Shapitre Wa Kaad

Mutumbisha Yehova Mud Nzamb Umwing Kusu Wakin

1. Nzamb umwing kusu wakin udi nany?

BAIBEL ulondil anch ap anch kudi avud amenau mud anzamb, “kudi kusu ching Nzamb umwing, Tatuku.” (1 Korint 8:5, 6) “Nzamb umwing” winou udi Yehova, Sakatang wa yom yawonsu. (Kuvurik Yijil 6:4; Kujingunik 4:11) Yesu wamwisambina ndiy mud ‘Nzamb wam ni Nzamb wen.’ (Yohan 20:17) Wading witiyin yalonday Moses, muntu walonda pasak anch: “[Yehova, NW] udi Nzamb wakin. Kwikil kand mukwau.” (Kuvurik Yijil 4:35) Yehova upandaken kamu nakash yom yawonsu yikatau kusadil mulong wa kwifukwil, mud akish, antu ifukwidilau mud anzamb, ap mukankuny nend Satan Djabul, ‘nzamb wa mangand minam.’ (2 Korint 4:3, 4) Pakwez chinyim nau anzamb inay awonsu, Yehova ndiy, udi mud mwamutazukau kud Yesu, ‘Nzamb umwing kusu wakin.’ —Yohan 17:3.

2. Ov mutapu ik ufanyidina kwikal mwom wetu pitwilejina piur pa Nzamb?

² Antu akweta michim ya kujikitish ilejina piur pa ngikadil yipandakena kuwap ya Nzamb, ni yom yasalay ni yikezay kutusadil, adi kamu piswimp ni ndiy. Rukat rau mulong wa Yehova piriyila ni kujimb, akat kwiyov abachikinau kumutumbish ndiy. Mutapu ik? Mutapu umwing wa kumutumbish udi wa kuyilejamu antu akwau piur pend. Rom 10:10 ulondil anch, “kulond ku kan patok kudi antu, kwawiy kukez kupandilay muntu.” Mutapu ukwau wa kumutumbish udi kumwilikej ndiy mu kulond ni mu yisalijok. Efes 5:1 ulondil anch, “mwilakejany Nzamb mulong en udiany anend akatilay.” Chakwel kusal mwamu sens, tufanyidin kwijik ngikadil yakin ya Yehova.

3. Ov ngikadil ik yijim yikwetay Nzamb?

³ Mu Baibel mudi mazu mavud mamekeshina ngikadil yijikena ya Nzamb. Ngikadil yend yijim yinying yidi manangu, kutentam, dikand ni rukat. ‘Kudi ndiy kwawiy kudia manangu.’ (Job 12:13, NW) “Jinjil jend jawonsu jidi kutentam.” (Kuvurik Yijil 32:4) Udi kand “ni ukash mu dikand.” (Isay 40:26, NW) “Nzamb udi rukat.” (1 Yohan 4:8) Pakwez, mu ngikadil yijim yinying ya Nzamb, ov ngikadil ik yipandakena kuwap, yimekeshina mutapu wa Nzamb udiay?

“Nzamb Udi Rukat”

4. Ov yisu ngikadil ya Nzamb ya pa dishin yamubachika kutang maur ni divu ni yom yawonsu yikweta mwom?

⁴ Tushinshikinany yamubachika Yehova kutang mangand mawonsu ni yitang ya muspiritu yikweta manangu ni antu. Ov madinga manangu mend bil anch dikand diend? Bwat, ap anch Nzamb wasadila yom yiney, kiyadingap usu wamubachika kuyisal. Ni kutentam kwend kwadingap ni kwit anch angana chipan cha mwom. Pakwez, rukat rujim ra Nzamb rawiy ramubachika kwanganijan misangar ya kwikalaku mud muntu ukweta manangu nau antu akwau. Rukat ramubachika kwitekin rutong ra kwel anch antu in kuziyil afanyidin kushakam chikupu mu Paradis. (Disambishil 1:28; 2:15) Rukat ramubachika kand kukwat ditenchik dia kudiosh difish nich dieza piur pa antu mulong wa chitil cha Adam.

5. Kulondulijan ni Baibel, ngikadil ik yimekeshina untu wa Yehova, ni mulong wak?

⁵ Chawiy lel, mu ngikadil yawonsu ya Nzamb, ngikadil yimwing yipandakena nakash ridi rukat. Yidi kamu ngikadil yend yakinakin, ap untu wend win. Ap anch manangu mend, kutentam kwend ni dikand diend yidi ni yawiy ya usey, Baibel kalondilap ap pakemp anch Yehova udi umwing wa ngikadil yiney. Pakwez Baibel ulondil anch Nzamb udi rukat. Mwawiy, Yehova ndiy kamu untu win wa rukat. Rukat riner rimanyidin pa yijidik, rimanyidinap pa yovil bwat. Rukat ra Yehova ridi ritakedilau nich yijidik ya uyakin ni ya kutentam. Udi mulad umwing wa rukat ripandakena, mud muripanidinay Yehova amwinend chilikej. Rukat mud riner ridi chimekesh cha kuburen kamu choy ni akat kuribachikij chisu chawonsu nich yisalijok yimekena patok.

