Anch Nikatijadin ni Muntu wa Mujimbu Mudi Wamam, Ov, Chinech Chimekeshin anch Nidi Mwin Utun?
Bwat kwau!
Win yakin: Yisu yivud, kukatijan nakash ni muntu wa mujimbu mudi weyey kuding kwau kwa chisu chikemp.
Mwawiy mwamanay Lisette ukweta mivu 16, wading umukatina changadim umwing. Ulondin anch: “Mu dilejan dia bioloji, nileja anch pa chisu cha usand, ma hormones makat kuvul nakash. Nitongin anch ang ansand ij yom yivud piur pa mijimbu yau, ing akutwish kwijik anch kukatijan ni muntu wa mujimbu umwing kudi kwau kwa chisu chikemp ni kakutwishap kwikal in kusal utun.”
Ansand awonsu afanyidin kutond—anch akulondul yaku yiyimp ya mangand piur pa kulalijan kwa ikundj ni mband ap kulondul mbil ja piur jidia mu Dizu dia Nzamb
Pakwez chidi nchik anch yovil yiney yadandamen? Nzamb uyitin antu akweta yovil yiney kulik kusal utun. Ov, chiyipin?
Anch wakul anch mwaning ku chipul chinech, ufanyidin kwijik anch yitongijok yiney yimedin pa kwitiyij anch antu afanyidin kuziyin ku maku ma kulalijan. Bibil utulimishin patulejinay anch tufanyidin kukwat mupak wa kutond kulik kulondul maku mayimp ma kulalijan.—Kolosay 3:5.
Chitongijok cha Bibil chisiken. Ulejen yom yimwing kudi antu akweta maku ma kulalijan ni antu a mujimbu umwing ni antu akweta maku ma kulalijan ni antu a mijimbu kushalijan ‘kuchin yisal ya masandj.’ (1 Korint 6:18) Uyakin udi anch mamiliyon ma antu akweta maku ma kulalijan ni antu a mijimbu yishalijadina akatina kulimish mbil ja Bibil akat kwilam mulong wa kulik kuwil mu yoziu. Antu akweta maku ma kulalijan ni antu a mijimbu yimwing akutwisha niyau kusal mwamu anch akatin kamu kumusangaresh Nzamb.—Kuvurik Yijil 30:19.