“Chinany Masandj”

1, 2. Ov, mutapu ik Balam wasadinay mupit uyimp mulong wa kuyoz nich antu a Yehova?

MWIN kuta ansh uyiling pa ndond yend yikatiningay kuta ansh. Ndiy usotining kukwat insh wa mutapu kanang. Ukutond rudambu ra kutek ku dilau ni wadjibul dilau diend mu mem. Kupwa, pakuchingelay chisu kanang, ukuman kapoch wasambish kunyikek, ukukakak ni ukukwat insh ufila ku dilau. Ukusangar mulong wij anch watang dilau diwamp.

² Mu muvu wa 1473 K.C.C., muntu umwing utazukinau anch Balam watonga nakash chakwel ijika mupit wadingay ufanyidina kuta chisak cha Nzamb pachadinga mu Chibeng cha Mowab, piswimp kamu ni Ngand ya Kushilamu. Balam wimekesha mwadingay profet wa Yehova, pakwez, ndiy wading chakin kamu mwin ris mulong wa kuyishing in Isarel. Pakwez, Yehova kitiyijap anch Balam ayishinga in Isarel, chawiy, chisu chin chawonsu chakimbangay kuyishing, Yehova wayiyukishanga. Mudi mwakimbangay difut diamukanau, Balam watonga anch, anch wayishikij in Isarel ku kusal chitil chijim, pamwing ap Nzamb amwinend ukuyilej kadimu. Nich rutong riner mu manangu, Balam wasadina dilau​—dia kuyoz ayangadim in Mowab.​—Kuchind Michid 22:1-7; 31:15, 16; Kujingunik 2:14.

3. Ov, mupit wa Balam washikena ku yom ik?

³ Ov, in Isarel awila mu mupit wend win wang? Ku mutambu umwing tukutwish kulond anch mwaning. Tunan dikum twa amakundj in Isarel awila mu mupit winou kusutil ku “kusal masandj nau ayangadim a Mowab.” Awiy asambisha kand kwifukwil anzamb a Mowab, kuwejinaku kand mukish Bal wa ku Peyor, nzamb wa kuvadish ap wa masandj. Mudi chibudikin in Isarel 24 000 asheshika kamu piswimp ni Ngand ya Kushilamu. Diading disheshik dijim mud ik!​—Kuchind Michid 25:1-9, NWT.

4. Ov, mulong wak in Isarel tunan ni tunan twawila mu mupit wa masandj?

⁴ Ov, chom ik chashikija ku dishing dined? Michim ya antu avud yadinga yasambisha kal kuyimp ni asambisha kumulik Yehova pakemp-kakemp, Nzamb ndiy wayidiosha mu usuk mu Idjibit, wayidisha mwimpay, ni wayilama nawamp djat piswimp ni ngand ya kushilamu. (Hebereu 3:12) Patonginay kambuy Paul pa chom chinech chayishikena, ndiy wafunda anch: ‘Niyetu kangal twasal masandj mudi mwasalau antu amwing a pakach pau masandj. Pasalau mwamu, antu tunan makum maad ni tusatu ayijipa pa dichuku dimwing.’a—1 Korint 10:8.

5, 6. Ov, mulong wak rusangu ra chitil cha Isarel chasalay mu Chibeng cha Mowab didi dilejan dia usey kudi etu nlel unou?

⁵ Rusangu riner ridia mu mukand wa Kuchind Michid didi dilejan dia usey kudi antu a Nzamb nlel unou, mulong tudi niyetu piswimp ni ngand ya kushilamu yatukanay. (1 Korint 10:11) Chilakej, nlel unou antu akatin nakash kusal masandj mudi mwadinga in Mowab, pakwez yisal yiney yipalangen mu jingand jawonsu. Muvu ni muvu, in Kristu awididining mu mupit wa yisal ya masandj mudi mwadinga in Isarel. (2 Korint 2:11) Kupwa, mudi mwasalay Zimiri, ndiy wamusenda mband umwing mwin Madian kuya nend mu mwinkand yend, chilik chimwing kand, antu amwing adinga mu chikumangen cha in Kristu akimbining kuyipish yitongijok ya akwau.​—Kuchind Michid 25:6, 14; Jud 4.