6. Ov chom ik chitutwishishina kumwilikej Nzamb ap anch utupandakenamu kujimb?

⁶ Yidi ngikadil yiney yiwamp ya rukat yitutwishishina kumwilikej Nzamb mud winou. Chitudia rufunfut, akad kuwanyidin, ni akayitil, tukutwish kutong anch tukutwishap ap pakemp kumwilikej Nzamb. Pakwez tal chilikej chikwau cha rukat rujim ra Yehova: Wij nawamp mimbu yetu ni kakatap kutwit kuwanyidin. Wij anch tudi kamu kulemp nich kuwanyidin katat. (Kuseng 51:5) Chawiy lel chilondidina Kuseng 130:3, 4 anch: “Anch ey wading ni kuvurik yisalijok yawonsu yiyimp, ing nany lel ukwiman kurutu kwey, [A Yehova, NW]? Pakwez dilikishil didi kudi ey.” Mwawiy, Yehova udi “Nzamb wa ranaken ni mwin riy, wakad kwovang ujim swa, wizwila sens nich rukat ni uyakin.” (Kubudik 34:6) “Mulong, Ey [Yehova, NW], udi muwamp, witenchikin mu kulikishin.” (Kuseng 86:5) Chikasikeshin mud ik! Chikasikeshin mud ik kumusadil Nzamb winou upandakena kuwap ni kuman ukalam wend wa rukat ni ranaken!

7. Ov mutapu ik tukutwisha kuman rukat ra Yehova mu midimu yend ya uumb?

⁷ Tukutwish kand kuman rukat ra Yehova mu midimu yend ya uumb. Tongin yom yiwamp yivud yapanay Yehova mulong wa musangar wetu, mud mikandu yimwing ya ufun, matikit, majiy, ni aturung. Watwinkisha yakudia ya mitapu ni mitapu yikwamushena chakwel kusangaresh maku metu ni kutusangaresh. Chikwau kand, Yehova watekaku kand yisalamb yivud nakash ya ufun ni ulombu ni yisak ya mitapu ni mitapu ya annam akwamushena. Wasala yom yikutwisha kuyisangaresh antu, ap anch kayisalap kusu mulong wa musangar. Chakin kamu, chitushicha mu mangand minam mayimp nich mwikadil wetu wa antu akad kuwanyidin, tukutwishap kusanger kamu sens uumb wend. (Rom 8:22) Pakwez tonginap bil yikutusadinay Yehova mu Paradis! Mwin kuseng ukat kutulej anch: “Ukat kuburil chikas chey ni kuwanyish rusot ra chom chawonsu chikweta mwom.”—Kuseng 145:16.

8. Ov chilikej ik chijim cha rukat ra Yehova chamekeshay mulong wetwetu?

⁸ Ov chom ik chidia chilikej chisutila kujimb cha rukat ra Yehova mulong wa antu? Baibel ukat kurumburil anch: “Mulong Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.” (Yohan 3:16) Ov Yehova wasala mwamu mulong wa uwamp wa muntu? Rom 5:8 wakwil anch: “Pakwez Nzamb wamekesha mutapu utukatilay etu, pitwading etu akayitil Kristu watufila.” Chakin, Nzamb wamutuma Mwanend uwanyidina panap pansh chakwel apana mwom wend mud yakupesh ya difut mulong wa kutukwol ku difish nich dia chitil ni rufu. (Mateu 20:28) Chinech chayifungwila antu amukatina Nzamb njil ya kutambul mwom wa chikupu. Cha musangar, rukat ra Nzamb ritandurikidin kud antu awonsu asotina kusal rusot rend, mulong Baibel utulejin anch: “Nzamb kakwetap kasolikany pakach pa antu, bwat. Ku michid yawonsu, muntu mwawonsu ukata kumulimish ni kusal yom yitentamina, Nzamb ukat kumwitiy.”—Midimu 10:34, 35.

