Difundish dia 1

Nzamb ukutazukin kwikal murund nend

Nzamb usotil anch wikala murund nend. Ov watonginap kal anch ukutwish kwikal murund nend Muntu upandakena kujimb mu mangand? Aburaham, muntu wa pasak, amutazuka anch murund nend Nzamb. (Jakobu 2: 23) Antu akwau kand isambidinau mu Baibel ikala ni urund wa Nzamb ni ayiyukisha nakash. Nlel, antu a mitambu yawonsu ya divu ikadil kal arund nend Nzamb. Niyey ukutwish kwikal murund nend Nzamb.

Kwikal murund nend Nzamb chiwapil kupandakanamu kwikal murund nend muntu ap wisu. Nzamb kakatap kuyidimb arund nend ashishamena muchim. (Kuseng 18:25) Kwikal murund nend Nzamb kupandaken kwikal ni mapit. Pakatay kufa mpich, nfalang jend jikat kwikal ja antu akwau. Pakwez, antu akweta urund nend Nzamb akwet chipau chimwing chakaday kutwish kusend muntu ap umwing.—Mateu 6:19.

Antu amwing akutwish kupakish kukukangesh kwilej kumwijik Nzamb. Ap arund ney amwing ni anamakwey akutwish kusal mwamu. (Mateu 10:36, 37) Anch antu akwau akakukusip ap kukovish wom, iyipula amwiney anch, ‘Ov nany nisotila kusangarish—antu anch Nzamb?’ Tongin chinech: Anch muntu wakulej kulik kudia, ov ukumuziyil? Chakin anch bwat! Uswiridin yakudia chakwel kwikal mwom. Pakwez Nzamb ukutwish kukwinkish mwom wa chikupu! Komb lel kangal walik muntu ap umwing akukangesha kwilej mutapu ukutwisha kwikal murund nend Nzamb.—Yohan 17:3.