Tenchik Machuku Ma Kurutu —Mu Kusadin Manangu

Chishimu chalonday Yesu piur pa mwan washadika, chafanyina kuyishimokish nakash in kulandish yitad, alej a yijil nau Afaris amutesha anch Nzamb ukat kuyilikishin akayitil akata kukarumuk. (Luka 15:1-7, 11) Kupwa, Yesu wayileja in kwilejend. Pakwez, ndiy wasadina chishimu chikwau piur pa mpich walejau anch mwin mudimu wend ap kashalapol wend kalaminap nawamp yom yamwinkishau.

Yesu warumburila anch kashalapol winou amufunda mulong wading usadidin nayimp mapit ma mwant wend wa mudimu. Chawiy, mwant wa mudimu winou walonda anch chifanyidin kumudiosh kashalapol winou pa mudimu. Kashalapol wiyipula anch: “Mwant wam ukwindiosh ku mudimu, ov, nikusal nchik? Am kinikwetap usu wa kutap pansh, chad nikwov usany pa kwitol.” Kashalapol winou wakimba mutapu wa kudimban chawiy chalonday anch: “A! Katat nijik kal chom cha kusal chakwel anch andiosh ku mudimu, nikez kuman arund akeza kwingak.” Pakad kulab ndiy wayitazuka antu ading ni yikal kupwa wayipula anch: “Ov, chikal ik chiukweta cha mwant wam?”—Luka 16:3-5.

Muntu wa kusambish wamwakula anch: “Nikwet chikal cha ansab ajim chitot a many ma mpach.” Ansab inay akutwish kubudish malitre ma many 2 200. Chimeken patok anch muntu winou wadinga ni chikal wading nich chir chijim cha mitond ya mpach yabudishang many mavud malandishangay. Kashalapol wamuleja muntu winou wading ni chikal anch: “Shakam pinap, fund kwey ansab makum matan [malitre 1 100].”—Luka 16:6.

Kashalapol wamwipula muntu mukwau wading ni chikal anch: “Ov, ey niyey, chikal ik chiukweta?” Ndiy wamwakula anch: “Nikwet chikal cha antwuku yitot yitan ya tidiku.” Antwuku inay ela kubudish malitre 22 000. Wamuleja muntu winou anch: ‘Kwat mukand wey, fund kwey antwuku makum chinan.’ Kashalapol winou wamudioshinamu uvud wa 20 pa chitot.—Luka 16:7.

Pakwez, kashalapol winou wading udandamedin kulam nfalang ja mukurump wend, chawiy chatwishay kukepish uvud wa nfalang jafanyinau kumwinkish mwant wend wa mudimu. Pakepishay yikal, kashalapol winou wata urund nau antu afanyidina kumukwash anch amwopat ku mudimu wend.

Pa chisu chinech mwant wa mudimu wend wajingunina yom yasalay kashalapol. Ap anch mwant wa mudimu washadisha yom yiney, pakwez, ndiy wamushimana kashalapol wend ‘ap anch wading wakad kutentam’ mulong ndiy ‘wasadina manangu.’ Yesu walonda kand anch: “An a mangand a mu chirungu chinech ayipandakenamu an a mu kutok kubabal.”—Luka 16:8, TMK.

Yesu kafishap nich mitapu yasadinay kashalapol winou ap kalondap nayimp piur kusal midimu ya kwisak. Chom ik chakimbay kulond? Ndiy wayikasikesha in kwilejend anch: “Ikalany ni arund kusutin dipit diakad kutentam chawiy pidikeza kuburen kudi en ni awiy akez kukwakany en mu yikumbu yau chikupu.” (Luka 16:9, TMK) Chakin kamu, mu chishimu chinech mudi dilejan dia usey nakash ditadila kudimuk ni mutapu wa kusadin manangu. Atushalapol a Nzamb adia “an a mu kutok,” afanyidin kusadin nich manangu yom yau ya kumujimbu oku atongidin pa mwom wau wa mu machuku ma kurutu.

Yehova Nzamb amwinend pamwing ni Mwanend awiy kusu akutwisha kumwak muntu ukwandama mu Want wa mwiur ap mu Paradis panap pansh mu winyikel wa Want. Tufanyidin kuta urund pamwing nau kusutil mu kusadin mapit metu ma kumujimbu mulong wa kukwash yisakin ya Want. Tukwet kashinsh anch akutwinkish mwom wa chikupu mu machuku ma kurutu chisu chikusheshika mapit metu ma kumujimbu mudi utad wa or, wa argent ni yom yikwau ya usey.

Yesu walonda kand anch antu amekesha kushinshaman mu yom yikemp ap asadina mapit mau, antu inay akez kwikal kand ashinshamena mu kulam yom ya usey nakash. Yesu walonda anch: “Chad anch ey kiwadiap mwin yakin mulong wa mapit ma pa mangand minam, ov, akutwish nchik kukwinkish mapit makin [mudi yisakin ya Want]?”—Luka 16:11.

Yesu wayileja in kwilejend anch akez kayit yom yivud anch akimbin anch ayaka “mu yikumbu yau chikupu.” Muntu kakutwishap kwikal kashalapol wakin wa Nzamb oku udi kand kashalapol muyimp wa mapit ma kumujimbu. Chawiy, Yesu walonda mazu mend ma nsudiel anch: “Kwikil kashalapol ukutwisha kuyisadil ansalejend aad. Ukumukis umwing, chad wamukat mukwau, ap ukumulimish umwing, chad wamudiul mukwau. Kiukutwishanyap kusadil kapamp kamwing Nzamb ni mapit ma pa mangand.”—Luka 16:9, 13.