DILEJAN 11
Ov, Mutapu ik Ukweta Mbil ja mu Bibil Ukwash Kudi Etu?
1. Ov, mulong wak tuswiridin umutakel?
Mutapu ik ukutwisha mbil ja Bibil kutukwash kukwat mipak ya kwiking nich?—KUSENG 36:9.
Sakatang wetu udi mwin manangu kutupandakanamu etu. Chidiay tatuku wa rukat, ndiy utubangidining. Chikwau kand, ndiy kasotiningap etu twikala ni want ipau piur pend. (Jeremiy 10:23) Mudi mwan mukemp nakash uswiridininga umutakel wa anvaj, etwawonsu tuswiridining umutakel wa Nzamb. (Isay 48:17, 18) Mbil ja mu Bibil jitwinkishining umutakel mudi chipan chidiokila kudiay Nzamb.—Tang 2 Timote 3:16.
Yijil ni mbil ja Yehova jitufundishin mulad wa mwom upandakena kuwap katat ni yitulejin mutapu tukutwisha kutambul difut dia chikupu mu machuku ma kurutu. Mulong Nzamb ndiy watutanga, chawiy, ndiy kamu umwing tufanyidina etu kwitiyij nich musangar ku umutakel wend.—Tang Kuseng 19:7, 11; Kujingunik 4:11.
2. Ov, mbil ja mu Bibil jimedin pa chom ik?
Mufulandal wa mbil ja mu Bibil wimedin pa uyakin. Ku mutambu ukwau, yijil akutwish kuyisadil mulong wa mikadil ya pakampwil. (Kuvurik Yijil 22:8) Tufanyidin kusadil ukaliweny wa kutong chakwel tutesha mutapu wa kusadil mbil mu mikadil ya pakampwil. (Jinswir 2:10-12) Chilakej, Bibil ulejen anch mwom udi chipan chidiokila kudiay Nzamb. Mbil yiney ya pa dishin yikutwish kututakel ku mudimu, ku chikumbu, ni pituyilinga mu weny. Yitutakedining kukwat mipak ya kwiking.—Tang Midimu 17:28.
3. Ov, jisu mbil jaad jidia ja kusambish?
Yesu wisambina pa mbil jaad ja usey nakash. Mbil yakusambish yimekeshin rutong ra mwom wa antu—ra kumwijik Nzamb, ra kumukat ni ra kumusadil nich kushishaman. Mbil yiney ya kusambish yifanyidin kuyishinshikin mu mipak yetu yawonsu. (Jinswir 3:6) Antu ashicha kwambatan nich mbil jinej akwikal mu urund uwamp ni Nzamb, musangar wakin, ni mwom wa chikupu.—Tang Mateu 22:36-38.
Mbil yakad yikutwish kututakel chakwel twikal mu urund usangareshina ni wa chisambu nau antu akwau. (1 Korint 13:4-7) Kusadil mbil yiney yakad kwitining kwimburij mutapu ukatay Nzamb kuyisadil antu.—Tang Mateu 7:12; 22:39, 40.
4. Ov, mutapu ik ukweta mbil ja mu Bibil ukwash kudi etu?
Mbil ja mu Bibil jifundishin majuku mutapu wa kwikal mu uumwing kusutil ku kwikal nich rukat. (Kolosay 3:12-14) Dizu dia Nzamb dichidijining kand majuku kusutil ku kumafundish umutakel ukwau—uruw winou ufanyidin kwikal wa machuku mawonsu.—Tang Disambishil 2:24.
Kusutil ku kulondul malejan ma mu Bibil, tukutwish kuchidij yom yetu ya kumujimbu ni yovil yetu. Chilakej, yisu yivud, amakurump a mudimu asotining in mudimu ashichinga kwambatan nich mbil ja mu Bibil ja kwikal mwin kashinsh ni mwin mushiku. (Jinswir 10:4, 26; Hebereu 13:18) Dizu dia Nzamb ditufundishining kand kwikal in kusanger yom yiswiridikina ni usey upandakena yom ya kumujimbu nich urund uwamp ni Nzamb.—Tang Mateu 6:24, 25, 33; 1 Timote 6:8-10.
Kusadil mbil ja mu Bibil kukutwish kutuking ku ukash wetu wa mujimbu. (Jinswir 14:30; 22:24, 25) Chilakej, kulam chijil chilikishina kukwachik maar chitukwashin kwipuk mayej makata kujipan ni maubaj. (Jinswir 23:20) Yehova utulikidining tuna maar malewishininga pakwez chifanyidinap kusutish chipim. (Kuseng 104:15; 1 Korint 6:10) Yijil ya Nzamb yitukwahsiningap ching kutufundish kulam yisal yetu pakwez yitufundishining kand kulam yitongijok yetu. (Kuseng 119:97-100) Chikwau, in Kristu akin kalimishiningap yany ya Nzamb mulong wa kutaninamu ayinau. Pakwez asadining mwamu mulong wa kumutumbish Yehova.—Tang Mateu 5:14-16.