9. Ov kwijik anch Yehova wamupana Mwanend mud difut piur petwetu kufanyidin kwikal ni usu ik padi etu?

⁹ Ov mulong wa kwel anch Yehova wamupana Mwanend mud difut, ni kufungul njil ya mwom wa chikupu, ufanyidin kwikal ni usu wa mutapu ik mu mwom wetu katat? Ufanyidin kujimbish rukat retu mulong wa Nzamb wakin, Yehova. Ufanyidin kand kutukwash kusot kumutesh Yesu, ntimesh wa Nzamb. “[Yesu] wayifila antu awonsu chakwel awiy adia aom kakwikalap kand aom mulong wa ayinau kusu, pakwez mom yau yikwikal yendendiy wayifila.” (2 Korint 5:15) Chidi cha musangar mud ik kulondul jinzau ja Yesu, mulong wadinga chilikej chimwing chiwamp mu kwilikej rukat ni riy ra Yehova! Chinech chimeken mu mazu malonday Yesu kud antu in kwikepish anch: “Ezany kudi am, en awonsu uziyilanya mulong wa yisend yikasikena ya mitapu ni mitapu, chad am nikez kukwambulany. Itwikany mpand yam, wingiyiyany am, chad mwamu mipim yen yikwiswedish, mulong am nishimpishin muchim ni kwitudish. Mulong mpand yam yiswakel kwitwik, ni chisend cham chipipel.”—Mateu 11:28-30

Mekesh Rukat Kud Antu Akwau

10. Ov mitapu ik yimwing tukutwisha kumekesh rukat mulong wa ambay netu in Kristu?

¹⁰ Ov mutapu ik tukutwisha kumekesh anch tukwet rukat mulong wa ambay netu in Kristu mud rukat rikwetau Yehova ni Yesu padi etu? Tal milad yivud tukutwisha kumekeshin rukat: “Rukat rikat kushimpish muchim, rudimukin kand. Rukat kirukwetap mukau, rukat kiribazilap, ap kwishimek. Rukat kirukwetap dichim, ap kwitong, kirukwovangap ujim swa. Rukat kirukumulaminangap muntu kuyip. Rukat kirukusangerangap mu kuyip, pakwez rikat kusanger mu uyakin. Kirikubangangakwap milong, rukat rikat kutukasikesh yisu yawonsu kulam ritiy retu, ni ruchingej retu, ni kushimpish kwetu kwa muchim. Rukat rushiching chikupu.” —1 Korint 13:4-8; 1 Yohan 3:14-18; 4:7-12.

11. Ov nany mukwau kand tufanyidina kumekeshin rukat, ni mutapu ik?

¹¹ Nany mukwau kand tufanyidina kumekeshin rukat, ni mutapu ik? Yesu walonda anch: “Yangany kudi antu a michid yawonsu, yikarumunany kwikal in kwilejam. Yibabatishany mu dijin dia Tatuku, ni dia Mwan, ni dia [spiritu, NW] utumbila. Yilejany kuziyil ku yom yawonsu yinakulejanya. Chawiy am nikez kwikal ni yenen machuku mawonsu, djat ni kwisudiel kwa mangand.” (Mateu 28:19, 20) Chinech chirumburikin kuyilej antu akad kal kwikal in Kristu rusangu ruwamp ra mangand masu ma Nzamb mezina kurutu oku ni makukarumunau kwikal paradis. Yesu walejana patok anch rukat retu rifanyidinap kusu kwimanyin kud antu tukweta nau yitiyij yimwing, mulong walonda anch: ‘Mulong lel, anch wayikatany anikatila en, difut ik lel ukwetany? In kulambwish yitad niyau kakat kusalip mwamu? Ni anch en wayilangwishany anamakwen kusu, uyipandakedilany pak antu akwau? Ov in mangand kakat kusalip mwamu?’—Mateu 5:46, 47; 24:14; Galatia 6:10.

‘Endil mu Dijin dia Yehova’

12. Ov mulong wak dijin dia Nzamb didi dia kusadil ching kusu kudiay ndiy?

¹² Mutapu ukwau wa usey wa kumutumbish Nzamb wakin kudi kwijik, kusadil ni kuyifundish antu akwau dijin diend dia pakampwil, Yehova. Mwin kuseng wamekesha rusot rend ra kashinsh anch: “Chakwel antu ijik anch, ey kamu, ukweta dijin Yehova, udi Ndiy Udia Piur pansh pawonsu.” (Kuseng 83:18, NW) Dijin Yehova dirumburikin “Ndiy Ukata Kwikadish.” Udi Mwin Rutong Mujim, ukata kwikadish chisu chawonsu yitonginay kwikal yakin. Ching kusu Nzamb wakin ndiy ukutwisha kamu kwipil dijin dined, mulong antu kakutwishap ap pakemp kwijik anch usu usadilau ukushiken. (Jakobu 4:13, 14) Yehova amwinend kusu ndiy ukutwisha kulond anch dizu diend “dikez kwikal ni kupandakan kwakin” mu chawonsu chiditumidinay. (Isay 55:11, NW) Avud akweting musangar pa kuman kapamp ka kusambish dijin dia Nzamb mu Mabaibel mau ni kwilej kurumburik kwa dijin dined. (Kubudik 6:3, NW) Pakwez akez kwisakin ronganyin riner ching anch ‘endil mu dijin dia Yehova . . . chikupu.’—Mike 4:5.