⁶ Ov, ni yey umening anch machuku mitudia am tudi mudi antu adia mu Chibeng cha Mowab? Ov, ukutwish waman anch ngand yisu yatushilaumu kudi Nzamb yidi katat piswimp? Anch mwamu, sal usu wey wawonsu chakwel wilam mu rukat ra Nzamb kusutil ku ‘kuchin masandj.’​—1 Korint 6:18.

OV, MASANDJ CHOM IK CHOM IK?

7, 8. Ov, “masandj” chom ik ni mutapu ik ukatau antu asadininga masandj kwangul yikatau kukun?

⁷ Mudi musadidinau dizu dined mu Bibil, ‘masandj’ (mu dizu dia in Grek, por·neiʹa) dirumburikin kusal masandj kudi ikundj ni mband akad kwatan kukwatijan nich chilejenau mu Mifund piur pa uruw. Kuwejinaku masandj, kusotan ni usund pakach pa ambay akad kwatan, kwandjik mujimbu wa ikundj mu kan ka mband, ku mupany ni mudi kukwatijan kwa mukan ni kusengan nich yikunku ya mujimbu wa muntu wakad kwikal mbay ney wa uruw. Chom chimwing kand, yisal mudi kulalijan kwa antu a mujimbu umwing ap kulalijan nau annam.b

⁸ Mifund yilejen patok anch: Antu asadininga masandj kakutwishap kushal mu chikumangen cha in Kristu ni kakezap kutambul mwom wa chikupu. (1 Korint 6:9; Kujingunik 22:15) Chikwau kand, isadidin yom yiyimp katat mulong antu akwau kakutwishap kand kuyichingejin-imen ayinau antu a chamwamu, atanininga milong mu mauruw mau, ayipishin kal kom kau, atambwiling madikaj makad kutongin, mayej ni akutwish kushiken ku rufu. (Tang Galatia 6:7, 8.) Ov, mulong wak kwiyandjik mwinjil yiney kudi kwiyandjik mu yom yiyimp nakash? Cha ushon, antu avud katongidiningap pa yibudikin yiyimp chisu chiyandjikiningau mu yisal yiney yiyimp​—yisu yivud yisutishiningau mu kutal pornografi.

PORNOGRAFI​—NJIL YA KUSAMBISH YISHIKIJININGA KU MASANDJ

9. Ov, muntu ukutwish kutal pornografi pakad kusal chisal chiyimp cha masandj mudi mulondiningau antu akwau? Rumburil.

⁹ Mu jingand jivud, pornografi udi chom chipalangeshinau nakash mu majurnal, mu mizik, ku matelevizio ni amupalangeshin kand nakash nakash pa kaped ka Internet.c Ov, muntu ukutwish kutal yipich yiney pakad kushik ku kusal uyimp kanang mudi mulondininga antu akwau? Bwat! Antu atadininga pornografi akutwish kushiken ku kwikal nich chaku cha kwichuk ni chaku cha ‘maku ma masandj makad kuyikel,’ chikutwisha kulet chibudikin chiyimp, maku mayimp, chikokujol chijim cha kulik kwovijan mu uruw, ni yisu yivud akutwish kushiken ku kujip uruw.d (Rom 1:24-27; Efes 4:19) Muntu umwing ukimbininga mitapu kanang ya kuyikwash antu atekininga yitongijok yau ching ku kulalijan kwa ikundj ni mband ufanikeshin chaku chinech nich mayej ma kanser. Ndiy ulondin anch: “Chaku chinech chikudining ni chiyiling ni kukasikan. Chikasikening chakwel chaku chinech kupwa achinach ap kuchok.”

10. Ov, mu jinjil ik tukutwisha kusadil chany tutanina mu Jakobu 1:14, 15? (Tal kand mushet ukweta mutu wa mulong ulondina anch: “Natan Kal Usu wa Kwikal Wishitwila.”)

