Ov Antu Awonsu Akez Kakatijan Dichuku Dimwing?

RUKAT MULONG WA MUNTUNETU REZIN KUTALAL

AMILIYON a antu iyovil mud akad ruchingej ni mud ayimanamar, akad kwa kwengamin. Mband umwing panshone mwin-kwisak walonda anch: “Urel kanang mwadia-mufu umwing ushichinga piur pa kapalikany kam ka kwiur wankokola ku chis ni kulond anch wadinga diamwinend (mwiyau). Namuleja kamu kapamp kamwing pakwez nich kalimish anch nidi ni mudimu nakash. Wita dilikishil mulong wa mutapu wezay ni kwinzuwol ni wachirika kwol kwend.”

Cha ushon, uchuku winiwa kamu, mwadia-mufu wizezika. Kulal kulank, mwin kwisak winou muntu mband walonda anch weza kwilej “difundish dimwing dikash.”

Kuburen rukat mulong wa muntunetu kuding chisu chivud kwa ubaj. Chisu cha matend ma chimuchid mu Bosnie ni mu Herzegovine, ngand jadinga pakuru mu Yugoslavia, kusut kwa miliyon umwing wa antu eza kuchin kudiokal ku yikumbu yau ni makum ma tunan ayijipa. Kud nany? “Antunetu,” mwinaninay changadim washemuninau kudiok mu ul wend. “Antu ang adinga antu twijikina.”

Mu Rwanda tutu twa tunan twa antu ayijipa, chisu chivud kud antunau. “Ahutu nau Atutsi [asokanga] pamwing, atijananga, wakad kubang ap kwijik nany udia Mukahutu ni nany udia Mukatutsi,” mwamu mwalonday jurnal The New York Times. “Chad lel kweza kukarumuk kapamp kamwing kamu,” ni “kujipijan kwasambisha.”

Chilik chimwing, Ayuda nau Abalej mu Isarel ashich amwing piswimp ni akwau, pakwez avud akisijadin. Mashakamin madi chilik chimwing ku mutambu wa Akatolik avud nau Aprotestant mu Irland, Ahindu nau Amizilma mu Inde, ni antu akwau avud mwi ngand jikwau. Mu rusangu ra ukamuntu kand kal kwezap kuburen rukat mud nlel unou.

Mulong Wak Rukat ra Muntunetu Ritalel Zong?

Sakatang wetu utwinkishin chakul. Dizu diend, Baibel, ditazukin yiney “machuku ma kwisudiel.” Chinech chidi chirungu chilondidina uprofet wa Baibel anch, antu akez kwikal “akad rukat ra chivadik.” (New World Translation) Piur pa ‘yisu yikash,’ yiney yitazukinau kand mu Mifund anch “dipwishil dia ditenchik dia yom” (NW), Yesu Kristu watakela kulond anch “rukat ra avud rikez kutalal zong.”​—2 Timoteu 3:​1-5; Mateu 24:​3, 12.

Chawiy lel, kuburen rukat kwa nlel, kudi uman ma kwel anch tushich mu machuku ma kwisudiel kwa mangand minam. Cha musangar, chirumburikin kand anch mangand minam ma antu akad Nzamb akez kamaswinkesh nich mangand matentamina mayikedinau kud rukat.​—⁠Mateu 24:​3-​14; 2 Pita 2:5; 3:​7, 13.

Ov, tukwet lel mulong wa kwitiyij anch kukarumuk mud kwinoku kudi kutwishikina​—⁠anch antu awonsu akutwish kwilej kukatijan ni kushakam pamwing mu chisambu umwing ni mukwau?

Rukat Ra Muntunetu​—Ukinakin

“MUKWETU mwin nany?” mwamu mwin kwijik yijil wa mivu chitot ya kusambish mwamwipulay Yesu. Wakad ntad ndiy wachingejina Yesu kulond anch, ‘Mbayey Muyuda.’ Pakwez mu chishimu cha Mwin Samaria muwamp, Yesu wamekesha anch antu a michid yikwau kand adi antunetu.​—Luka 10:29-​37; Yohan 4:​7-9.

Yesu wakasikeshina anch, pamwing nich rukat ra Nzamb, rukat ra muntunetu rifanyidin kuyikel miom yetu. (Mateu 22:34-​40) Pakwez, ov kwezap kal kwikal chisak cha antu akata chakin antunau? Mwamu mwasalau Akristu a pasak! Ayijikinanga rukat radingau nich mulong wa akwau.​—Yohan 13:34, 35.

Tukulond nchik nlel? Ov rukat rifanijadina ni ra Kristu arijishidin kud muntu kampand ap kanang? Buku Encyclopedia Canadiana ulondil anch: “Mudimu wa Atuman’a Yehova udi uchirikidina ni kayakez wa Win-Kristu wa pasak wiyijidishangau Yesu ni in-kwilej end . . . Awonsu adi akadivar.”

