Difundish dia 7

Dibabesh dia pasak

Yehova kakuyilikap antu ayimp ayipisha Paradis. Ching kamu arund nend awiy akushakamamu. Ov yom ik yikuyishikena antu ayimp? Chakwel kwijik chakul, shinshikin chishimu chakin cha Noa. Noa washakama tunan twa mivu pasak. Wadinga muntu umwing muwamp wadinga ni kwikasikesh nakash kusal rusot ra Nzamb pichuku pichuku. Pakwez antu akwau pa divu adinga ni kusal yom yiyimp. Chawiy lel Yehova wamuleja Noa anch ukulet mabeb mulong wa kujiyish antu ayimp in awonsu. Wamuleja Noa kutung diwat chakwel ndiy ni dijuku diend kakutwishap kufa anch Mabeb mashik.—Disambishil 6:9-18.

Noa ni dijuku diend atunga diwat. Noa wayibabesha antu anch Mabeb makat kwez, pakwez kamuteshap bwat. Adandamena kusal yom yiyimp. Chapwishay kutung diwat, Noa wayandjika annam mu diwat, ndiy ni dijuku diend ni yawiy andama mukach. Chad Yehova waleta ruval mujim. Ruval wanaka machuku ma muten 40 ni machuku ma uchuku 40. Mem mizula ndond yawonsu pa divu.—Disambishil 7:7-12.

Antu ayimp ashadisha mwom wau, pakwez Noa ni dijuku diend ayipandisha. Yehova wayipandisha ku Mabeb pa divu dimwing diatokishay ku uyimp. (Disambishil 7:22, 23) Baibel ulondil anch kukwikal kand chisu chikezay Yehova kushesh antu alikina kusal yom yitentamina. Antu awamp kakez kuyijiyishap bwat. Akez kushakam chikupu pa divu dikarumwinau Paradis.—2 Pita 2:5, 6, 9.

Nlel antu avud asadil yom yiyimp. Mangand mizwil too nich ruvundu. Yehova uyitumin Atuman end chisu ni chisu mulong wa kuyibabesh antu, pakwez avud kasotilap kutesh mazu ma Yehova. Kakatinap kukarumun mutapu wau wa kushakam. Kasotilap kwitiy yilondilay Nzamb piur pa yiwamp ni yiyimp. Ov yom ik yikuyishikena antu inay? Ov akez kukarumuk dichuku dimwing? Avud kakukarumukap ap pakemp. Chisu chikat kwez chikezau kuyishesh antu ayimp ni kakez kwikalakwap kand chikupu.—Kuseng 92:7.

Divu kakez kudisheshap bwat; akez kadikarumun kwikal paradis. Antu ikadila arund nend Nzamb akez kushakam chikupu mu Paradis pa divu.—Kuseng 37:29.