“Yitil Yey Ayilikishin Kal”

Antu adiokala kulemp atesha yom yasalay Yesu. Antu adiokala ku jindond jilemp eza mulong wa kutesh mafundish ni kuman yilay yasalay. Pakwez, kupwa kwa machuku makemp Yesu wachirika mu Kapernaum ndond yasadinay nakash mudimu wend wa kulejan. Pachirikay, rusangu rend rapalangana pakad kulab mu misumb yadinga ku chikum cha Karung wa Galalia. Mudi chibudikin, antu avud eza ku chikumbu chadingay Yesu. Amwing ading Afaris ni alej a Yijil adiokala mu misumb yawonsu ya Galalia ni mu Yudeya ni mu Yerusalem.

‘Chawiy antu avud akumangena kwinikwa, kikwashalap ndond mu chikumbu ap pol ku chis. Yesu wading ni kuyifundish.’ (Marko 2:2) Katat, chawiy chisu chikimbina kusadik yom yishimokishena. Yom yiney yawiy yikutwisha kutukwash kwijik anch Yesu ukwet usu wa kudiosh musul wa mar mawonsu marishiningau nich antu ni kuyichirishin antu atonday ukash wa mujimbu uwanyidina.

Padingay Yesu ukat kufundish chisak cha antu chadinga mu chikumbu, amakundj anying ading amusendin muntu umwing wadinga ni mayej ma kalip pa ulal. Akimba anch Yesu amwoka murund nau. Pakwez, mulong mu chikumbu mwadinga antu avud nakash, “akanganya kumusejish muyej piswimp kudi [Yesu].” (Marko 2:4) Tong bil mutapu waziyau. Chawiy akandama pa nsiny, abuza dipan mulong wa kwandjikinamu ulal pading palelay muyej winou. Amwandjikina muyej wa kalip wading pa ulal pa dipan dined.

Ov, Yesu wajimana pa mulong winou? Bwat! Pakwez, ndiy washimoka nakash mulong wa ritiy rau ni wamuleja muyej winou anch: “Yitil yey ayilikishin kal.” (Mateu 9:2) Ov, nlel unou Yesu ukutwish kand kulikishin yitil? Alej a yijil nau Afaris atongina nakash pa mulong winou ipulijana anch: ‘Ov, mulong wak muntu winou chilondilay mwamu? Ndiy ukat kumusaal Nzamb masaal. Nany ukutwisha kulikishin yitil, ching ndiy umwing Nzamb?’—Marko 2:7.

Pajinguninay Yesu yitongijok yau, ndiy wayipula anch: ‘Ov, mulong wak winlondodinanya mu michim yen mulong wa yom yiney? Ov, chipipela chisu, kumwel muyej wa kalip ou anch, ‘Yitil yey ayilikishin kal,’ ‘Tumbuk, zambul ulal wey uya kwey?’ (Marko 2:8, 9) Mwaning, kukwatijan ni yakupesh yapanay Yesu, komb chadinga chom chimuswapedina Yesu kumulikishin muntu winou yitil yend.

Kupwa, Yesu wamekesha patok kudi antu awonsu ni kudi antu akwau ading amulondina nayimp anch wading ni ulabu wa kulikishin yitil ya pa mangand. Chawiy lel, ndiy wakarumuka wamutal muyej winou wa kalip ni wamuleja anch: “Tumbuk, zambul ulal wey, yang kwol kwey.” Antu awonsu amumana muyej wa kalip palankay, wanon ulal wend, wabudik, waya. Antu ashimoka nakash! Chad amushimana Nzamb anch: “Etu kand kal tumanap chom mudi chinech”!—Marko 2:11, 12.

Chidi cha usey kwijik anch Yesu wamekesha kukwatijan kudia pakach pa yitil ni mayej, kulikishin kwa yitil ni kwawiy kukwatijadin ni kuyerik. Bibil utufundishin anch nvaj wetu wa kusambish Adam wasala chitil chawiy etu awonsu twaswana yibudikin ya chitil chinech, mayej ni rufu. Pakwez, mu winyikel wa Want wa Nzamb, Yesu ukez kulikishin yitil ya antu awonsu amukatina ni amusadidina Nzamb. Kupwa, mayej mawonsu akez kumadiosh chikupu.—Rom 5:12, 18, 19.