Shapitre Wa Dikum

Want “Wakad Kwez Kwikal ni Disudiel”

1. Ov yinship ya mangand mu chishimu chawonsu cha muntu yimekeshin chom ik?

DICHUKU ni dichuku, yinship ya mangand yimekeshin anch antu kamenap musangar nich kulikang ukaleng wa Yehova ni kupakish kwiyikel ayinau. Kwikil ditenchik ap dimwing dia winyikel wa muntu dialetinap kal kuwap kwakad kasolikany kud antu. Ap anch antu akudishin kal ronganyin rau ra milong ya siyans mu mutapu umwing wa piur nakash, katwishinap kwau kupwish mayej ap kudiosh rufu, ap kusu mulong wa muntu umwing. Winyikel wa muntu ukangeny kupwish njit, ubaj, chisum, kukatul milamu, ap uzweny. winyikel uyimeshina antu mar uchidandamedin kuyikel mwi ngand jivud. (Mulej 8:9) Ukaliweny wa mayaz (yapu), ris, ni kuburen manangu yidi yom yiwejidina ku kuyipish divu, mem, ni chipepil. Kutakel kuyimp kwa milong ya kwisak kwa in kutakel kukat kuyikadikesh antu avud mutapu wa kwel anch amanap yom yikwetau kamu nich kuswir mu mwom. Kuyikel kwa muntu mu tunan twa mivu kumekeshin kamu patok anch: “njil ya muntu udiokila ku rufunfut yidiap kudiay ndiy. Chidiap kud muntu ukata kwend kutakel rizau rend.”—Jeremiy 10:23, NW.

2. Ov mutapu ik umwing kusu wa kupwish milong yikwetau antu?

² Ov wisu mutapu wa kupwish milong yiney? Want wa Nzamb wayilejay Yesu in kwilejend kulembidil anch: “Want wey weza. Rusot rey arusala pansh mudi mwiur.” (Mateu 6:9, 10) Want wa mwiur wa Nzamb aurumburil mu 2 Pita 3:13 mud “maur masu,” mafanyidina kuyikel “mangand masu,” chawiy kulond anch, chisak cha antu atentamina. Want wa Nzamb winou wa mwiur wadinga kamu ni usey nakash, chawiy Yesu chausadilay kwikal mutu wa mulong wa kusambish mu kulejan kwend. (Mateu 4:17) Walejana ndond yifanyidina kwikal want winou mu mwom wetu, palonday anch: ‘Pakwez sambelany bil kusurib want wend ni kutentam kwend, chawiy lel yom yawonsu akez kananzukeshilip.’—Mateu 6:33, TMK.

3. Ov mulong wak kwilej piur pa Want wa Nzamb kudi kupandakena usey katat?

³ Kwilej piur pa Want wa Nzamb kudi kamu kupandakena usey katat, mulong Want winou ukusambish kuyikel mulong wa kukarumun chikupu winyikel wa divu dined. Daniel 2:44 ulejen anch: “Pa chisu cha in kutakel inay [ winyikel uyikedila katat], Nzamb wa mwiur ukez kukasikesh want ukwau [mwiur] wakad kwez kwikal nich disudiel chikupu. Kakez kuukwatap want winou [antu kakez kuyikelap kand divu], pakwez ukez kushesh mant makwau mawonsu [madiaku nlel], chad wawiy ukez kushakam chikupu.” Chawiy lel, Want ukez kushikij machuku minam ma nsudiel kwisudiel kwin kamu nich kushesh ditenchik diyimp dined dia yom diawonsu dia kabuj. Winyikel wa divu nich Want wa mwiur ukezap lel kwikal wa kufil. Tuwapidil kwikal in kujikitish mud ik pa kuman anch dipandish dikuleta want winou didi kamu piswimp katat!

