Mwan A Nzamb—udi “Chimunyik Cha Mangand”

Dichuku dia nsudiel dia Musambu wa Minkand diading dichuku dia sambwad, Yesu wading ufundishin mu kapalikany kamwing kading mu tempel mwadinga “chipau.” (Yohan 8:20; Luka 21:1) Chimeken anch chipau chinech chading mu Dibur dia Amband, mwawiy mwatekangau antu milambu.

Uchuku pading pasadikina musambu, ndond yiney yading nich chitokish. Kwading malamp manying majim, malamp mawonsu mading ni malong manying mizwila many. Malamp minam matokishang nakash ndond yijim. Chawiy, yom yalonday Yesu yafanyina kuyivurish pamwing ap in kumutesh end pa mulong wa kumunyik kwinoku palonday anch: “Am yam chimunyik cha antu a pa mangand. Muntu mwawonsu [ukwinlondula] am, ukez kwikal nich chimunyik cha mwom wakin, kakez kwendilap kand mu mididim, bwat.”—Yohan 8:12.

Afaris kitiyap mazu minam malonday Yesu chawiy, alonda anch: “Katat ey ukat kwilondilap uman wey amwiney. Mazu mey madi kwau mamwamu.” Yesu wayakula anch: “Bwat. Ap anch nalondap nchik mwamu, uman wam udi wakin, mulong nij kunidiokila ni kuniyila. Pakwez, en kiwijanyap kunidiokila ni kuniyila am.” Walonda kand anch: “Mu Yijil yen afundil anch: ‘Anch uman wa atuman aad wilikan, yom yilondilau yidi yakin.’ Am nikat kwilejenap uman wam amwinam, chad Tatuku wantuma am ukat kwinlejen kand uman.”—Yohan 8:13-18.

Afaris kitiyap chitongijok chinech chawiy, ipula anch: “Ov, Tatukwey udi kwisu?” Yesu wayakula pakad wom anch: “En kiwingijanyap am, kiumwijanyap kand Tatukwam. Anch en wingijany am, ing wamwijikangany kand Tatukwam.” (Yohan 8:19) Ap anch Afaris adandamena kukimb mutapu wa kumukwat Yesu, pakwez, kwikil muntu watwisha kumukwat.

Yesu wachirikina mazu masambelay kulond anch: “En ukez kwinkimbany, pakwez ukez kufilany mu yitil yen, kiukutwishanyap kuya kuniyila am.” In Yuda kateshap kurumburik kwa mazu minam malonday Yesu ni asambisha kwiyipul anch: ‘Ukwijip amwinend, chawiy chilondinay anch, kuniyila en kiukutwishap kwezaku?’ Awiy kateshap kurumburik kwa mazu malonday Yesu, mulong kadingap ija ndond yadiokalay. Chawiy, ndiy warumburila anch: “En udiany a pa mangand, pakwez am nidiokil mwiur. En udiany antu a pa mangand minam, pakwez am kinidiap muntu wa pa mangand minam.”—Yohan 8:21-23.

Yesu wisambina mwom wend wadingay nich mwiur kurutu avadika ni ashikena kwikal Mesia washilaumu ap Kristu wading uchingedinau kuman kudi antakel a chirelijon. Chawiy, awiy amwipula Yesu nich chibud chawonsu anch: “Ov, yey nany?”—Yohan 8:25.

Mulong alika kumwitiy Yesu, chawiy ndiy wayakula anch: ‘Ov, Am kinakulejanyap kal mudi munidia kudiokal pinasambishila?’ Chawiy, ndiy wadandamena kulond piur pa Tatukwend ni wayileja in Yuda anch afanyidin kumutesh Mwan, palonday anch: “Pakwez ndiy wantuma am udi mwin yakin. Am nikat kuyilej antu a pa mangand yom ching yinatesha kudi ndiy.”—Yohan 8:25, 26.

Kupwa, Yesu wamekesha ruchingej rend rading ritekinay mudiay Tatukwend, walikau kwitiyij kudiau in Yuda, kupwa walonda anch: “Piukeza kumuzambulany Mwan a muntu, pawiy ukeza kwijikany en anch, [am] yam ndiy. Chad ukez kwijikany anch, kinikat kusalap chom ku ulabu wam amwinam, pakwez nikat kulond kusu ching yom yanlejay Tatukwam kulond. Ndiy wantuma am udi pamwing ni yamam. Ndiy kanshilap amwinam, mulong yisu yawonsu nikat kusal yom ya kumusangarish ndiy.”—Yohan 8:28, 29.

Pakwez, kwading in Yuda amwing ateka ritiy rau mudiay Yesu, chawiy Yesu wayileja anch: “Anch en waziyilany malejan mam, en udiany in kwilejam chakin. Ukez kwijikany uyakin, chad uyakin ukez kukukwolany.”—Yohan 8:31, 32.

Kudi in Yuda akwau, kuyilej anch akukolik kateshap kurumburik kwa mazu minam. Alika mazu minam chawiy alonda anch: ‘Etu tudi a mbut ya Aburaham, kand kal atupitap mu uswik kudi muntu. Ov, mazu miulondila anch: ‘Akez kukukolany’ marumburikin ik? In Yuda ading ij anch yisu yimwing ading mu uswik mwi ngand ya wingendj, chawiy chalikau kuyitazuk anch aswik. Pakwez, Yesu wayileja patok anch adandamedin kwikal aswik, palonday anch: “Am nikulejinany chakin, muntu mwawonsu ukata kusal chitil udi muswik wa chitil.”—Yohan 8:33, 34.

Palikau kwitiy anch ading mu uswik wa chitil, in Yuda iteka mu ubaj. Yesu warumburila anch: “Muswik kakushakamangap mu chikumbu chikupu; mwan ndiy mwin kushakam chikupu. (Yohan 8:35, TMK) Muswik kakwetap mbil ya kutambul uswan mulong dichuku dimwing akez kumwopat. Ching mwan uvadikina mu dijuku ap ulidinau mu dijuku dined ndiy ukushakam “chikupu,” chawiy chirumburikina anch ukushakam kamu rawonsu.

Chawiy komb, uyakin piur pa Mwan wawiy ukata kuyikol antu chikupu ku rufu ra chitil. Yesu walonda anch: “Anch Mwan. . . wakukwolany en, ukez kwikalany ant ipen chakin.”—Yohan 8:36.