7 MBIL JA MWOM

KURUMBURIK

Mbil ja mwom jid mbil jiwamp jikutwishay muntu kutond mulong wa kujilimish mu mwom wend. Chilakej, ov, ukat kusal usu wa kwikal mwin kashinsh mu yom yawonsu? Chakin kamu anch ukatin aney ikal niyawiy ni mwikadil winou.

Mbil ja mwom jitin kand kwikal ni yaku yiwamp. Chilakej, muntu ukweta yaku yiwamp uding mwin kusal mudimu nich mushiku, wakad kasolikany ni ukat kuyibanginang antu akwau​—ni muntu ukutwish kukudish mikadil yiney swa pachidiay mwan mukemp kamu.

MBIL YA BIBIL: “Mufumbila mwan mwi njil yiwapidilay kuya, mulong pakukulay kakez kayilikap kand.”​—Jinswir 22:6.

MULONG WAK CHID CHA USEY

Mu mangand mudandamedina teknoloji kuya kurutu, mbil ja mwom jid ja usey nakash. Maku umwing dijin diend Karyin ulondin anch: “Tukutwish kwikal ni yibachikin yiyimp kusutil ma aparey mud telefon ap tablet chisu chin chawonsu. Anetu akutwish kuman chom chimwing chakad kuwanyin ap anch achish kwau piswimp niyetwetu!”

MBIL YA BIBIL: “Antu akudila kal akat kwauril kuwap ni kuyip mulong ijidin kal kusal mwamu tupamp tuvud.”​—Hebereu 5:14.

Kwikal ni yaku yiwamp niyau kud kwa usey. Chinech chitin kwikal ni yaku kanang ya kumekesh kalimish (mud kulond anch “amboku” ap “wajikit”) ni kumekesh anch uyibangidin kamu antu akwau​—antu avud kakwetap kand yaku yiney, mulong chimeken anch akat kubangin nakash ma aparey mau kusutamu antu.

MBIL YA BIBIL: “Sal yom kudi antu akwau, mudi muukatila ing niyau akusadilang ey.”​—Luka 6:31.

YOM UKUTWISHA KUSAL

Mekesh kud antu akwau mbil jey ja mwom. Chilakej, in kukimbijol alondin anch ansand akweta mivu pakach pa 13 ni 19 akutwish kulik kusal mansandj kurutu kwa kwatan ap kwachik anch ayilejinap kal anch kusal mwamu kuyipin.

CHIYUL: Sadin rusangu kanang rashikenang mulong wa kwisambin piur pa mbil ja mwom. Chilakej, anch ku televizion alejanang piur pa kujipijan, ukutwish kulond anch: “Chiletin ushon nakash pa kuman mutapu antu muyikisinau akwau. Ey utongin anch yom ik yiyishikijina antu kusal mwamu?”

“Chikasiken nakash kud an kutond pakach pa yom yiwamp ni yiyimp anch kayijap kwau.”​—Brandon.

Yifundisha aney kwikal ni yaku yiwamp. Ap an akemp nakash akutwish kwilej kulond anch “amboku” ap “wajikit” ni kuyibangin antu akwau. Buku umwing ulejena yom piur pa anvaj ulondin anch “ang an aman anch ad mu chisak chijim chiyisutinamu ayinau​—mud dijuku, shikol ap chirund kanang—​akusal usu nakash wa kuyisadin antu akwau yom yiwamp, kadiap kwau ching mulong wa uwamp wau ayinau.

CHIYUL: Yinkisha aney midimu ya kusal ku chikumbu mulong wa kuyikwash kwilej usey wa kuyisadin antu akwau.

“Anch anetu ijidin kusal midimu ya chikumbu katat, chikuyikasikenap kwau kusal mwamu anch ishakamin ayinau. Akwijidin kamu chad kuwanyish yisend kanang ya usey mu mwom wau.”​—Tara.