4. Piur pa Want, ov chom ik chamekana mwiur mu muvu wa 1914, ni mulong wak chidia cha usey kud etu?

⁴ Mu muvu wa 1914, Kristu Yesu amuteka mud Mwant ni kumwinkish ulabu wa ‘kuyikel pakach pa akankuny [nend].’ (Kuseng 110:1, 2) Mu muvu winiwa kand, “machuku ma kwisudiel” ma ditenchik dined diyimp dia yom masambisha. (2 Timote 3:1-5, 13) Pa chirung chawiy chimwing, yinship yamanay Daniel mu chishimushimu cha uprofet yasambisha kamu chakin mwiur. “Mukurump wa Machuku,” Yehova Nzamb, wamwinka Mwan a muntu, Yesu Kristu, “usu wa kuyikel ni uyaj, ni want, chakwel antu a michid yawonsu, ni a mitapu yawonsu, ni a jindim jawonsu amusadil ndiy.” Chadingay ni kushimunin chishimushimu, Daniel wafunda anch: “Kuyikel kwend kikukez kupwap, ni want wend ukez kwikal wa mivu ni minang.” (Daniel 7:13, 14) Chidi kusutil ku Want winou wa mwiur utekinau mu makas ma Kristu Yesu kukezay Nzamb kuyitwishish antu akatina kutentam kwikal ni yom yivud yiwamp yatonginay kuyinkish payitekay anvajetu a kusambish mu Paradis.

5. Ov yom ik yikwau yikemp yikemp yitadila Want yidia kamu ya usey kud etu, ni mulong wak?

⁵ Ov usotil kwikal mwan a ngand ushinshamena wa Want? Anch mwamu usotila, ukusanger kamu nakash ditenchik ni kuyikel kwa winyikel winou wa mwiur. Ukusot kwijik yisadila want winou katat, yiukusala mu machuku ma kurutu, ni yikwitinau ey kusal. Piushinshikidina kamu Want piswimp nakash, kujikitish kwey mulong wa Want winou kufanyidin kujimb. Ang witiy kamu winyikel winou, ukez kwikal uwanyishinau kamu nawamp mulong wa kuyilej antu akwau piur pa yom yipandakena kuwap yikusala Want wa Nzamb mulong wa antu in kuziyil. —Kuseng 48:12, 13.

Anyikel a Want wa Nzamb

6. (a) Kulondulijan ni Mifund, Want wa Umesia chidi chimekesh cha win-mangand wa nany? (b) Yitwilejina piur pa Want yifanyidin nchik kwikal ni usu padi etu?

⁶ Kwonganyin mud kwinoku kutwijikishin bil anch Want wa Umesia chidi chimekesh cha win-mangand wa Yehova amwinend. Yehova ndiy wapana “winyikel ni uyaj ni want” kud Mwanend. Kupwa kwa Mwan a Nzamb kutambul ulabu wa kusambish kuyikel mud Mwant, mazu madiokila mwiur malonda kamu chifanyidina anch: “Want wa mangand wikal kal katat wa Nsalejetu [Yehova Nzamb] ni wa Kristu wend Uzizidilau Many, ndiy [Yehova] ukez kuyikel chikupu ni chikupu!” (Kujingunik 11:15) Chawiy lel yawonsu yitumena piur pa Want winou ni yom yiusadila yikutwish kutwikadish piswimp ni Yehova amwinend. Yitwilejina yifanyidin kwandjik mudi etu rusot ra kuziyil win-mangand wend chikupu.

7. Ov mulong wak chidia kamu cha musangar wa pakampwil kud etu anch Yesu Kristu ikala Nswan Mulapu wa Yehova?

⁷ Shinshikin kand mulong wa kwel anch Yehova wamuteka Yesu Kristu pa chipwan mud Nswan Mulapu wend. Mud Mwant wa Mudimu wasadilay Nzamb mulong wa kusal divu nau antu, Yesu wij maswir metu nawamp kutusut etu. Chikwau kand, kudiosh kwisambishil kwa chishimu cha muntu, wamekesha ‘kusanger kand mu antu awonsu.’ (Jinswir 8:30, 31; Kolosay 1:15-17) Rukat rend ripandaken kujimb mulong ndiy weza amwinend pa divu ni kupan mwom wend kwikal difut mulong wetwetu. (Yohan 3:16) Wawiy mutapu watutekinay njil ya kukwolik ku chitil ni rufu ni kutwinkish mutapu wa kuman mwom wa chikupu.—Mateu 20:28.

8. (a) Chinyim nich winyikel wa ukamuntu, ov mulong wak winyikel wa Nzamb ukez kwikal wa chikupu? (b) Ov urund ik ukwetay “kashalapol wakin ukweta manangu” ni winyikel wa mwiur?

