Ulejen Mu Galalia Ni Uyifumbin Atwimbuy

Yesu wasala nakash mudimu wa kulejan mu mivu yaad. Ov, wading ni chisu cha kwiswedishaku? Kadingap nich chisu cha kwiswedish, mulong Yesu wasala nakash mudimu wend wa kulejan, “watambitamba mu misumb yawonsu ni mu mal [ma Galalia], ni kulejan mu masinagog mau, wading ni kulejan rusangu ruwamp ra Want ni kwok mitapu yawonsu ya misong ni mitapu yawonsu ya yisarok.” (Mateu 9:35, TMK) Yom yamanay yawiy yamwinkisha kashinsh ipana nakash mu mudimu wa kulejan. Mutapu ik wawanyishay mudimu winou?

Padingay ni kuya mu weny, Yesu wamana anch antu ading ni kuswir kwa kuyok ni kuyongoj kwa muspiritu. Ading mudi amikoku akad kwikal ni kafung ading ni kutambitamb ni kupalangan. Yesu wayovila riy chawiy chayilejay in kwilejend anch: “Yakwangul yidi yivud, pakwez in mudimu wa kwangul adi akemp. Mulembilany mwin chir chakwel ukutum in mudimu wa kwangul avud.”—Mateu 9:37, 38.

Yesu wading wij mutapu wa kuyikwash. Yesu wapana mbil kudi atwimbuy end 12 ni wayangana aad aad chawiy wasala yisak ya in kulejan musamban. Chawiy wayinkisha kand mbil yovikena anch: “Kangal wandamany mwi ngand ya in michid yikwau, ap mu mal ma in Samaria. Pakwez yangany kudi in Isarel, awiy adi mudi amikoku ashadikina. Yangany, [ukalejanany] anch: ‘Want wa mwiur udi piswimp!’”—Mateu 10:5-7.

Want wayau kulejan atwimbuy udi Want wisambinay Yesu mu malembil ma chilakej. ‘Want wa mwiur udi piswimp’ chirumburikin anch Nzamb wamutondin kal Yesu Kristu kwikal Mwant, ni Yesu udiaku. Chom ik chimekeshina chakin kamu anch in kwilejend awiy akwikala mu Want winou? Mulong Yesu wayinkisha usu wa kwok nich ayej, kuvumbul afu, ni kusal yom yikwau. Mutapu ik atwimbuy mwafanyinau kuwanyish maswir mau mudi yakudia ya pichuku pichuku?

Yesu wayileja in kwilejend anch kangal arijeka yom yifanyidinau kuya nich pakuyau mu mudimu wa kulejan. Awiy kafanyinap kusend mu antwuku au yom mudi utad wa or, wa argent ap wa bronze. Awiy kafanyinap kand kusend yakudia yivud mulong wa weny wau ap kusend masun ni yisapat. Mulong wak? Mulong Yesu wayikasikesha anch: “Mwin mudimu uwanyidin yakudia yend.” (Mateu 10:10, TMK) Antu ela kusanger uruu wayau kulejan in kwilej, awiy antu afanyina kuwanyish maswir ma pakampwil ma in kulejan. Yesu walonda anch: “Anch washikany mu ul, shakamany mu chikumbu chikukwakanyau djat ni piukudiokalanya mu ul winiwa.”—Marko 6:10.

Yesu wayinkisha kand mbil jikwau piur pa mutapu ukusalau anch amutan muntu kwol kwend kurutu amuleja uruu wa Want, palonday anch: “Piukwandamanya mu chikumbu, yilangwishany anch: ‘chisambu chikala ni yenen.’ Anch in chikumbu chinech akwakany, chad kulangwish kwen kwa chisambu kukwikal kudi awiy. Pakwez anch kakwakinanyap nawamp, chad kulangwish kwen kwa chisambu kukuchirikinany ayinen. Anch kakwakinanyap nawamp mu chikumbu ap mu musumb, ap anch kakuteshilanyap, diokalany mwi ndond yiniya, ukukukumunany rufunfut ra mu yidjatil yen.”—Mateu 10:12-14.

Yisu yimwing chela kushiken anch pakwandamau mu musumb ap mu ul antu amwing akutwish kulik kwitiy uruu wau. Chom ik chafanyinau kusal mu jindond mudi jinej? Yesu wamekesha anch kwikal nich chitongijok chiwamp pa mulong winou chawiy chela kuyikwash. Chawiy wayileja anch: “Nakulejany chakin, Dichuku dia Dirumburish dia Nzamb, ndiy ukez kuyovil in musumb wa Sodom ni wa in Gomor riy kupandakanamu antu a musumb winiwa.”—Mateu 10:15.