¹⁰ Tushinshikinany mazu mafundinau mu Jakobu 1:14, 15, mitutangina anch: “Muntu ni muntu ukat kwiyoz amwinend nich maku mend mayimp, mawiy makata kumubachik, chad mamurumbwish. Chad maku mend mayimp makat kwimish, maval chitil, chawiy chitil anch chakul, chikat kuval rufu.” Chawiy, anch maku mayimp mandam mu manangu mey, sal usu wey wawonsu chakwel umadiosha swa! Chilakej, anch waman yom yiyimp ya masandj, kapamp kamwing, lik kuyital ap jim ordinater wey, ap swimp shen wey wa Televizio utadina. Kusal mwamu kudi kwa usey mud ik kwa kwipuk kuwil mu maku ma masandj kurutu kwa kusal chom chiyimp!​—Tang Mateu 5:29, 30.

11. Chisu tusadininga usu wa kulik maku mayimp, ov, mutapu ik tukutwisha kumekesh ruchingej retu mudiay Yehova?

¹¹ Nzamb utwij etu nawamp win kamu kutupandakanamu ayinetu, chawiy chituyudinay anch: ‘Chifanyidin kujip rusot ren ruyimp rikata kulondul yom ya mangand, mudi usund, ni upwepu, ni maku ma masandj makad kuyikel, ni ris, mulong ris ridi mutapu wa kwifukwil akish.’ (Kolosay 3:5) Chakin kamu, kusal mwamu kukutwish kwikal chikokujol. Pakwez, tuvurikany amboku anch tukwet Tatuku wa mwiur mwin rukat ni mwin kushimpish michim tufanyidina kwit mu malembil metu. (Kuseng 68:19) Chawiy, anch chitongijok chiyimp chandam mu manangu, mulembila ndiy pakad kulab. Lembil piur pa “ukash upandakena,” ni sal usu wa kujijamish manangu mey pa yom yikwau.​—2 Korint 4:7; 1 Korint 9:27; tal mushet ukweta mutu wa mulong ulondina anch: “Ov, Mutapu ik Nikutwisha Kusal Chakwel Nilika Yaku Yiyimp?”

12. Ov, “muchim” wetu chom ik ni mutapu ik tufanyidina kuulam?

¹² Mwin manangu Salomon wafunda anch: “Kupandakan yom yawonsu, lam muchim wey, mulong mwawiy mudia misul ya mwom.” (Jinswir 4:23) Chakin kamu, “muchim” wetu ulejening untu wetu wa mukach ku mes ma Nzamb. Chikwau, chiding mutapu umeningay Nzamb “muchim wetu”​—chidiap mutapu tumekeninga ku mes ma antu akwau—​umekeshininga anch tukutambul mwom wa chikupu ap bwat. Chiswapeling kwau. Pakwez, chiding kand mulong ukash. Chawiy, pakwatay mupak wa kulik kumutal mband nich maku ma kumusot, Job, ikundj ushinshamena, wachipa machip nich mes mend. (Job 31:1) Chilakej chiwamp mud ik kudi etu! Nfund a kuseng ni yend wamekesha chitongijok cha mutapu umwing ou palembilay anch: “Ndioshap mes mam ku yom yamwamu.”​—Kuseng 119:37.

MUPAK UYIMP WA DINA

13. Ov, Dina wadinga nany, ni mulong wak mupak wend wakwatay wadinga wakad manangu?

¹³ Mudi mutwisambina mu shapitre 3, arund netu akutwish kwikal nich yibachikin yiwamp ap yiyimp pitudia etu. (Jinswir 13:20; tang 1 Korint 15:33.) Tushinshikinany chilakej chenday Dina, mwan changadim wenday nshankur Jakobu. Chikalap nchik mutapu uwamp wamukudishau kudi anvaj end, ndiy wakwata mupak uyimp wa kushakam nau an ayangadim in Kanan. Mudi mwadinga kamu in Mowab, in Kanan adinga ijikena nakash mulong wa yisal yau yiyimp ya masandj. (In Levi 18:6-25) Ku amakundj a in Kanan, Sikem wading “amulimishin kupandakan” mu dijuku dia tatukwend​—ni Dina wafanyidina kwend nend masandj pakad mulong.​—Disambishil 34:18, 19.