⁸ Want wa Nzamb udiap winyikel umwing uziyina, wa chisu chikemp. Uchikupu wau aukasikeshidin nich mulong wa kwel anch Yehova amwinend kakufangap bwat. (Abakuk 1:12, NW) Pakwez chinyim nau ant a ukamuntu, Yesu Kristu, muntu winkishinau want kud Nzamb, ni ndiy kakutwishap kufa. (Rom 6:9; 1 Timote 6:15, 16) Kushakam pamwing nend Kristu pa yipwan ya mwiur pakez kwikal antu akwau 144 000, atushalapol ashinshamena a Nzamb adiokila mu “michid yawonsu, ni antu a jindim jawonsu, ni a majuku mawonsu, ni a mangand mawonsu.” Antu inay ni yawiy ayinkishin mwom wakad kutwish kufa. (Kujingunik 5:9, 10; 14:1-4; 1 Korint 15:42-44, 53) Avud pakach pau adi kal mwiur, ni akemp ashadilaku achidia panap pansh awiy asadila chisak cha katat cha “kashalapol wakin ukweta manangu,” chisak chipalangeshina nich kushinshaman milong ya Want winou pinap. —Mateu 24:45-47.

9, 10. (a) Ov Want ukez kudiosh yom ik yikata kulet kasolikany ni kujondish? (b) Ang tusotinap kwikal akankuny a Want wa Nzamb, ov yirijek ik tufanyidina kamu kwipuk?

⁹ Katat kamu, pa chisu chitondinay, Yehova ukutum usu wend wa kushikij dirumburish ukusambisha mudimu wa kutokish divu. Akez kuyishesh chikupu antu alikina kwijik winyikel wend ni apipejina yitenchik ya rukat yakwatinay kal kusutil kud Yesu Kristu. (2 Tesalonik 1:6-9) Dined dikez kwikal kamu dichuku dia Yehova, chisu tuchingedina kudiosh kamu pasak mulong wa dichidij diend mud Nyikel wa Mangand Mawonsu. “Talany! Dichuku dia Yehova dikat kwez, diamushena nich ujim, . . . mulong wa kunongish akayitil [mwi ngand].” (Isay 13:9, NW) “Dichuku dinidia didi dichuku dia kadimu, dichuku dia mar ni yakamish, dichuku dia chinzwij ni dia kusheshik, dichuku dia mididim ni mididim yikurukina, dichuku dia madj ni dia mididim yikash.”—Sofoniy 1:15, NW.

¹⁰ Difukwil diawonsu dia makasu ni winyikel wawonsu wa antu ni amasalay au, adingau ni kutakel kud nyikel muyimp wakad kumekan ku mes wa mangand minam, akez kuyishesh chikupu. Awonsu amekeshina anch adi ku mutambu wa mangand minam nich kulondul mwom umwing wa choy, wa rubabek, wa masandj akez kuyishesh. Satan nau ayilembil end kakezap kand kwikal ni mutapu wa kwikal pamwing nau antu, mulong akuyikas mivu kanan. Want wa Nzamb ukez chad lel kushinshikin kamu nawamp milong yawonsu ya pa divu. Dikwikal diswedish mud ik kud antu awonsu akatina kutentam! —Kujingunik 18:21, 24; 19:11-16, 19-21; 20:1, 2.

Mutapu Ukushikena Jintong ja Want

11. (a) Ov Want wa Umesia ukuwanyish nchik rutong ra Yehova mulong wa divu? (b) Ov winyikel wa Want ukurumburik chom ik kud antu akushakama pa divu?

¹¹ Want wa Umesia ukez kuwanyish kamu rutong ra Nzamb ra kusambish mulong wa divu. (Disambishil 1:28; 2:8, 9, 15) Djat ni nlel muten, antu akangeny kwengamin pa rutong riner. Pakwez, “divu dishichau dikweza” dikez kwikal mwishin mwa winyikel wa Mwan a muntu, Yesu Kristu. Awonsu akupanda ku kuwanyish kwa dirumburish dia Yehova piur pa ditenchik dined dikur akez kusadil mu uumwing mwishin mwa Mwant Kristu, end asal nich musangar yawonsu yiyilejinay, chakwel divu dikala paradis diawonsu dia kabuj. (Hebereu 2:5-9) Antu awonsu akez kusanger mudimu wa makas mau ni kutaninamu ukwash wa yom yivud yikubudika pa divu. —Kuseng 72:1, 7, 8, 16-19; Isay 65:21, 22, NW.

