Ov, Yesu Wavadika pa Kachirikin?

BIBIL katulejinap chisu chavadikay Yesu. Pakwez, utwinkishin diyingish diakin ditutwishishina kulond anch Yesu kavadikap pa Kachirikin.

Tushinshikin mwikadil wa pa chirung chinech cha muvu mu Betlehem, mwavadikinay Yesu. Ngond wa in Yuda upidilau anch Kislev (usendina chikunku cha Kalang/Kachirikin) wadinga ngond wa mashik ni wa ruvul. Ngond walondulang wadinga Tibet (Kachirikin/Chiwong). Wadinga nich tamperatir wa pansh nakash pa muvu, ni kwadinga kand kunak pa chipatu nej pa mikandu ya ngand. El tushinshikin yitulejinay Bibil piur pa mikadil ya chisu ya chikunku chinech cha ngand.

Mwin kufund Bibil Ezra ulejen anch Kislev wadinga ngond wijikena wa chisu cha mashik ni ruvul. Kupwa kwa kulond anch chisak cha antu chakumangana mu Yerusalem “Wading ngond wa chidivu [Kislev] machuku ma ngond makum maad,” Ezra ulejen anch antu adinga “ni kuzalizal . . . ni mulong wa ruvul wanaka nakash.” Piur pa mikadil ya chisu pa chirung chinech cha muvu, antu in ayinau akumangana alonda anch: “Chidi chirung cha ruvul muvud, kwikil mutapu wa kushakam pol.” (Ezra 10:9, 13; Jeremiy 36:22) Chakin kamu atufung ashakama mu chikunku chinech cha ngand ashinshikina anch awiy pamwing ni yisak ya amikoku au kadingap kand afanyidin kwikal mwi mpat uchuku anch Kachirikin washejin piswimp!

Pakwez, Bibil ulondil anch, atufung adinga mwisuku alamin yisak ya amikoku au pa uchuku wavadikay Yesu. Chakin, mwin kufund Bibil Luka ulejen anch pa chisu chinech, atufung adinga “ashich mwisuku end alam amikoku au uchuku” piswimp ni Betlehem. (Luka 2:8-12) Shinshikin anch atufung adinga chakin ashich mwisuku, kadingap kuya mwisuku ching muten. Adinga nich yisak ya amikoku au mwisuku uchuku. Ov, kurumburil kwinoku kwa kushakam mwisuku kwambaten nich chirung cha mashik ni ruvul cha pa Kachirikin mu Betlehem? Bwat, kwambatenap. Komb mikadil yadinga pa chisu cha kuvadik kwa Yesu yimekeshin anch kavadikap pa Kachirikin.a

Dizu dia Nzamb ditulejin patok chisu chafay Yesu, pakwez ditwinkishin jinsangu jikemp kusu jitadina chisu chavadikay. Chinech chituvurishin mazu ma Mwant Salomon: “Dijin diwamp dipandakenamu malash ma usey, ni dichuku dia kufa dipandakenamu dichuku dia kuvadik.” (Mulej 7:1, NW) Chidiap cha kushimok, anch Bibil ulejen yom yivud piur pa mujikit wa Yesu ni piur pa rufu rend pakwez tuyom tukemp piur pa chisu cha kuvadik kwend.