Yipul ya in Kutang
Chisu ik chikwimana mudimu wa kulejan?
Yesu walonda anch: “Rusang ruwamp ra Want riner akez kurulejan pa mangand mawonsu mulong wa kwikal uman ku michid yawonsu, chad lel disuden deza.” (Mat. 24:14) Dizu da grek dikarumwinau anch “disuden” mu verse winou, ni mu verse 6 ni 13, did teʹlos. Dimekeshin disuden da rawonsu da mangand ma Satan dikushikena pa chisu cha njit ja Armagedon. (Kuj. 16:14, 16) Chawiy, tukudandamen kulejan rusang ruwamp ra Want kushik ku disuden dined. Chitongijok chinech chaswimp kal mutapu wetu wa kutesh wa pasak.
Kwinsambishin, twalondang anch tukwimik mudimu wa kulejan rusang ruwamp chisu chikusambisha mar makash kusutin disheshik da Babilon Mujim. (Kuj. 17:3, 5, 15, 16) Twitiyijang anch chinship chinech chawiy chikumekesha disuden da “chisu chiwamp cha ranaken ra [Yehova]” (Isay 61:2) Twatongang kand anch ching kusu antu asambedina kal kwipan kud Yehova kurutu kwa mar makash awiy akutwisha kupand. Twayifanakeshang nau In Yuda apanda chisu chasheshau musumb wa Yerusalem mu muvu wa 607 K.C.C. Antu inay ayiteka chijingidij cha kupand mulong amusadina Yehova nich kushinshaman ni ading akisin yom yiyimp. (Ezek. 5:11; 9:4) Pakwez kufanakesh kwinoku kukwatijadinap ni mazu ma Yesu mada mu, Mateu 24:14, mamekeshina anch antu akutwish kwitiy rusang ruwamp kurutu kwa disuden da rawonsu pa chisu cha njit ja Armagedon.
Kutesh kwetu kusu kwa mukand wa Mateu 24:14 kuswimpin kand kutesh kwetu piur pa uruu ufanakena ni mayal ma ruval majim, wasambelau kulejan mu Kujingunik 16:21. Kukimbijol kukurikina kumekeshin anch mikand yiney yaad yinungijadin chitongijok Mutapu ik? Chakul chimedin pa mutapu wakinau antu uruu wa Want. Kambuy Paul wafunda anch, kud “antu ayila mu kupand,” uruu rid rusang ruwamp, “res ra mwom.” Pakwez kud akankuny a Nzamb, rid rusang riyimp, “didjimb da rufu.” (2 Ko. 2:15, 16) Akisin uruu wa Want mulong umekeshin anch mangand mau mad mayimp, amayikedin kud Satan, ni mad piswimp ni kusheshik.—Yoh. 7:7; 1 Yh. 2:17; 5:19.
Man kand anch mayal ma ruval ma chifanakesh malejenau makwikal ‘majim nakash.’ Chinech chimekeshin anch pa chirung cha mar makash, pamwing ap uruu wetu ukwikal ukash ni ukuyishik antu avud nakash kusutamu pakur. Mud chibudikin, antu avud akwijik dijin da Yehova. (Ezek. 39:7) Pa chisu chinicha, kupwa kwa kumushesh Babilon Mujim, ov, antu amwing akutwish kwitiy uruu wetu ni kuwov mud res ruwamp? Chikutwish kwikal mwamu. Pamwing ap akutwish kuvurik ap kwilej anch Atuman a Yehova alejen kal mu mivu yivud piur pa kusheshik kwa relijon wa makasu.
Mulong wa kutesh nawamp, shinshikin yom yasadika mu Ijibit wa pakur kupwa kwa yipupu dikum kusadik. Kupwa kwa Yehova “[kuyirumburish] akish awonsu a in Idjibit,” antwend ayilondula kud “yisak ya mitapu ni mitapu” ya antu akad kwikal In Isarel. (Kub. 12:12, 37, 38) Pamwing ap antu inay akwata mupak wa kumusadin Yehova pamanau anch yom yawonsu yalonday Moses piur pa Yipupu Dikum yasadika.
Muntu win mwawonsu ukukwata mupak wa kumusadin Yehova kupwa kwa kumushesh Babilon Mujim, ukwikal ni mutapu wa kuyikwash akadivar nend a Kristu akwikala achid pa divu chisu chinicha. (Mat. 25:34-36, 40) Chakin kamu, dilau da kwikal akwatinau mud amikoku dikupwa chisu chikemp kupwa kwa njit ja Armagedon, chisu chikuyau mwiur in Kristu azizidilau many ashadinaku mulong wa kutambul difut dau.
Mutapu usu winou wa kutesh umekeshin rukat ra Yehova ni ranaken rend rijim. Chakin kamu, “kakatinap anch muntu ap umwing asheshik, pakwez ukatin anch awonsu ashiken ku kukarumuk.”—2 Pi. 3:9.