12. Ov mutapu ik ukezau kuchirish kuwanyidin kwa mu manangu ni kwa ku mujimbu kwa an a ngand a Want?

¹² Adam ni Ev payitangau, adinga awanyidina, ni rutong ra Nzamb piur pa divu radinga ra kwizwish divu nau anau, awonsu adinga awanyidina mu manangu ni ku mujimbu. Rutong riner rikushiken kamu ku ukinakin wa uyaj mwishin mwa kuyikel kwa Want. Chinech chitin kudioshaku yibudikin yawonsu ya chitil, ni pa chinech, Kristu ukat kusadil chidiap kusu mud Mwant pakwez kand mud Mwin Kupesh Mujim. Nich kushimpish, ukez kuyikwash an a ngand end in kuziyil kutaninamu ku usey wa kudiosh yitil wa yakupesh ya mwom wend amwinend mud muntu.

13. Ov yiyukish ik ya ku mujimbu yikezau kulet mwishin mwa winyikel wa Want?

¹³ Mwishin mwa winyikel wa Want, antu akushakama pa divu akez kuman yiyukish yipandakena kuwap ya ku mujimbu. “Mu chin chisu-cha mes ma amputames makez kaburik, ni matu ma atujikamatu makez kujikuk. Mu chin chisu-cha chibid ukez kamatik kwiur mud nsefu, ni rudim ra kamam rikez kakarik nich musangar.” (Isay 35:5, 6, NW) Mujimbu uziyina mulong wa upal ap mayej ukez kwikal kand wa ufun kupandakan wa mwan mukemp, ni misong akez kuyiswinkan nich ukash uwamp. “El mujimbu wend wikala kand mudi wa usand; achirikina ku machuku ma usu ma usand wend.” (Job 33:25, NW) Kukezap kand kwikal dichuku dikezay kwikal muntu ni diyingish dia kulond anch, “niyedil.” Ov mulong wak? Mulong antu amwakamina Nzamb akez kuyikwol ku chisend cha chitil ni yibudikin yach yiyimp. (Isay 33:24, NW; Luka 13:11-13) Mwawiy, Nzamb “ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan, mulong yom yikur kiyamekanap kand.”—Kujingunik 21:4.

14. Ov kushiken kuwanyidin kurumburikin kand chom ik?

¹⁴ Pakwez, kushiken ku kuwanyidin kwitin yivud kupandakanamu kusu kwikal ni mujimbu uwamp ni manangu mawamp. Kurumburikin kand kumekesh kamu nawamp ngikadil ya Yehova, mulong atutanga mu ‘chifu cha Nzamb, mu kufanakan nend.’ (Disambishil 1:26) Pa chinech, chifanyidin kwilej yivud. Mu mangand masu, “mwawiy mukeza kwikal kutentam.” Chawiy lel, mud mwatakelay kulond Isay, “antu akushakama pa divu akez kwilej chakin kutentam.” (2 Pita 3:13; Isay 26:9, NW) Ngikadil yiney yikat kutwal ku chisambu—chisambu pakach pa antu a michid yawonsu, pakach pa arund, mu dijuku dia muntu, ni kupandakan yawonsu, chisambu ni Nzamb amwinend. (Kuseng 85:10-13; Isay 32:17, NW) Antu ilejina kutentam akez kuyifundish pakemp pakemp chidia rusot ra Nzamb kud awiy. Rukat mulong wa Yehova anch rajik kamu mij nakash mu michim yau, akez kulondul jinjil jend mu mitambu yawonsu ya mwom wau. Akutwish kulond mud mwalonday Yesu anch, ‘yisu yawonsu nikat kusal yom ya kumusangaresh Tatukwam.’ (Yohan 8:29) Mwom ukez kwikal wa musangar mud ik anch antu awonsu asal mutapu winou!

Yisal Yimekena Katat

15. Nich kusadil yipul yidia mu paragraf winou lejan yikusala Want ni kumekesh yitufanyidina kusal katat.

¹⁵ Yisal yishimokishina ya Want wa Nzamb ni an a ngand au yimeken kamu patok. Yipul yilondwila ey ni mifund yikukuvurish yimwing ya yisal yiney, ni yom yimwing yikutwishau ni yifanyidinau kusal an a ngand kudiosh kamu katat.

Ov nany warishisha bil Want, ni yom ik yabudikinaku? (Kujingunik 12:7-10, 12)

Kudiosh kwadilay Kristu want, ov kukumangej kwa yid ya chirund ik kutekinay muchim? (Kujingunik 14:1-3)

Ov mudimu ik watakelay kulond Yesu anch ukez kuusal kupwa kamu kwa kubudikin kwa mar majim, mud muchifundinau mu Mateu 25:31-33?