14. Ov, mutapu ik kutond arund ayimp kwa Dina kwakimbina dijuku diau yikokujol?

¹⁴ Pamwingap Dina kadingap ni chitongijok mu manangu mend cha kusal masandj ni Sikem chisu chamumanay. Pakwez, Sikem ndiy wasala chisal chasalangay mwin Kanan mwawonsu chisu chamanangay mband kanang wamukatishanga chakwel enda nend masandj. Kupwa, ap anch Dina wasala usu wa kulik kulal nend, kiyadingap kand ni usey bwat mulong Sikem “wamukwata ku usu” ni “ndiy wamuyipisha.” Chimeken anch Sikem “wamukata” Dina, pakwez ndiy wading wamwovishang kal usany. (Tang Disambishil 34:1-4.) Chikwau, Dina kadingap changadim amwinend wamana mar piur pa chisal chinech cha usany. Kutond kwend kwakad manangu kwa kwikal nau arund ayimp kwawiy kwakimbina dijuku diau yikokujol ni kwayovisha usany.​—Disambishil 34:7, 25-31; Galatia 6:7, 8.

15, 16. Ov, mutapu ik tukutwisha kutambul manangu makin? (Tal kand mushet ukweta mutu wa mulong ulondina anch: “Mifund ya Kutongijokin.”)

¹⁵ Ap anch Dina wileja dilejan dia usey, ndiy wadileja kusutil ku chisal chinech chiyimp chatanijanay nich. Pakwez, antu amukatina Yehova ni asotina kumusadil kafanyidinap kwilej malejan ma mwom mu mutapu mudi winou. Mulong awiy amuteshining Nzamb, ni atondining ‘kwend ni mwin manangu.’ (Jinswir 13:20a) Chawiy, ashikining ku kujingunin “jinjil jawonsu jiwamp” ni ipukining milong ni yipwichik ya chamwamu.​—Jinswir 2:6-9; Kuseng 1:1-3.

¹⁶ Antu in awonsu itininga manangu kudi Nzamb amatambwiling padandamediningau kumit mu malembil ni pilejiningau Dizu dia Nzamb panrau ni mikand yibudishiningau kudi kashalapol ushinshamena ni kubabal. (Mateu 24:45; Jakobu 1:5) Kwitudish kuding kand kwa usey chakwel tuziyil yiyul yidia mu Mifund. (2 Ant 22:18, 19) Chilakej, mwin Kristu ukutwish kwitiyij anch muchim wend umudimbining ni uding muntu muyimp. (Jeremiy 17:9) Pakwez, ov, pasadiningay chilim witudishining ni witiyijining yiyul yimuyudiningau?

17. Lejan mwikadil kanang ukutwisha kushiken mu dijuku ni mutapu ukutwishay tatuku kuushinshikin pamwing ni mwanend changadim.

¹⁷ Tongin bil pa mwikadil winou. Tatuku umwing walika chakwel mwanend changadim ni nsand mwin Kristu abudika ayinau pakad muntu mukwau. Changandim winou wakul anch: “Ov, tatuku kiukatap kwinchingejin? Tusotinap kusal chom kanang chiyimp!” Changadim winou ukutwish kumukat Yehova ni kwikal nich yitongijok yipandakena kuwap, ov, ‘wendidil mu manangu ma Nzamb’? Ov, changadim winou ‘uchinin masandj’? Ap usupin ni ‘ukat kwichingejin amwinend’? (Jinswir 28:26) Pamwingap ukutwish kutongin pa yany yiwejidinauku yikutwisha kumukwash tatuku winou ni mwanend changadim kushishinkin pa mulong winou.​—Tal Jinswir 22:3; Mateu 6:13; 26:41.

JOSEF WACHINA MASANDJ

18, 19. Ov, choziu ik chashikena mu mashakamin ma Josef ni mutapu ik wachipwishay?

¹⁸ Josef, mpanyend a Dina, wadinga nsand muwamp ku chifu, wamukata Nzamb ni wachina masandj. (Disambishil 30:20-24) Padingay uchid nsand, Josef wimena amwinend mutapu mupak winou wakad manangu wa mpanyend wamuletina yibudikin yiyimp. Kusutil ku rusangu riner ni rusot rikash radingay nich Josef ra kwilam mu rukat ra Nzamb, yamukwasha mivu yivud djat ni mu Idjibit pamukimbangau “pichuku pichuku” kudiay mband wa nsalejend chakwel alala nend. Chakin kamu, mudi mwadingay muswik, Josef kadingap ni mutapu wa kulik chisend chend ni kukimb kwindond kwa kuya! Pakwez, ndiy wafanyidina kutakaman ni kupwish chikokujol chinech nich manangu. Chawiy chasalay mulong kitiyijap kapamp ap kamwing kusal masandj ni mband wa Potifar, ni kupwa ndiy wamuchina.​—Tang Disambishil 39:7-12.

