Shapitre Wa Musamban

Mulong Ututadila Etu Awonsu

1, 2. (a) Ov mulong ik wasarumunay Satan mu Eden? (b) Ov mulong winou wadinga wambaten nchik nich yalonday?

KUDI mulong umwing ujim ukutadila wezap kal kwikal ni antu. Mutambu uwimedina mu mulong winou wawiy ukeza kulejan mutapu makwikala machuku mey ma kurutu ma chikupu. Mulong winou wabudikina pa chisu chasambisha wimbwambol mu Eden. Pa chisu chinicha Satan wamwipula Ev anch: “Ov, komb, Nzamb wakulejinany anch: Kangal wadiany mitond ya mu chir?” Ev wamwakula anch Nzamb walondil ya mutond umwing anch: “Kangal wadiany mabuj ma mutond udia mukach mwa chir . . . chamwamu ukufany.” Chad kapamp kamwing Satan wamufunda kamu Yehova kwikal mwin makasu, ni kulond anch mwom wa Ev ap wa Adam wadingap wengamidina pa kuziyil kwau kud Nzamb. Satan walonda anch Nzamb wadinga ni kuyijindjikin yitang yend chom chimwing chiwamp—ukaliweny wa kwitekil yany yau ayinau mu mwom. Satan walonda anch: “Nzamb wij anch dichuku diukez kudiany mabuj minima, mes men makez kuburik, niyen ukez kwikalany mudi Nzamb, in kwijik kuwap ni kuyip.”—Disambishil 3:1-5.

² Chakin, Satan wadinga ni kulond anch antu akutwish kwikal kamu nawamp ang ikwatin ayinau mipak pa ndond pa kuziyil ku yijil ya Nzamb. Chawiy lel, watadikisha mulad wa Nzamb wa kuyikel. Chinech chavuvurisha mulong umwing ujim nakash piur pa ukaleng wa Nzamb wa mangand mawonsu, chawiy kulond, mbil yend ya kuyikel. Wavuvurisha chipul: Ov chom ik chipandakena kuwap mulong wa antu, mutapu wa kuyikel wa Nzamb bil anch winyikel wakad kwengamin padi ndiy? Katat, Yehova wela kuyijip Adam ni Ev, pakwez chinech chelap kupwish mulong wa mbil ya Nzamb ya kuyikel mu mutapu umwing uwamp. Mu kushil chisak cha antu chisu chimwing chilemp mulong wa kuya kurutu, Nzamb wela kumekesh kamu patok yibudikin ya want ipau pantaliken ni ndiy ni yijil yend.

3. Ov mulong ik ukwau wavuvurishay Satan?

³ Kurishish kwa Satan pantaliken ni mbil ya Yehova ya kuyikel kwimanyinap kusu nich yasuta mu Eden. Watadikisha kand kushinshaman kwa antu akwau pantaliken ni Yehova. Chinech chikala kamu piswimp chikunku cha kaad cha mulong winou. Kutadikish kwend kwaya kamu kulemp mutapu wa kuyibombinamu an a Adam ni Ev ni an awonsu a muspiritu a Nzamb, ap kand Mwan mukatish wa Yehova. Chilikej, pa chirung cha Job, Satan walonda nich dizaz anch antu akata kumusadil Yehova akat kumusadil, chidiap mulong wa rukat rimukatinau nich Nzamb ni mutapu wend wa kuyikel, pakwez mulong kusu wa yisakin yau ya choy. Washinshikinap anch ang ayitek mu yakamish yikash, awonsu akuwil mu mupit wa maku mau ma choy. —Job 2:1-6, NW; Kujingunik 12:10.

Chamekeshina Chishimu

4, 5. Ov yom ik yimekeshina chishimu piur pa muntu kutakel jinzau jend amwinend?

