Ov, Wij?
Mu mivu chitot ya kusambish mash amasalang nich yom ik kud in kupesh kupwa kwa kuyipesh annam pa chintamb?
MUVU ni muvu, mu Isarel wa pasak, in kupesh apanang tunan ni tunan twa yakupesh ya annam pa chintamb. Kukwatijan ni Josephus mwin Yuda wilejang milong ya pakur wa mu mivu chitot ya kusambish, pa musambu wa Pasak, alambulang amikoku 250 000 ni kusut. (Lev. 1:10, 11; Kuch. 28:16, 19) Kwisu kwatwalangau mash minam mawonsu?
In kukimbol yom ya pansh ajingunina yom yading yasalau kal mu Tempel wa Herod mulong wa kubudish mash djat kamu ni pasheshinau musumb wa Yerusalem mu muvu wa 70 C.C. Amana mutapu wadoshangau mash minam mu Tempel.
Shinshikin yom yaad yakwashang kwinangish chintamb:
Dibuku mwinshin mwa chintamb: Mutapu wawapishangau chintamb aurumburil mu Buku wa pakur ukweta yijil ya in Yuda wafundau kupwa kwa muvu wa 200 C.C. ukwet mazu mafanakena ni minam. Buku winou ulondin anch: “Ku Tempel kwading mabuku maad ku dikonk da chintamb. Mwamu mash madokalang ku yakupesh ni mem masadinangau mulong wa kwinangish pa chintamb masutinang mu mabuku minam ni kuya kamu djat kwi nkurubuk ya Sidon.”
Chaku chinech cha pakur cha kupund “mabuku” piswimp ni chintamb chikwatijadin ni yom yajinguninau kud in kukimbijol a yom ya pansh. Buku umwing ulejena rusang ra in Yuda urumburil anch in kukimbijol yom ya pansh abudikina matranshe piswimp ni tempel masadinangau pamwing ap mulong wa kusutish mash ma annam apeshangau ni mem madokalang mu tempel.
Mem mavud: In kupesh ading akwet kuswir kwa mem mavud mulong wa kwinangish nich pa chintamb ni kubachik nich mash. Mulong wa kuwanyish nawamp chisend chinech chijim, in kupesh ading ni mem madokalang mu musumb. Kwading matranshe, mingoch, ni majiy ni yom yikwau kand. Mwin siyans Joseph Patrich walonda anch: “Mutapu winou wa kupwit mem, ni kubachik mem mayimp mulong wa kurijek mu tempel wading kamu wa pakampwil chisu chinicha.”