13. Kumwijik Yehova ni kwendil mu dijin diend kurumburikin chom ik?

¹³ Piur pa dijin dia Nzamb, Kuseng 9:10 ulondil anch: “Awiy ija dijin diey akukungamen padi Ey.” Chinech chirumburikin yivud kupandakanamu kusu kwijik kwa dijin Yehova, mulong chinech chirumburikinap anch tukungamedin padi ndiy. Kwijik dijin dia Nzamb kurumburikin kutesh ni kuman usey wa mutapu wa Nzamb udiay Yehova, kulimish wintakel wend, kuziyil yijil yend, kumukungamen mu yom yawonsu. (Jinswir 3:5, 6) Chilik chimwing, ‘kwendil mu dijin dia Yehova’ kurumburikin kwipan kud ndiy ni kwimekesh mud umwing wa in kumwifukwil end, kusadil chakin mwom wetu kwambatan nich rusot ra Nzamb. (Luka 10:27) Ov mwawiy usadiling?

14. Anch tusotin kumusadil Yehova chikupu, ov chom ik chikwau chitufanyidina kusal pa ndond pa kuchiman mud chisend?

¹⁴ Anch tusotin kumusadil Yehova chikupu, tufanyidinap kuchiman mud kusu chom chitushindidinau kusal. Mupostol Paul wamukasikesha Timote, muntu wadinga kal ni kumusadil Yehova mivu yivud anch: “Dandamen kwilej yom ya mwom wa kumulondul Nzamb.” (1 Timote 4:7) Mwom wa kumulondul Nzamb udiokil mu muchim wizwila nich kujikitish kudiay muntu wipanidinau. “Mwom wa kumulondul Nzamb” umekeshin kalimish mulong wa Yehova amwinend kamu. Ukat kumekesh kulamatin kwa rukat kud ndiy mulong wa kalimish kajim nakash mulong wendendiy ni jinjil jend. Ukat kutukwash kusot anch muntu mwawonsu amana dijin diend nich kalimish kakurukina. Tufanyidin kukudish kumulondul Nzamb mu mwom wetu anch tusotin kwendil chikupu mu dijin dia Yehova, Nzamb umwing kusu wakin. —Kuseng 37:4; 2 Pita 3:11.

15. Ov mutapu ik tukutwisha kumwifukwil ching kusu Nzamb?

¹⁵ Chakwel kumusadil Nzamb mu mutapu witiyidinay, tufanyidin kumwifukwil ching kusu ndiy, mulong ndiy udi ‘Nzamb umwing witina kumwifukwil ching ndiy.’ (Kubudik 20:5) Tukutwishap kumukat Nzamb ni kukat mangand minam mayimp makweta Satan mud nzamb pa chisu chimwing. (Jakobu 4:4; 1 Yohan 2:15-17) Yehova wij kamu nawamp mulad wa muntu upakishinay kwikal muntu ni muntu pakach petu. (Jeremiy 17:10, NW) Anch tukatin chakin kutentam, umen chinech ni ukez kutukwash kujijaman mu yoziu yetu ya dichuku ni dichuku. Chitukasikeshinay nich spiritu wend utumbila ukweta dikand, ukez kutukwash kupandakan uyimp upandakena kuvul mu mangand minam. (2 Korint 4:7) Ukez kutukwash kand kulam ruchingej retu rikash ra mwom wa chikupu mu paradis wa panap pansh. Ridi ruchingej ruwamp mud ik! Tuwapidil kamu kuman nich usey ruchingej riner ni kusot kamu kumusadil Nzamb wakin, Yehova, utwishishina mwom wa chikupu.

16. Ov chom ik ufanyidina kusal, pamwing ni mamiliyon ma antu akwau?

¹⁶ Mamiliyon ma antu pa divu pawonsu itiyidin nich musangar diladikij dia mwin kuseng wafunda anch: “A, tumushimanany [Yehova, NW] niyamam, tutumbishany dijin diend pamwing!” (Kuseng 34:3) Yehova ukwitin kwikal pakach pa tunan twa antu akata kumutumbish ayila mu kuvulijan mu michid yawonsu.

Misamb ya Kuchirikin

• Ov Yehova udi muntu wa mutapu ik? Ov mutapu ik tukata kwisakin kwov nawamp kurumburik kwa ngikadil yend?

• Ov mutapu ik tukutwisha kuyikwash antu akwau kwilej uyakin piur pa Nzamb?

• Kumwijik Yehova ni kwendil mu dijin diend kurumburikin chom ik?

[Chipich chidia pa paj wa 14]

Yehova, mu rukat rend rijim, ‘ukez kuburil chikas chend ni kuwanyish rusot ra chom chawonsu chikweta mwom’