⁴ Chom chijim mu mulong wa ukaleng wa mangand mawonsu chawiy ech: Nzamb kayitangap antu chakwel ishakamina pakad kwengamin pa winyikel wend ni kutwish nawamp. Mulong wa kuwap kwau wayitanga chakwel engamina pa yijil yend yitentamina. Muprofet Jeremiy witiyija anch: “Nij nawamp, O Yehova, anch njil ya muntu udiokila ku rufunfut yidiap kudiay ndiy. Chidiap kud muntu ukata kwend kutakel rizau rend. Mpupa, O Yehova.” (Jeremiy 10:23, 24 NW) Komb Dizu dia Nzamb dikasikeshin anch: “Mukungamena [Yehova, NW] ni muchim wey wawonsu. Kangal wachingej ronganyin rey amwiney.” (Jinswir 3:5) Mud kamu Nzamb chayisalay antu anch aziyila ku yijil yimwing ya ku mujimbu chakwel kushal aom, wateka kand yijil ya kuwap ni kuyip, chakwel ang ayiziyil yijil yiney akez kwikadish chisak chendila nawamp pamwing.

⁵ Chidi kamu patok, Nzamb wading wij anch chisak cha muntu chikez katwishap kwitakel achinach pakad winyikel wend. Antu itekidin chamwamu yitenchik kushalijan ya chipolitik, ya wingend a mushing, ni ya chirelijon, chakwel kupakij kwikal nich want ipau pantaliken ni winyikel wa Nzamb. Kushalijan kwinoku kwayishikijin antu ku ukankuny wakad kupim umwing ni mukwau, chom chibudishina ubaj, njit, ni rufu. ‘Muntu ukuman mar mu makas ma ukweta usu.’ (Mulej 8:9) Yiney yawiy kwau yamekena mu chishimu chawonsu cha muntu. Mud mwatakelau kulond mu Dizu dia Nzamb, antu ayimp ni in makasu adandamedin “kuya kurutu nakash mu kuyip.” (2 Timote 3:13) Ni mivu chitot ya 20, yamana kukul kuyila kurutu kwa chisak cha muntu mu milong yitadila siyans ni yapu, yamana mar mapandakena mezap kal kwikalaku. Mazu ma Jeremiy 10:23 (NW) meza kamu kwikal makin—antu kayitangap mulong wa kutakel jinzau jau ayinau.

6. Ov mutapu ik ukupwishay Nzamb katat kamu ak mulong wa want ipau pantaliken ni ndiy?

⁶ Yibudikin yiyimp ya machuku mavud ya want ipau pantaliken ni Nzamb yamekeshin kamu chikupu anch winyikel wa antu ukutwishap ap pakemp. Winyikel wa Nzamb yawiy kusu njil yimwing ya musangar, uumwing, ukash wa mujimbu ni mwom. Ni Dizu dia Nzamb dikat kumekesh anch kulikidil kwa Yehova kwa want ipau wa winyikel wa muntu kwashej kal piswimp ni nsudiel yaku. (Mateu 24:3-14; 2 Timote 3:1-5) Mu chisu chiswimp, ukez kutenchik chikas mu milong ya antu chakwel kutek winyikel wend pa divu pawonsu. Uprofet wa Baibel ulondil anch: “Pa chisu cha in kutakel inay [mant ma antu madiaku katat], Nzamb wa mwiur ukez kukasikesh want ukwau [mwiur] wakad kwez kwikal nich disudiel chikupu. Kakez kuukwatap want winou [winyikel wa antu ukez kuyikelap kand divu]. Pakwez ukez kushesh mant makwau mawonsu [madiaku nlel], chad wawiy ukez kushakam chikupu.”—Daniel 2:44.