¹⁹ Tongin bil pa mulong winou: Anch Josef wading umwizezin mband winou ap wading ni chaku cha kutonginang pa masandj, ov, ndiy wela kutwish kulam kutentam kwend? Bwat. Pakwez, mazu ma Josef mamulejay mukajend a Potifar malejena patok anch ndiy walimishanga urund wend wa piswimp ni Yehova pa ndond pa kutongijokin pa yitongijok yiyimp. Chawiy lel, ndiy walonda anch: “Nsalejam, . . . kwikil chom chinkangeshinay, ching kusu ey kwapwa, mulong ey udi mukajend. Ing, am nikutwish nchik lel kusal kuyip mudi kwinoku, ni kusal kand chitil kurutu kwa Nzamb?”​—Disambishil 39:8, 9.

20. Ov, mutapu ik Yehova wamukwashay Josef?

²⁰ Musangar mud ik wovay Yehova pamumanay nsand Josef udandamedin kwikal utentamena pichuku pichuku ap anch ndiy wading kulemp ni dijuku diend! (Jinswir 27:11) Kupwa kwa mivu, Yehova wamukwasha Josef chakwel abudika mu rukan ni kumutek kand kanampumb wa kusambish mu Idjibit ni mwin kusangish yakudia! (Disambishil 41:39-49) Kuwanyin mud ik kwa mazu minam madia mu Kuseng 97:10, (NWT): malondila anch: “En umukatilany Yehova, kisany kuyip. Ndiy ulamin mwom ya antu end ashinshamena, Ndiy ukat kuyikamunin ku chikas cha ayimp!”

21. Ov, mutapu ik wasalay mukadivar umwing nsand udia mwingand ya Afrik chakwel amekesha mwikadil wa kutakaman kurutu kwa yom yiyimp?

²¹ Chilik chimwing kand ni lel unou, atushalapol a Nzamb avud amekeshining anch awiy ‘akisining yom yiyimp ni akatining yom yitentamina.’ (Amos 5:15) Mukadivar umwing nsand udia mwingand ya Afrik uvurikin anch changadim umwing wilejiningay nend ku shikol wamwita amukwashaku kumusadil ekizame wa tupamp ni kupwa wamukana anch anch ndiy wamukwash ukez kulal nend. Mukadivar winou ulondin anch: “Kapamp kamwing, nalika kwit kwinoku kwangitay.” Kusutil ku “kulam mwikadil wam wa kushinshaman, nalama katumb kam ni kalimish kam-amwinam, ngikadil jipandakena usey kusutamu ni usey wa utad wa or ni argent.” Chakin kamu, chitil chikutwish kulet “musangar wa . . . kachisu kakemp,” pakwez yisu yivud, yibudikin yach yiletining kusansan kuvud. (Hebereu 11:25, TMK) Chikwau kand, musangar winou udi wa chamwamu anch twawisikej nich musangar wa chikupu tukeza kutan mulong tumuziyidiling Yehova.​—Jinswir 10:22.

TWITIYIJANY UKWASH WA NZAMB WA RIY

22, 23. (a) Anch mwin Kristu wasal chitil chijim, ov, mulong wak mwikadil wend udiap wa kuburen ruchingej? (b) Ov, ukwash ik udia wa usey kudiay mwin kusal chitil?

²² Chitudia antu akad kuwanyin, etu awonsu tusadining usu wa kurish nich maku mayimp ma kumujimbu chakwel tusala yom yitentamina ku mes ma Nzamb. (Rom 7:21-25) Yehova wij amwinend mulong winou, ndiy “ukat kuvurik anch tudi kwetu rufunfut.” (Kuseng 103:14) Yisu yimwing, mwin Kristu ukutwish kusal chitil chijim. Ov, chawiy kulond anch ndiy waburen kal ruchingej? Bwat kwau! Pakwez, mwin kusal chitil ukutwish kwangul chom chakunay, mudi chamushikena Mwant David. Chikalap nchik mwamu, Nzamb “witenchikin mu kulikishilan” antu asadininga yitil ni ‘Itiyijina yitil’ yau.​—Kuseng 86:5, TMK; Jakobu 5:16; tang Jinswir 28:13.

