SHAPITRE WA 25

Mutapu ik Nikutwisha Kupandakan Chaku cha Kwichuk?

“Nasambisha kwichuk pinading ni mivu chinan. Kupwa nileja chitongijok cha Nzamb piur pa mulong winou. Naziyang nakash chisu chawonsu nichukang. Niyipulang anch: ‘Mutapu ik ukutwishay Nzamb kumukat muntu mud am ou?”​—Luiz.

ANCH wabarik usand, maswir kwa kulalijan makat kupandakan nakash. Chinech chawiy chikata kusal anch wikala ni chaku cha kwichuk.a Antu avud akutwish kukulej anch chiyipinap kwau. Akat kulond anch: “Chikatap kwau kumusal muntu nayimp.” Pakwez, kud diyingishin dijim difanyidina kukubachik kwipuk chaku chinech. Kambuy Paul wafunda anch: “Chifanyidin kujip rusot ren riyimp rikata kulondul yom ya mangand, mudi . . . maku mayimp ma mujimbu.” (Kolosay 3:5) Kwichuk kukujipangap maku mayimp ma mujimbu, pakwez kukat kumalangwish. Chikwau kand, shinshikin manans malondwilaku am:

● Kwichuk kukutwish kumubachik muntu kwikal ni chaku cha kwitongin kwend amwinend. Chilakej, muntu ukata kwichuk ukat kushinshikin kwend ching pa yovil ya mujimbu wend amwinend.

● Kwichuk kukat kumushikij muntu kuyiman antu a mujimbu ukwau mud yom yakad usey mulong wa kwisangaresh kwend.

● Chaku cha kwitongin chikata kudiokal ku kwichuk chikutwish kusal anch muntu alika kusanger kulalijan mu uruw.

Pa ndond pa kwichuk mulong wa kudutish yovil yey ya kulalijan, sal wa usu wa kukudish mwikadil wa kwilam. (1 Tesalonik 4:4, 5) Mulong wa kukukwash kusal mwamu, Bibil ukulejin anch ufanyidin kwipuk yishikena yikutwisha kulangwish yovil yiney. (Jinswir 5:8, 9) Pakwez, chid nchik anch wikadin kal musuk wa chaku cha kwichuk? Pamwing ap wasadin kal usu wa kulikap, pakwez utwishinap. Chiswapel kutong anch ukutwishap kuswimp ni ukutwishap kulondul mbil ja Nzamb. Wawiy mutapu wiyovay nsand umwing utazukinau anch Pedro. Walonda anch: “Naziyang nakash chisu nakangany kwimik kwichuk. Natongang anch Nzamb kakezap kanlikishin mulong wa yom nasala. Chankasikenang kulembil.”

Anch niyey wawiy mutapu wiyovila, kangal waziy. Ruchingej ridiaku. Ansand avud ni amakurump kand, atwisha kupandakan chisal chinech cha kwichuk. Niyey ukutwish kwey!

Mutapu wa Kupandakan Yovil ya Kwifish Nich

Mud mutapu twalondang, antu akata kukangany kupandakan chaku cha kwichuk akat kwifish nich nakash. Chakin kamu, kwikal ni “ushon udiokila kudi Nzamb” kukutwish kukwinkish usu wa kupandakan chaku chinech. (2 Korint 7:11) Pakwez kwifish nich nakash kukutwish kulet yibudikin yiyimp. Kukutwish kukuziyish nakash kushik ni mu chilik cha kulik kusal kand usu wa kudandamen kurish.​—Jinswir 24:10.

Chawiy sal usu wa kwikal nich chitongijok chisikena. Kwichuk kud kwijond. Kukutwish kukwikadish ‘musuk wa maku mayimp ni misangar ya mitapu ni mitapu,’ ni kukutwish kusal anch wikal ni yitongijok yiyimp. (Titus 3:3) Pakwez, kwichuk chidiap chitil chijim mud kusal yom ya masandj. (Jud 7) Anch ukat kwichukang, kangal kutong anch wasadin kal chitil chakadiau kutwish kulikishin. Chom cha usey ufanyidina kusal kud kusal usu wa kwimik ni kudandamen kurish!

Chiswapel kuziy nakash anch usadin usu wa kwimik pakwez ey wachirikinamu kand. Anch chakushiken mwamu, vurik mazu madia mu Jinswir 24:16 malondina anch: “Anch mwin kutentam wawa tupamp sambwad, ukulank kand, pakwez antu ayimp akat kuwa nich yakamish.” Kuchirikinamu yisu yimwing kukwikadishinap muntu muyimp. Chawiy kangal waziy. Pakwez, sal usu wa kwijik yom yisadina anch uchirikinamu chaku chinech, ni ikasikesha kwipuk yom yiney.

