Dilejan dia 6
Ov Want wa Nzamb Udi Chom Ik?
Want wa Nzamb udi mwi ndond ik? (1) Nnany udia Mwant wau? (2)
Ov kudi akwau akuyikela pamwing nend Mwant? Ang inge, adi inch? (3)
Yom ik yimekeshina anch tuding mu machiku ma kwisudiel? (4)
Want wa Nzamb ukusadil akaantu yom ik kurutu oku? (5-7)
1. Padingay panap pansh, Yesu wayileja in kumulondul end kulembil mulong wa Want wa Nzamb. Want udi guvernement utakedinau kud mwant. Want wa Nzamb udi guvernement wa pakampwil. Awimikin mwiur ni ukez kayikel piur pa divu dined. Ukez katumbish, ap kusal dikala dinsant, dijin dia Nzamb. Ukez kalet rusot ra Nzamb risadika pansh mud murisadinau mwiur.—Mateu 6:9, 10.
2. Nzamb washilamu anch Yesu ukez kikal Mwant wa Want Wend. (Luka 1:30-33) Padingay Yesu pansh, wamekesha patok anch ukez kikal mwant muwamp, utentamina, ni uwanyidina. Pachirikay mwiur, kamushichikap pa chipwan kapamp kamwing mud Mwant wa Want wa Nzamb. (Hebreu 10:12, 13) Mu 1914, Yehova wamwinka Yesu usu wamushilayimu. Kudiokal pinap, Yesu uyikedin mwiur mud Mwant uswanishinau wa Yehova.—Daniel 7:13, 14, NW.
3. Yehova watonda kand amakundj ni amband amwing ashinshamena kudiokal pansh kuya mwiur. Akez kayikel pamwing nend Yesu mud aant, anzuj ni inkupesh piur pa akaantu. (Luka 22:28-30; Kuburik 5:9, 10) Yesu watazuka anyikel’nend mu Want wend “kachisak kakemp.” Uvud wau udi 144 000.—Luka 12:32; Kuburik 14:1-3.
4. Pin-pa kamu pikalay Mwant, Yesu wadjibula Satan ni angel end ayimp kudiokal mwiur kwez pansh piswimp ni divu. Chawiy chinech yom yeza kwikal yiyimp panap pansh kudiosh mu 1914. (Kuburik 12:9, 12) Jinjit, tumungun, yipupu, kupandikan kwa kujiril yijil—yiney yawonsu yidi chikunku cha “chijingidij” chilejenanga anch Yesu ukat kuyikelang ni anch ditenchik dined didi mu machiku mad ma nsudiel.—Mateu 24:3, 7, 8, 12; Luka 21:10, 11; 2 Timoteu 3:1-5.
5. Katat kamu Yesu ukurumburish antu, kuyaurilang awiy mud kafung mukatay kwauril amikoku nau ampemb. “Amikok” awiy ina akeza kamekesh patok ayinau adi antu’end ashinshamena. Akez katambul mwom wa rawonsu pa divu. “Ampemb” awiy ina akeza kadiwul (kadjibwil kulemp) Want wa Nzamb. (Mateu 25:31-34, 46) Kurutu oku kudia piswimp, Yesu ukez kayishesh anfanampemb awonsu. (2 Tesalonika 1:6-9) Ang usotin kwikal umwing wa “amikoku” a Yesu, ufanyidin kutesh uruu wa Want ni kusadil yiukata kwilej.—Mateu 24:14.
6. Katat divu adiawuril mwi ngand jivud. Ngand ni ngand yikwet guvernement way. Mangand minam makat kurishijan yimwing ni yikwau. Pakwez Want wa Nzamb ukez kaswinkan maguvernement ma ukauntu mawonsu. Ukez kayikel mud guvernement umwing kusu piur pa divu diawonsu. (Daniel 2:44, NW) Chad lel pakezap kikal kand njit, chilim, ni ubaj. Antu awonsu akez kashakam pamwing mu chisambu ni uumwing mud dijiku dijim dimwing.—Mika 4:3, 4, NW.
7. Mu chisu cha winyikel wa mivu kanan wa Yesu, aanantu ashishamena akez kikal awanyidina, ni divu diawonsu dikez kikal paradis. Pa kupwang kwa mivu kanan, Yesu ukwel wasalang kal chom ni chom chamwelay Nzamb asala. Chad lel ukez kachirish Want kud Tatukwend. (1 Korint 15:24) Ov mulong ik ukutwishap kuyilej amwing a arund ney ni akatish ey piur pa yom Want wa Nzamb ukeza kasal?
[Caption on page 13]
Pa winyikel wa Yesu, pakezap kikal kand kukisan ap kusalan nayimp