Kupandin mu Mangand Masu ma Nzamb

7. Winyikel wa Nzamb piukudiosha winyikel wa muntu, ov nany ukeza kupand?

⁷ Winyikel wa Nzamb piukudiosha winyikel wa antu, ov nany ukeza kupand? Baibel wakwil anch: “Mulong antu atentamina [antu akwatina nich makas maad mbil ya Nzamb ya kuyikel] akez kaswan ngand, ni antu a kashinsh akez kashakamamu, pakwez antu ayimp [antu alikina kukwat ni makas maad mbil ya Nzamb ya kuyikel] akez kayidiosh mwi ngand.” (Jinswir 2:21, 22) Chilik chimwing, nfund-a-kuseng walonda anch: “Mulong kwashal kal kachisu kakemp ni antu ayimp kakwikalikup kand . . . Mwin kutentam ukez kaswan ngand, ukez kashakamamu chikupu.”—Kuseng 37:10, 29.

8. Ov Want ukez kuchidij nchik mbil ya Nzamb ya kuyikel?

⁸ Kupwa kwa kushesh ditenchik dia Satan, Nzamb ukez kulet mangand mend masu, mangand makeza kunongish kamu shitit ubaj wawonsu, jinjit, uzweny, mar, mayej, ni rufu yayitekina antu mu uswik mu tunan twa mivu. Baibel ushimunin kamu nawamp yiyukish yiney yiyichingedina antu in kuziyil anch: “Ndiy [Nzamb] ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan, mulong yom yikur kiyamekanap kand.” (Kujingunik 21:3, 4) Kusutil winyikel wa Want wend wa mwiur ukutakelay Kristu, Nzamb ukez kuchidij mbil Yend ya kwikal Mukaleng wa Mangand Mawonsu, chawiy kulond, Nyikel wetu. —Rom 16:20; 2 Pita 3:10-13; Kujingunik 20:1-6.

Mutapu Wakwilau pa Mulong Winou

9. (a) Ov antu ashala ashinshamena kud Yehova adinga ni kuman mutapu ik dizu diend? (b) Ov mutapu ik wamekeshay Noa kushinshaman kwend, ni mutapu ik tukutwisha kwisakin ku chilikej chend?

⁹ Kudiosh kamu pasak, kwadinga amakundj nau amband ashinshamena amekesha kushinshaman kwau kud Yehova ni kumulimish mud Mukaleng wa Mangand Mawonsu. Ading ij anch mwom wau wading wengamidin pa kumutesh ni kumuziyil ndiy. Mwamu kamu mwadingay Noa. Chawiy lel Nzamb wamuleja Noa anch: “Katat musul wa yom yawonsu wez kal . . . Chawiy ey, Noa, sal waat.” Noa waziyila ku umutakel wa Yehova. Ap anch ayibabesha, antu akwau a pa chirung chinicha adinga ni kushakam mud kwadingap chom ap chimwing chisu chela kushiken. Pakwez Noa wasonga waat umwing ujim ni kudandamen kukwatikan nich mudimu wa kuyishimunin akwau jinjil jitentamina ja Yehova. Rusangu ridandamedin kulond anch: “Noa wasala mudi mwamulejilau yom yawonsu kudi Nzamb, ndiy wayisala.”—Disambishil 6:13-22; Hebereu 11:7; 2 Pita 2:5.

10. (a) Ov mutapu ik wakwatau Aburaham ni Sara nich makas maad ukaleng wa mangand mawonsu wa Yehova? (b) Ov mutapu ik tukutwisha kwisakin yilikej ya Aburaham ni Sara?

¹⁰ Aburaham nend Sara ni yawiy adinga yilikej yimwing yiwamp ya antu akwatina nich makas maad ukaleng wa mangand mawonsu wa Yehova, adinga ni kusal yawonsu yadingay ni kuyilej asala. Ashakamanga mu Ur wa in Kalideya, musumb umwing wa dipit. Pakwez Yehova pamulejay Aburaham kuya ni kushakam mwi ngand yakad ndiy kwijidin, Aburaham “watumbuka, waya, mudi mwamulejau kudi [Yehova, NW].” Sara wadinga chakin kamu ni mwom umwing uwamp nakash—chikumbu, arund, ni anamakwend. Pakwez, wamuziyila Yehova ni nfumwend ni waya mwi ngand ya Kanan, ap anch kadingap wija mikadil yadinga ni kumuchingel kwinikwa.—Disambishil 11:31–12:4; Midimu 7:2-4.]

