Difundish dia 12

Yom ik yikata kusut ku rufu?

Rufu ridi chinyim cha mwom. Rufu ridi mudi tul tumwing tujim. (Yohan 11:11-14) Afu kakutwishap kutesh, kuman, kulond, ap kutongin chom ap chimwing. (Mulej 9:5, 10) Difukwil dia makasu difundishining anch afu akat kuyang mwi ngand ya muspiritu mulong wa kushakam pamwing ni angakau. Baibel kafundishinap mutapu winou bwat.

Antu afila kal kakutwishap kutukwash, ni kakutwishap kutusal nayimp. Chidi chijikena kwawonsu anch antu akat kusalang yifuk ni yakupesh mulong itiyidin anch yikuyisangarish antu afila kal. Mutapu wa kusal winou ukatap kumusangarish Nzamb mulong wengamidin pa makasu ma Satan. Chikutwishap ap kuyisangarish afu, mulong kakwetap kwau mwom. Tufanyidinap kwov wom wa afu ap kuyifukwil. Tufanyidin kumwifukwil ching kusu Nzamb.—Mateu 4:10.

Afu akez kwikal kand ni mwom. Yehova ukez kuyilangwish afu chakwel ikala kand ni mwom pa divu dikarumwinau paradis. Chisu chinech chichidi kurutu oku. (Yohan 5:28, 29; Midimu 24:15) Nzamb ukutwish kuyilangwish antu afila kal mud kamu chiukutwisha kumulangwish muntu ulela mu tul.—Marko 5:22, 23, 41, 42.

Chitongijok cha kwel anch tukufangap madi makasu mapalangeshinay Satan Djabul. Satan nau ayilembil end akat kuyitongish antu anch aspiritu a afu akwet mwom ni akutwish kuyiletin mayej ni milong yikwau. Satan ukat kuyidimb antu, yisu yimwing mu yilat ni yiman. Yehova ukat kuyifish nich antu apakishina kwisamb ni afu.—Kuvurik Yijil 18:10-12.