Itekina chisu cha kutongijokin piur pa rukat ni riy ra Nzamb. Nfund a kuseng David, wasala chitil mulong wa kuziy kwend, walonda anch: “Mudi tatuku ukata kuyovil anend riy, chawiy kand, [Yehova] ukat kuyovil awiy riy akata kumulimish ndiy. Ndiy wij mutapu watutangay, ndiy ukat kuvurik anch, etu tudi kwetu rufunfut.” (Kuseng 103:13, 14) Chakin kamu, Yehova wij anch tud antu akad kuwanyin ni usotin ‘kutulikishin.’ (Kuseng 86:5) Ku mutambu ukwau, usotin anch tusala usu nakash mulong wa kuswimp. Chawiy nzau ik ja usey ufanyidina kusal mulong wa kupandakan chisal chinech?

Shinshikin mitapu yey ya kwipuwangej. Ov, ukat kutalang mafilim, ma program ma ku televizion ap kuya pa tupend twa internet tukata kulejan yom ya masandj? Nfund a kuseng umwing wamulembila Nzamb nich manangu anch: “Diosh mes mam ku yom yamwamu.”b—Kuseng 119:37.

Ikasikesha kushinshikin manangu mey pa yom yindj. Nsand umwing mwin Kristu utazukinau anch William waleta chiyul anch: “Kurutu kwa kuya kulal, tang chom kanang cha mu Bibil. Chid cha usey nakash kutongijokin pa chom kanang cha mu spiritu kurutu kwa kuya kulal.”​—Filip 4:8.

Mulejamu muntu kanang mulong wey. Usany ukutwish kukangesh kumulejamu muntu mukwau. Pakwez, kusal mwamu kukutwish kukukwash kupandakan chaku chinech! Yawiy yom yajinguninay mwin Kristu umwing utazukinau anch David. Walonda anch: “Namulejamu tatuku kwa ayinetu. Nikezap kavuramen mazu malonday. Wantala nich masip ni kwinlej anch, ‘wasangaresh kal nakash mwanam.’ Wading wij anch changita kutakaman mulong wa kumulejamu. Mazu mend mankasikesha nakash ni makasikesha mupak wam wa kudandamen kurish nich chaku chinech.

“Kupwa tatuku wanleja maverse mamwing mankwasha kuman anch ‘nadingap muntu muyimp,’ ni makwau mankwasha kuman anch chaku chinech chid kamu chiyimp nakash. Wanleja ‘kwimik chaku chinech’ mu chisu kanang, ni kwisambin kand mulong winou chisu chikwau. Wanleja anch kangal naziy nakash anch nichuk kand kapamp kakwau, pakwez nisala usu wa kulik kuchirinamu kusal mwamu mu chisu chilemp.” Kwinsudiel David ulondin anch: “Kwikal ni mukwau mukwau wija mulong wam ni mwin kwinkwash yawiy yom yankwasha nakash.”c

[Mazu ma kwinshin]

VERSE MUJIM

“Chin maku mayimp ma mujimbu mading ma ku usand wey. Surab kutentam, ni ritiy, ni rukat, ni chisambu. Surab yom yiney pamwing nau antu akata kumulembil Nsalejetu nich michim ya zwang.”​—2 Timote 2:22.

CHIYUL

Lembil kurutu maku mikala makash. Mwita Yehova Nzamb akwinkisha “ukash upandakena ukash wawonsu” mulong wa kupandakan choziu.​—2 Korint 4:7.

OV, WIJ . . .

Muntu uziyina kakatap kujijamen maku mend ma kulalijan. Pakwez chitin kwikal ikundj mukash ap mband chifuvu mulong wa kwilam ap chisu udia amwiney.

cha kusal!

Nikutwish kudandamen kushinshikin pa yitongijok yiwamp anch ․․․․․

Pa ndond pa kusangaresh kwau maku mam, niku ․․․․․

Yom nikumwipula nvaj wam (anvajam) piur pa mulong winou yawiy ey ․․․․․

OV, UTONGIN NCHIK?

● Mulong wak chid cha usey kuvurik anch Yehova “ukat kulikishin”?​—Kuseng 86:5.

● Mulong Nzamb ndiy watutanga ni maku ma kulalijan, pakwez ndiy ulondina kand anch tufanyidin kwilam. Chinech chimekeshin anch ukwet kashinsh ik piur pey?

[Yidia pa paj 182]

Kudiosh kamu napadandakana mulong winou, nikala ni kom kishitwila kurutu kwa Yehova, ni nikatinap kushadish chom mud chinech!​—Sarah

[Chipich chidia pa paj 180]

Anch wawa chisu uyila mau, chinech chirumburikinap anch ufanyidina kuchirikin kwisambishil. Chilik chimwing, anch wachirikinamu kand kwichuk, chinech chirumburikinap anch kuya kurutu kwawonsu wasadina kal kud kwa chamwamu