Yipul Ya In Kutang

In Yuda ik ading ku Tempel mudi ampurij? Yisend ik yadingau nich?

In Levi amwing ading akad kwikal in kupesh ading akwet yisend yindj, chilakej kusal mudi ampurij. In Levi inay ading ayitakedil kudi ntakel wa tempel. Philo mwin kufund umwing mwin Yuda urumburil yisend ya ampurij inay anch: “Amwing pakach pa [in Levi] inay ading kwimanang ku yis ya kwandamin mudi atulam, akwau imanang mukach mwa tempel pantaliken ni ndond yitumbila nakash mulong wa kuyikangesh antu awonsu akad mbil ya kwandamamu ap anch kijap anch chiyipin kusal mwamu. Amwing akerang, akat kuchish ku tempel aswimpijan lel uchuku ni muten kukwatijan ni mutapu wambambangau.”

In Sanedrin aswirikenang usu wa ampurij inay mulong wa kuyikwash. Awiy kusu in Yuda itiyijau kudi in Rom kwikal ni mat.

Mwin kwilej umwing Joachim Jeremias walonda anch: “Mazu malonday Yesu anch dichuku diawonsu wafundishang mu tempel pakwez kamukwatap, mulong wa kuyifish nich antu amukasa pamukwatau kal (Mat. 26.55) movikana chad nawamp. Chimeken anch ampurij a ku tempel awiy eza kumukwat.” Mwin kwilej winou utongin kand anch amakundj asambelau kutum mulong wa kumukwat Yesu ading kand ampurij a ku Tempel. (Yoh. 7:32, 45, 46) Kupwa ayituma ampurij inay ni ntakel wau mulong wa kuyikwat in kwilej a Yesu ni kuyitwal kudi in Sanedrin, ni pamwing ap ampurij a ku tempel awiy kand amukakalijana Paul ni kumubudish mu tempel.—Mid. 4:1-3; 5:17-27; 21:27-30.