Dilejan dia 7
Kumushejin Nzamb mu Malembil
Mulong wak chidi cha usey kulembil chisu chawonsu? (1)
Ufanyidin kulembil kud nnany, mutapu ik? (2, 3)
Yom yisu yiwapidina kulembidin? (4)
Chisu ik ufanyidina kulembil? (5, 6)
Ov Nzamb ukat kutesh malembil mawonsu? (7)
1. Dilembil didi kulondang nend Nzamb kwa kwikepish. Ufanyidin kumulembil Nzamb chisu chawonsu. Chawiy ukutwisha kwiyovu piswimp nend mud kudiay murund mukatish. Yehova udi mujim nakash ni mwin dikand, chad kand ukat kutesh malembil metu! Ov ukat kulembil Nzamb chisu chawonsu?—Kuseng 65:2; 1 Tesalonika 5:17.
2. Dilembil did mutambu wa kwifukwil kwetu. Komb, tufanyidin kulembil ching kusu kud Nzamb, Yehova. Padingay Yesu panap pansh, pichukupichuku ndiy walembila kud Tatukwend, pikil kud muntu mukwau ap umwing. Tufanyindin kusal mwamu. (Mateu 4:10; 6:9) Chad, malembil metu mawonsu mafanyidin kumalondil mu dijin dia Yesu. Chinech chimekeshin anch tulimishin ndond ya Yesu ni anch tukwet ritiy mu difut dia yakupesh yend.—Yohan 14:6; 1 Yohan 2:1, 2.
3. Pitukata kulembil tufanyidin kulond nend Nzamb kudiok mu michim yetu. Kitufanyidinap kulond malembil metu kudiok mu manangu ap kumatang kudiok mu buku wa malembil. (Mateu 6:7, 8) Tukutwish kulembil mu mutapu ap wisu wa kalimish, mu chisu ap chisu, ni mwi ndond ap yisu. Nzamb ukutwish kwov malembil makad kwovikan tulondidina mu michim yetu. (1 Samuwel 1:12, 13, NW) Chidi chiwamp kukimb ndond yidia zoong kulemp ni antu akwau mulong wa kulond malembil ma ayinetu.—Mako 1:35.
4. Yom ya mitapu yik ukutwisha kulembidil kud Nzamb? Chom ap chisu chifanyidina kukangesh urund wey nend. (Filipoi 4:6, 7) Dilembil dia sampul [dia kulondwish] dimekeshin anch tufanyidin kulembidil dijin dia Yehova ni rutong rend. Tukutwish kand kwitin atwanzukin nswir jetu ja mujimbu, mulong wa dilikishin dia yitil, ni mulong wa ukwash pitukata kurang ni choziw. (Mateu 6:9-13) Malembil metu kimafanyidinap kwikal ma kwitongin ayinetu. Tufanyidin kulembidil ching kusu mulong wa yom yendina pamwing ni rusot ra Nzamb.—1 Yohan 5:14.
5. Ukutwish kulembil chisu muchim wey ukukubachika kumujikitish ap kumushiman Nzamb. (1 Jinsangu 29:10-13, NW) Ukutwish kulembil piukweta matat ni ritiy rey pirikupimikang. (Kuseng 55:22; 120:1) Chiwapin kulembil kurutu kwa kudia yakudia yey. (Mateu 14:19) Yehova utwitin tulembil “chisu ni chisu.”—Efesus 6:18.
6. Tuswiridin nakashnakash kulembil ang twasalang chitil chilimina. Mu yisu mud yiney tufanyidin kwitin ranaken ra Yehova ni dilikishin. Ang twitiyin patok yitil yetu kudiay ndiy ni kusal usu wetu wawonsu kulik kuyichirikin, Nzamb “witenchikin ku dilikishin.”—Kuseng 86:5; Jinswir 28:13.
7. Yehova ukat kutesh ching kusu malembil mau in kutentam. Chakwel malembil mey amova kud Nzamb, ufanyidin kusal usu wey wawonsu ushakama kulondulijan ni yijil yend. (Jinswir 15:29; 28:9) Ufanyidin kwikepish piukulembila. (Luka 18:9-14) Uswiridin kusadin yiukata kulembilang. Chawiy ukeza kamekesh patok anch ukwet ritiy ni anch chakin wovil kurumburik kwa yom ulondila. Chawiy lel Yehova ukez kakwil malembil mey.—Hebreu 11:6.