11. (a) Ov mu yisu ik yimwing yakwatay Moses ukaleng wa mangand mawonsu wa Yehova nich makas maad? (b) Ov mutapu ik ukutwisha kutukwash chilikej cha Moses?

¹¹ Moses ni ndiy wadinga muntu umwing wakwata nich makas maad ukaleng wa mangand mawonsu wa Yehova. Ni wachisala mu yisu yimwing yikash nakash—mu kurish mpal ni mpal kamu nend Farao wa Idjibit. Chidiap anch Moses wadinga ni kwichingejin amwinend. Pakwez, wadinga ni kwidjidjek mulong wa ukaliweny wend wa kutwish kulond nawamp. Chawiy lel wamuziyila Yehova. Nich ukwash wa Yehova ni wa mwanamakwend, Aron, Moses wamuleja Farao mwin kuchinchik muchim dizu dia Yehova. Ap kand an amwing a Isarel adinga ni kumuchirol Moses nayimp nakash. Pakwez, Moses wasala chom chin chawonsu chamulejau kud Yehova nich kushinshaman, ni kusutin kud ndiy kwawiy kwayikwodilau in Isarel kudiokal mu Idjibit.—Kubudik 7:6; 12:50, 51; Hebereu 11:24-27.

12. (a) Ov chom ik chimekeshina anch kushinshaman kud Yehova kwitin yivud kupandakanamu kusu kusal yafundishay Nzamb mu mukand? (b) Ov kutesh kwa mulad winou wa kushinshaman kutukwashin nchik kusadil 1 Yohan 2:15?

¹² Antu adinga ashinshamena kud Yehova kadingap ni kutong anch yawonsu yadingau ni kuyit yading kuziyil ching mazu mafundinau ma Nzamb. Mband wa Potifar papakijay kumukakijan Josef chakwel asala nend masandj, kwadingap chijil cha Nzamb chifundinau chadinga ni kujidik kwend masandj. Pakwez, Josef wading wij ditenchik dia uruu diatekay Yehova mu Eden. Wading wij anch kulal ni mband wayen kukumusangareshap Nzamb bwat. Josef kasotap kumupim Nzamb mulong wa kwijik ang ukutwish kushik kwisu mu kwikal mud in Idjibit. Walondula njil yitiyinay Yehova mu kutongin piur pa yisal ya Nzamb kud antu akwau, ni mu kusadil nich mushiku yajinguninay kwikal rusot ra Nzamb. —Disambishil 39:7-12; Kuseng 77:11, 12.

13. Ov mutapu ik wamekanay Djabul kwikal mwin makasu piur pa (a) Job? (b) in Hebereu asatu?

¹³ Ap anch ayitekap nchik mu choziu chikash, antu amwija chakin Yehova kakatap kudiokal kudi ndiy. Satan wadimbana anch, Job ang washadish yom yivud yadingay nich ap ukash wend wa mujimbu, ap ndiy—muntu walondilay Yehova nawamp—ukutwish kumutun Nzamb. Pakwez Job wamekesha anch Djabul wadinga mwin makasu, ap anch Job amwinend kadingap wija mulong wak yipupu yading ni kumushiken. (Job 2:9, 10, NW) Kupwa kwa yitot ya mivu, nich usu uchisadinay mulong wa kushiken rutong rend, Satan wamubachika mwant umwing uswejina wa Babilon kuyifunyin nich ulabu ansand in Hebereu asatu kwa kuyijip mu ruteng rimwing ra kasu anch alika kwifukwil mukish watekay mwant. Chayishindilau kutond pakach pa kuziyil mbil ya mwant ni chijil cha Yehova pantaliken ni kwifukwil akish, awiy amekesha kamu anch adinga ni kumusadil Yehova ni ndiy wadinga Mwant wau Upandakena piur. Kushinshaman kwau kud Nzamb chawiy chom chadinga nich usey kupandakan mwom wadingau nich! —Daniel 3:14-18.