Chinicha chirumburikin ik? Chirumburikin anch Atuman’a Yehova kalikidinap chom ap chimwing​—⁠wikalap ulombu wa chikit, wanangand, ap muchid wa chivadik​—⁠kuyikisish antunau. Ap kakezap kajip muntu ap umwing, mulong ezin kuchil mu chirumbudij jimpak jau ja musamun kwikal jinkasu ni mirumbu yau kwikal jimpak ja kukatul nich ya kwangul. (Isaya 2:​4, NW) Atuman, chakin, ijiken mulong wa kwikalang a kusambish kukwash antunau.​—Galatia 6:​10.

Kichishimokishinap anch jurnal umwing, Sacramento Union wa mu Californie wijikisha anch: “Chiwapidil kusu kulond anch mangand mawonsu mambatananga ni ritiyin ra Atuman’a Yehova kukwelap kwikal kumwang kwa mash, rukis, ni rukat relang kuyikel kamu mud mwant.” Mwin kufund umwing mu jurnal Ring mu Hongrie walejana anch: “Nezin kushiken dipwishil dia kwel anch, ang Atuman’a Yehova ading kusu awiy ashicha pa divu, jinjit kijelangap kwikaliku, ni mudimu wa ampurish welang kwikal kusu wa kutal yijil ya mutapu wa kwendish motak ni kupan mapasipor.”

Chawiy lel, kukarumuk kujim kwa mangand mawonsu kukez kaswiridik ang antu awonsu afanyidin kukatijan umwing ni mukwau. Kukarumuk kwinoku kukez kwez nchik? (Tal amboku paj wa nsudel.)

Pakezau Kukatijan Antu Awonsu

DILEMBIL diafundishay Yesu Kristu dimekeshin anch kukarumuk kumwing kwakamishina kudi piswimp. Mu Mafundish mend mashimokisha pa Mukandu, Yesu watufundisha kulembil anch: “Want wey weza. Rukat rey arusala pansh mudi mwiur.”​—Mateu 6:​10.

Ov, Want wa Nzamb udi chom ik? Udi guvernement wa kashinsh, guvernement ukeza kayikel kudiok mwiur. Chawiy chiutazukidinau “want wa mu maur.” Yesu, “Mwan-a-Mwant a Chisambu” udi utondinau kud Tatukwend kwikal Nyikel wa want winou.​—Mateu 10:7; Isaya 9:​6, 7, NW; Kuseng 72:​1-8.

Ov, yik yikeza kashiken mangand minam mizwila sens rukis, pakweza Want wa Nzamb? “Want,” ukez ‘kashesh ni kutek nsudel’ ku maguvernement mawonsu mijondila ma mangand minam. (Daniel 2:​44) Baibel ukat kurumburil anch: “Ni ngand yasutil kal [“yikat kusutang,” NW] . . . , pakwez wawonsu ukusadila rukat [rusot] ra Nzamb ushich chikupu.”​—1 Yohan 2:​17.

Piur pa mangand masu ma Nzamb, Baibel ulondil anch: “Mwin kutentam ukez kaswan ngand, ukez kashakamamu chikupu.” (Kuseng 37:​9-​11, 29; Jinswir 2:​21, 22) Chinicha chikez kwikal chisu cha katumb mud ik! “Kukez kikalip kand rufu, ap kukez kikalip kand madil, ap kushikok kudil, ap kusansan, kwamwamu kand.” (Kuburik 21:4) Ap afu akez kwikal kand aom, ni divu diakabuj dikez kwikal dikarumwinau paradis umekena.​—Isaya 11:​6-9, NW; Isa. 35:​1, 2, NW; Luka 23:43; Midimu 24:15.

Chakwel kushakam mu mangand masu ma Nzamb, tufanyidin kukatijan, mud kamu mutufundishinay Nzamb kusal. (1 Tesalonika 4:9) Mwin kwilej wa Baibel umwing wa Kwingangel walonda anch: “Nichingedil muten, mud mushidilayimu Baibel, muten ukeza kwilej antu awonsu kukatijan.” Ni tukutwish kwitiyin chakin anch Nzamb ukez kalam kushilimu kwend. Ulondil anch, “Neza kuchilond, nikez kand kachisal.”​—Isaya 46:​11, NW.

Pakwez chakwel kusangarin yiyukish yiney mwishin mwa Want wa Nzamb, ufanyidin kutambul ronganyin ra Baibel, mud musadinau amiliyon a antu in muchim utok kunyingumuk mangand mawonsu. (Yohan 17:3) Broshir wa mapaj 32 Nzamb Witin Etu Tusal Ik? ukez kakukwash. Mwikimbinap amboku kopi wey amwiney kusutin kwizwish kupon utekinau pa paj ushadila ni kumutum ku adres wa piswimp ni kwol kwey.