Ov mudimu ik wa kusambish usadilau nlel? Ov anany ausadila? (Kuseng 110:3; Mateu 24:14; Kujingunik 14:6, 7)

Ov mulong wak ukangenyau in rupompat a chipolitik ni a chirelijon kwimik mudimu wa kulejan? (Zakariy 4:6, NW; Midimu 5:38, 39)

Ov kukarumuk ik kumekena mu mwom wa antu aziyidila winyikel wa Want? (Isay 2:4, NW; 1 Korint 6:9-11)

Want wa Mivu Kanan

16. (a) Ov Kristu ukuyikel mivu yinch? (b) Ov yom ik yipandakena kuwap yikezau kusal pa chirung chinicha ni pa kupwa kwach?

¹⁶ Kupwa kwa kumudjibul Satan nau ayilembil end mu dibuku diakad musul, Yesu Kristu pamwing nau answan 144 000 akez kuyikel mud ant ni in kupesh mivu kanan. (Kujingunik 20:6) Pa chirung chinicha, akez kuchirish ukamuntu ku kuwanyidin, ni kudiosh chikupu chitil ni rufu yadiokala kud Adam. Kwisudiel kwa Winyikel wa Mivu Kanan, ukutakelay kamu nawamp mudimu wend mud Mwant-Mwin Kupesh wa Umesia, Yesu “ukez kupan want” kud Tatukwend, “chad mwamu Nzamb ukez kutakel yawonsu.” (1 Korint 15:24-28) Pa chisu chinech, akumufungul Satan mu chisu chikemp chakwel kuyipak antu apandishau mulong wa kwengamin kwau pa ukaleng wa Yehova mwiur ni panap pansh. Kupwa kwa kupak kwinoku kwa nsudiel, Yehova ukez kumushesh Satan nau ambwambol awonsu akwikala ku mutambu wend. (Kujingunik 20:7-10) Antu akwata nich makas maad ukaleng wa Yehova—mbil yend ya kuyikel—akez kamu kumekesh sens kushinshaman kwau kwa kashinsh. Akwikal chad lel mu urund uwanyidina nend Yehova, ni kuyitiy kud ndiy mud anend amakundj nau anend amband, itiyidinau kud Nzamb mulong wa kutambul mwom wa chikupu.—Rom 8:21.

17. (a) Ov chom ik chikuushikena Want kwisudiel kwa mivu kanan? (b) Ov mutapu ik chidia chakin anch Want “kakez kuukwatap”?

¹⁷ Chawiy lel, mudimu win kamu wa Yesu ni wa antu 144000 ukez kwikal mutapu ukwau pantaliken ni divu. Ov yom ik yikezau kusal mu machuku ma kurutu? Baibel kalondilap chom. Pakwez anch twakwat nich makas maad ukaleng wa Yehova, tukez kwikal aom kwisudiel kwa Winyikel wa Mivu Kanan chakwel kuman yatongay Yehova kusal mulong wa awiy ni mulong wa mangand mend makwamushena mawonsu. Chikalap nchik, winyikel wa mivu kanan wa Kristu “ukez kwikal wa mivu ni minang” ni Want wend “kiukez kupwap.” (Daniel 7:14) Mu mutapu ik? Chidi bil mulong wintakel wa kuyikel ukez kwikalap kand mu makas ma antu akwau akweta jintong jikwau, mud chikwikalay Yehova Nyikel. Chikwau kand, Want winou “kakez kuukwatap” mulong yisal yau yikez kwikal ya chikupu. (Daniel 2:44) Ni Mwant-Mwin Kupesh wa Umesia ni ant in kupesh akusadila nend pamwing akez kuyilimish chikupu mulong wa mudimu wau ushinshamena umusadidilau Yehova.

Misamb ya Kuchirikin

• Ov mulong wak Want wa Nzamb wawiy kwau mutapu umwing kusu wa kupwish milong ya ukamuntu? Ov chisu ik chasambishay kuyikel Mwant wa Want wa Nzamb?

• Ov chom ik chikusangareshina kamu nakash piur pa Want wa Nzamb ni yiukeza kusal?

• Ov yisal ik ya Want tumena kal, ni mutambu ik tukweta mu kuwanyish kwinoku?

[Chipich chidia pa paj wa 93]

Mwishin mwa Want wa Nzamb, antu awonsu akez kwilej kutentam