14. Ov mutapu ik chitwishikina kud etu antu akad kuwanyidin kumekesh anch tudi ashinshamena chakin kud Yehova?

¹⁴ Ov tukatwil mu yilikej yiney anch chakwel kwikal ushinshamena kud Yehova, muntu ufanyidin kwikal uwanyidina ap anch muntu usadila chilim wakangany kal kamu rawonsu? Bwat kwau! Baibel utulejin anch yisu yimwing Moses wadinga ni kurumbuk. Ap anch Yehova kasangarap, pakwez kamulikap Moses. Apostol a Yesu Kristu ni yawiy adinga ni kuziok kwau. Chijay kuburen kuwanyidin kwetu kutwaswana, Yehova ukweting musangar anch tudiwilap ku kukat rusot rend mu mitambu yin yawonsu. Ang mulong wa kuziok twasal uyimp, chidi cha usey anch tukarumuka nich muchim utok ni kulik kwikal ni chaku cha kusalang uyimp. Mu mutapu winou tukat kumekesh kamu anch tukatin chakin yilondilay Yehova anch yidi yiwamp ni kukis yilejenay anch yidi yiyimp. Pa dishin dia ritiy retu mu yakupesh ya Yesu yikweta usey wa kudiosh yitil, tukutwish kwikal ni mwikadil wishitwila kurutu kwa Nzamb. —Amos 5:15, NW; Midimu 3:19; Hebereu 9:14.

15. (a) Ov nany pakach pa antu awonsu walama kushinshaman kuwanyidina kud Nzamb, ni chinech chamekesha chom ik? (b) Ov mutapu ik utukwashina yasalay Yesu?

¹⁵ Pakwez, ov chitwishikin anch kuziyil kuwanyidina ku ukaleng wa mangand mawonsu wa Yehova kwikala kusu kuyikasikedina antu? Chakul ku chipul chinech chadinga kamu mud “ujindj” piswimp mu mivu 4 000. (1 Timote 3:16) Ap anch amutanga uwanyidina, Adam kaletap chilikej chiwamp cha kwipan kwa winzamb. Chawiy lel nany wela kutwish? Chakin kadingap ap umwing wa anend akayitil. Muntu kusu umwing wela kutwish kuchisal wadinga Yesu Kristu. (Hebereu 4:15) Yasalay Yesu yamekesha anch Adam, muntu wadinga ni mikadil yimwing yiwamp nakash, wela kutwish kulam kushinshaman kuwanyidina ang wasota kuchisal. Kurumbuk kwadingap mu midimu ya uumb ya Nzamb bwat. Komb lel Yesu Kristu udi chilikej tusotina kulondul mu kumekesh kuziyil kwetu yijil ya Nzamb pakwez kand mu kwipan kwa muntu ipend kud Yehova, Mwin Mangand Mawonsu.—Kuvurik Yijil 32:4, 5.

Ov Ndond ik Twimanyidina?

16. Ov mulong wak tufanyidina chisu ni chisu kubabal piur pa mwikadil wetu pantaliken ni ukaleng wa mangand mawonsu wa Yehova?

¹⁶ Mulong winou wa mangand mawonsu umutadil umwing ni umwing pakach petu nlel. Ang twalondin kamu patok anch tudi ku mutambu wa Yehova, twikal kal diloz dia Satan. Ukat kulet milad yawonsu ya yikokujol ni ukudandamen kusal mwamu kushik ni kwisudiel kwa ditenchik diend diyimp dia yom. Tufanyidin kubabal. (1 Pita 5:8) Ngikadil yetu yikat kumekesh pisu twimanyidina mu mulong winou ujim wa piur nakash wa ukaleng wa mangand mawonsu wa Yehova ni mulong ukwau wa kaad wa kushinshaman kud Nzamb kwikalap nchik kupimik. Tukutwishap kuman ngikadil yakad kushinshaman mud chom chimwing chakad kwau usey mulong kusu yipalangedin kwawonsu mu mangand. Chakwel kushal ashinshamena tufanyidin kwikasikesh kusadil yijil yitentamina ya Yehova mu milong yawonsu ya mwom.

