2Jsng 16:9) Mutapu ik tukutwisha kuchingejin ukwash wa Yehova pa ndond pa kuchingejin ronganyin ni ukaliweny wetu? Ey yawiy mitapu yisatu ya kulondul:

• Lembil chisu chawonsu. Kangal kwau kulembil kupwa kwa kurumbuk pakwez lembil chakwel wikala ni usu wa kupandakan yoziu ukurisha nich. (Mt 6:12, 13) Kangal kwau kulembil chakwel Yehova ayukisha mipak yey wakwatina kal, pakwez mulembila kand chakwel akutakela ni kukwinkish manangu kurutu ukwata mipak.​—Jak 1:5

• Ikal ni chaku cha kutang ni kwilej Bibil. Tangang Bibil dichuku diawonsu. (Kus 1:2) Tongijokin pa yilakej ya mu Bibil, ni sal usu wa kusadin yom wilejina. (Jak 1:23-25) Irijeka kurutu kwa kuya mu mudimu wa kulejan pa ndond pa kuchingejin pa ukaliweny wey. Ukutwish kutaninamu mu yikumangan ya chikumangen anch wirijek nawamp kurutu kwa chisu.

• Sal mu umwing ni dirijek dia Yehova. Sal usu wa kwijik umutakel wa katat upaninau mu dirijek dia Yehova ni ulondula pakad kulab. (Kuch 9:17) Anch amakurump akuyul ni akwinkish umutakel, ufanyidin kuyitesh.​—Heb 13:17

TAL VIDEO KANGAL WOV WOM WA KUZENGOL, NI KUPWA AKUL KU YIPUL YILONDWILAKU EY:

• Yom ik yayovisha akadivar ni anambaz wom?

• Yom ik yayikwasha kupandakan wom winou?