Kumwifukwilany Yehova mu Dijuku

Mudi muwileja kal mu broshir winou, Bibil ukwet yany yivud yikeza kukukwash ey ni dijuku diey. Yehova usotin chakwel wikala nich musangar. Ndiy ushidilamu anch, anch watek difukwil diend pa ndond ya kusambish, “ukukuwejinanyaku yom yiney yawonsu.” (Mateu 6:33) Ndiy usotin chakin kamu wikala murund nend. Sadil chisu chey chawonsu chiukweta chakwel ukudisha urund wey wa piswimp ni Nzamb. Chinech chidi chisend chipandakena kujimb chikutwishay kwikal nich muntu mwin mwawonsu.​—Mateu 22:37, 38.

1 KASIKESH URUND WEY WA PISWIMP NI YEHOVA

CHILEJENAY BIBIL: “Am nikez kwikal tatukwen, niyen ukez kwikalany anam amakundj ni anam amband, mwamu mulondilay [Yehova].” (2 Korint 6:18) Nzamb usotin ey wikala murund nend wa piswimp. Kulembil yawiy njil yimwing ya kusal mwamu. Yehova ukwitin chakwel ‘ulembila pakad kulik.’ (1 Tesalonik 5:17) Ndiy udi tayad kutesh yitongijok ni yovil yey ya mukach. (Filip 4:6) Chisu ulembidila pamwing ni dijuku diey, awiy akez kumuman mutapu Nzamb udiay muntu wakin kudi ey.

Chikwau kand piwisambininga ni Nzamb, uswiridin kumutesh. Ukutwish kusal mwamu kusutil ku kwilej Dizu diend ni mikand yengamidina mu Bibil. (Kuseng 1:1, 2) Tongijokin pa yom yiwilejina. (Kuseng 77:11, 12) Kumutesh Nzamb kwitining kand anch ukumangana pakad kujing ku yikumangan ya in Kristu.​—Kuseng 122:1-4.

Kwisamb ni antu akwau piur pa Yehova udi mutapu ukwau wa usey wa kukasikesh urund wey wa piswimp nend. Piusadina usu wey wawonsu mwamu, ukez kwiyov anch udi kamu piswimp nend.​—Mateu 28:19, 20.

CHIUKUTWISHA KUSAL:

• Itekina chisu pichuku-pichuku cha kutang Bibil ni cha kulembil

• Piudianya mu dijuku, tekany pa ndond ya kusambish yisakin ya muspiritu pa ndond pa kwipan nakash mu kwipuwangesh ap mu kwiswedish

2 SANGERANY DIFUKWIL DIEN DIA MU DIJUKU

CHILEJENAY BIBIL: “Sejany piswimp kudi Nzamb, chad niyend ukusej piswimp ni yenen.” (Jakobu 4:8) Uswiridinany kwikal nich program ni kulondul pakad kujing program winou wa difukwil mu dijuku. (Disambishil 18:19) Pakwez, kudi yom yivud yiswiridikena. Nzamb ufanyidin kwikal chikunku cha kusambish mu mwom wen wa pichuku-pichuku. Kasikeshany urund wen wa piswimp ni Nzamb mu dijuku kusutil ku kwisambin piur pend “piukushakamanya mu yikumbu yen, ni piukuyanya mwi njil ni piukulalany, ni piukulankany.” (Kuvurik Yijil 6:6, 7) Tekany program winou ikala rutong rend mudi rutong radingay nich Joshua, palonday anch: “Am ni chikumbu cham tukumusadil [Yehova].”​—Joshua 24:15.

CHIUKUTWISHA KUSAL:

• Kwikal nich program wa kwilej chisu chawonsu kwitining ukwash wa chid ni chid cha dijuku dien