‘Nikez Kumukimb Ushadikina’

Mukoku ukata kujiljil. Padilay masuku mwimpat, ukat kuya kulemp mu kwaurik ni amikoku akwau. Kupwa, kakutwishap kuma chisak cha amikoku akwau ap kafung. Uchuku wasej piswimp. Washadik mwi nkurubuk mudia anam a chidiany, mukoku udi kwend wakad diking. Kupwa, watesh dizu dijay—dia kafung, uyila mau kudiay mukoku, wamusend, wamutek mu kabwik wend ni kumutwal ku chikumbu.

YEHOVA wiyisikejin amwinend tupamp ni tupamp kamu ni kafungu mudi winou. Mu Dizu diend utukasikeshin anch: ‘Yam amwinam ni kukimba amikoku am ni kuyilam.’—Ezekiel 34:11, 12.

‘Amikoku Anikata Kulam’

Anany adia amikoku a Yehova? Chiswapel kulond anch amikoku a Yehova adi antu amukatina ni akata kumwifukwil. Bibil ulondin anch: “Ezany tuzengamany pansh kumwifukwil Ndiy, twasany manungin pansh kurutu kwa [Yehova] watutanga. Mulong Ndiy Nzamb wetu, niyetu tudi antwend, tudi amikoku end, Ndiy ukututakel.” (Kuseng 95:6, 7) Mudi amikoku akashinsh amulondwila kafung, in kumwifukwil Yehova akwet mushiku wa kumulondul Kafungu wau. Ov, kakwetap yilim? Bwat. Yisu yimwing atushalapol a Nzamb ading “amikoku end ading apalangena,” “amikoku ashadikina,” ni “mudi amikoku ashadikina kal.” (Ezekiel 34:12; Mateu 15:24; 1 Pita 2:25) Ap mwamu, anch muntu washadik, Yehova kakatap kumulik, ukat kumuchingejinang anch ukuchirik kand.

Ov, wiyovil anch Yehova uchidandamedin kwikal kafungu wey? Mutapu ik umekeshinay Yehova kwikal Kafung nlel unou? Shinshikin mitapu yisatu:

Utudishin muspiritu. Yehova ulondin anch: “Nikez kuyidish ni kuyichidijil mu jinkurubuk ja mikandu ni mu madil mawamp mawonsu.” (Ezekiel 34:14) Yehova kandikal akanganyap kutwinkish yakudia ya muspiritu kushalijan yikasikeshina ya pa chisu chifanyidina. Ov, ukutwish kutongin pa mutu wa mulong kanang, pa diskur ap video wakula ku malembil mey ma kukimb ukwash? Ov, chinech chakwinkishap kashinsh anch Yehova ukat kukubangin?

Ukat kutuking ni kutulam. Yehova wakana anch: “Nikez kuyisurab [kuyikimb] ashadikina, ni kuyichirish aya kulemp, ni kuyikas pa yitat, ni kuyok ayedila.” (Ezekiel 34:16) Yehova ukat kuyikasikesh antu ayedila ap akweta yakamish yikash. Uyilamin amikoku end, uyikwashin chakwel akasikana anch ayisala nayimp—pamwing ap kudi ambay nau akaritiy. Ukat kuyichirish ashadika ni arishina ni yovil yiyimp.

Wij anch udi ntakel wetu. Yehova ulondin anch “Nikez kuyipandish ku jindond jawonsu japalangenau. Nikez kuyikimb ashadikina.” (Ezekiel 34:12, 16, NWT) Kudiay Yehova, mukoku ushadikina, kadiap wakad kutwish kukarumuk. Wij chisu chiburedinay mukoku winou, ukat kumukimb ni kusangar anch wamuman. (Mateu 18:12-14) Kupwa, uyitazukin in kumwifukwil end akin anch “amikoku am, chisak chinikata kudish.” (Ezekiel 34:31) Udi umwing wa amikoku inay.

Kudiay Yehova, mukoku ushadikina, kadiap wakad kutwish kukarumuk. Ukat kusangar anch wamuman mukoku shadikina

“Twinkisha Machuku Masu Mudi ma Pasak”

Mulong wak Yehova ukukimbin ni ukwitin kumuchirikin? Mulong usotin ey wikala nich musangar. Wakana anch: “ukez kunakish ruvul wa yiyukish” mulong wa amikoku end. (Ezekiel 34:26, NWT) Kwinoku kudiap kushilamu kwa chamwamu. Wimenap kal amwiney uman kanang.

Vurik mutapu uwadinga pa chisu washikena kumwijik Yehova. Chilakej, ov, mutapu ik wiyova pawileja kapamp ka kusambish uyakin usangareshin piur pa dijin dia Nzamb ni rutong rend piur pa antu? Ov, uvurikin mutapu chadinga chikasikeshina pa kukumangan pamwing ni ambay in Kristu ku yitentam? Piwatwisha kumulej muntu kanang wamekesha kusanger kwakin rusangu ruwamp, ov, kiwachirikap ku chikumbu ni musangar ujim nakash?

Ukutwish kuchirish musangar winou. Atushalapol a Nzamb a pasak alembila anch “A! Yehova, tuchirisha kudi ey, ni tukuchirik ayinetu kudi ey. Twinkisha machuku masu mudi ma pasak.” (Madil ma Jeremiy 5:21) Yehova wakula ku malembil minam, ni antu end amuchirikina chakwel kumusadil nich musangar usu. (Nehemiy 8:17) Yehova ukusal chilik chimwing ni yeyey.

Nikatat, kumuchirikin Yehova kuswapel kulond kupandakanamu kusal. Shinshikin yikokujol kanang ya kumuchirikin ni mutapu ukutwisha kuyipandakan.