²³ Chikwau, Nzamb wapana nich rukat ‘yipan ya antu’ mu chikumangen cha win Kristu​—atufung akudila muspiritu adia ayifuvu ni adinga tayad kupan ukwash. (Efes 4:8, 12; Jakobu 5:14, 15) Rutong rau riding ra kumukwash mwin chitil chakwel arijeka urund wend wa piswimp ni Nzamb ni, mu mazu ma muntu mwin manangu, mu kutambul ‘ronganyin’ chakwel alika kuchirikin kand chitil.​—Jinswir 15:32.

‘KUPIT CHITONGIJOK CHIWAMP’

24, 25. (a) Ov, mutapu ik wamekeshay nsand wisambidinau mu Jinswir 7:6-23 anch ndiy wading ‘uburedina yitongijok yiwamp’? (b) Ov, mutapu ik tukutwisha kupit ‘chitongijok chiwamp’?

²⁴ Bibil wisambidin piur pa muntu ‘uburedina chitongijok chiwamp’ ni muntu ‘upitina chitongijok chiwamp.’ (Jinswir 7:7) Mulong muntu ‘uburedina chitongijok chiwamp’ ukutwish kuburen ukaliweny wa kushinshikin nich milong, mulong kand kal akula mu ritiy ni kand kal amusadila Nzamb mudimu mivu yivud. Mudi nsand wisambidinau mu Jinswir 7:6-23, chiswapel kudiay ndiy kuwil ku chitil chijim. Pakwez, ‘ukutambula chitongijok chiwamp’ ni ukwishinshikin pikatay kwilej chisu chawonsu Dizu dia Nzamb ni pakatay kulembil malembil makurukina. Ap anch udi mukayitil, chitwishikin kudi ndiy kutenchik yitongijok yend, maswir mend, yovil yend ni jintong jend ja mwom pamwing ni yom yitiyikina kudiay Nzamb. Chawiy, ndiy ‘wikatil amwinend,’ ap wiyukishinay, ni ‘ukez kutwish.’​—Jinswir 19:8.

²⁵ Iyipula amwiney anch: ‘Ov, nitiyijin kamu nich kashinsh anch yany ya Nzamb yitentamin? Ov, nitiyijin kamu anch anch nayiziyin yany yiney nikez kutan musangar ujim?’ (Kuseng 19:7-10; Isay 48:17, 18) Anch widjidjekin pa mulong winou, kimb amboku mutapu wa kuupwish. Tongin pa yikokujol yitanijadinay nich muntu ulikina kuziyil ku yijil ya Nzamb. Chikwau, “pakany bil, utalany [Yehova] mudi mudiay muwamp!” kusutil ku kushakam ni kusutil ku kwizwish manangu men nich yitongijok yiwamp​—ni yom yidia yakin, yitentamina, yilimishinau, yikatilau ni yishitwila. (Kuseng 34:8; Filip 4:8, 9) Ukutwish kwikal nich kashinsh anch anch wasal yom yiney, ukez kumukat Nzamb nakash, ukukat yom yikatiningay ni ukukis yom yikisinay. Josef kadingap muntu uwanyidina. Pakwez, ndiy watwisha “kuchin masandj” mulong wilikidila kudiay Yehova chakwel amuumba nakash mu mivu yivud, chakwel kumwinkish chitongijok chiwamp. Chikutwish kwikal kand chakin ku mutambu wey.​—Isay 64:8.

26. Ov, mitu ik ya milong ya usey yitukeza kwisambin?

²⁶ Sakatang wetu katangap yikunku ya mijimbu yetu ya kuval nich mulong wa kusengan nich bwat, pakwez ndiy wayitanga mulong wa kuval ni kulet nich musangar mu uruw. (Jinswir 5:18) Chitongijok cha Nzamb piur pa uruw tukez kuchisambin mu mashapitre maad malondwilaku am.