17. Ov yom ik tumena pinap piur pa disambishil dia makasu ni wij yifanyidina kutubachik kuyipuk?

¹⁷ Chilikej, tukutwishap kumwilikej Satan, udia “sakudimban.” (Yohan 8:44) Tufanyidin kwikal ni ukinakin mu yawonsu tusadila. Mu ditenchik dia Satan, chisu chivud ansand kadingap kwau ni ukinakin pantaliken nau anvajau. Pakwez ansand in Kristu akat kwipukang chinech, ni kumekesh chad lel anch kulond kwa Satan anch antu a Nzamb akez kusha kushinshaman kwau anch ikal mu kupimik kudi kwa makasu. (Job 1:9-11, NW; Jinswir 6:16-19) Chawiy lel kuding yaku ya wingend-a-mushing yikutwisha kumekesh anch muntu udi ku mutambu wa “sakudimban” pa ndond pa kwikal ku mutambu wa Nzamb wa uyakin. Yiney, yidi yaku tuwapidila kwipuk. (Mike 6:11, 12) Chikwau kand, wij kafanyidinap kuuyingish ap pakemp, ap anch muntu wiyina udi mu kuswir ap anch wiyinau yom udi mpich. (Jinswir 6:30, 31; 1 Pita 4:15) Ap anch wij chidi chaku chimwing chipalangedina kwawonsu tushicha ap anch yiyinau yidi yom yimwing yakad usey, wij udi chinyim kamu nakash nich yijil ya Nzamb. —Luka 16:10; Rom 12:2; Efes 4:28.

18. (a) Kwisudiel kwa Winyikel wa Mivu Kanan wa Kristu, ov kupak ik kukezau kuyipak antu awonsu? (b) Ov chaku ik tufanyidina kukudish katat?

¹⁸ Mu Winyikel wa Mivu Kanan wa Kristu, Satan ni ademon end akez kwikal mu dibuku diakad kusul, ni kakutwishap kwikal nich usu padi antu. Dikez kwikal diswedish mud ik! Pakwez kupwa kwa mivu kanan, akez kuyilikishaku mu kachisu kakemp. Satan nau antu in kumulondul ndiy akez kuyirishish antu ayerilau alamina kushinshaman kwau kud Nzamb. (Kujingunik 20:7-10) Ang chidi kud etu kwitapil dilau dia kushakam pa chirung chikezau kumulikishaku Satan, ov mutapu ik tukeza kusal piur pa mulong winou utadila mangand mawonsu? Mulong antu awonsu akez kwikal awanyidina, chisal chin chawonsu cha kuburen kuziyil akez kuchishinshikin ni chikez kuletish disheshik dia chikupu. Chidi cha usey mud ik anch tukudisha katat chaku cha kuziyil umutakel wawonsu utwinkinay Yehova, chikala kusutil ku Dizu diend ap kusutil ku dirijek diend! Anch twasal mwamu, tukat kumekesh kwipan kwetu kwa kashinsh kud ndiy mud Mukaleng wa Mangand Mawonsu.

Misamb ya Kuchirikin

• Ov mulong ik ujim ututadila etu awonsu? Ov mutapu ik twashikena kwiyandjik mu mulong winou?

• Ov mutapu ik wijikena nawamp wamekeshau amakundj nau amband a pasak kushinshaman kwau kud Yehova?

• Ov mulong wak chidia cha usey kumutumbish Yehova kusutin ku ngikadil yetu ya dichuku ni dichuku?