Anch wij nawamp chiudia, ukutwish kwiman dang patutina rinkind mukash
YITADINA ANSAND
9 KWIJIK CHIUDIA
KURUMBURIK
Kwijik chiudia kwimedinap kwau pa dijin dikwijau kud antu ap mutapu umekena ku mes. Chitin yom yivud mud yom ukwatina nich usey, yitiyij yey ni wuntu wey. Kwijik chiudia kwawiy kusadina anch wikala kamu chiudia ey amwiney, mukach ni pol.
MULONG WAK CHID CHA USEY
Anch wij kamu nawamp chiudia, ukulond kamu piur pa yitiyij yey pa ndond pa kulik anch arund ney ikala ni yibachikin yikash pad ey.
“Antu avud ad kwau mud apopi akudjik masun ading mu magazeng. Kakatap kutond ayinau masun ma kudjal, antu akwau awiy akata kuyitondin.”—Adrian.
“Nileja kulondin yom nija anch yid yiwamp, ap anch chikasiken kusal mwamu. Nikutwish kulond anch anany adia arund nam akin kusutil yom yisadinau ni kusutil yom nisadina am anch nid nau pamwing.”—Courtney.
MBIL YA BIBIL: “Kangal wifanikeshany ayinen nich yaku ya mangand minam. Pakwez itiyany Nzamb akukarumunany mu yom yawonsu ni kukwinkishany manangu masu.”—Rom 12:2.
YOM UKUTWISHA KUSAL
Tong nakash piur pa wuntu ukweta katat ni usotina kwikal nich kusutil kushinshikin usu wey kanang, kuziy kwey ni yom witiyijina. Mutapu uwamp wa kusambish kusal mwamu ud wa kwakul ku yipul yilondwilaku ey.
Usu wey: Ukaliweny ik nikweta ap yom ik nijing kusal nawamp? Mikadil ik yiwamp nikweta? (Chilakej: Ov, nikat kulimishang chisu? Ov, niding mwin kwikand? Mwin kusal mudimu wa mushiku? Mwin kupan?) Yom ik yiwamp nikata kusalang?
CHIYUL: Ov, chikukasikedin kujingunin yom yiwamp wasadina ap walondina? Mwipula nvaj wey ap murund ney uchingejidina chakwel akuleja ukaliweny kushalijan ukweta ni mulong wak.
MBIL YA BIBIL: “Chifanyidin muntu mwawonsu kwirumburish amwinend. Anch yisalijok yend yidi yiwamp, ndiy ukutwish kwibaz amwinend wakad kwiyilikej ni yisalijok ya muntu mukwau.”—Galatia 6:4.
Kuziy kwey: Mikadil ik nifanyidina kusal usu wa kwikal nich? Chisu ik chikatau kwinpak kusal yom yiyimp? Mu jinjil ik nifanyidina kwikand nakash?
MBIL YA BIBIL: “Anch twalond anch, kitudiap akayitil, tukat kwidimb ayinetu.”—1 Yohan 1:8.
Yitiyij yey: Mbil ja mutapu ik nikata kulimish ni mulong wak? Ov, nikat kumwitiyij Nzamb? Uman ik nikweta winginkishina kamu kashinsh anch Nzamb udingaku? Yisalijok ya mutapu ik nimena anch yiyipin ni mulong wak? Yom ik nikata kwitiyij piur pa machuku ma kurutu?
MBIL YA BIBIL: “Kashinsh kakukulam, ni ronganyin rey rikukuchidij.”—Jinswir 2:11.