Mulong Wak Kwiyakamish Piur pa Mujimbu Wam?

CHOM IK UFANYIDINA KUSAL?

Tongin bil chom chinech: Pitadinay Julia mu dikalash, yawonsu yimenay yijimbin. Wilondidin anch: “Nifanyidin kuumaku.”—ap anch anvaj ni arund nend amulejin anch “uumin.”

Machuku ma kwinyim, Julia watonga piur pa kukwat mupak wa kushadish “akilo ap atan.” Yom yafanyinay kusal yading kulalaku ni nzal machuku makemp . . .

Anch wiyov mudi mwiyovay Julia, ov, ukusal nchik?

TONG BIL!

Chiyipinap kwiyakamish piur pa mutapu udia mujimbu wey. Pakwez, Bibil ulondin nawamp piur pa mujimbu wadingau nich amband ni amakundj mudi Sara, Rachel, Abigayil, Josef ni David. Bibil ulondin anch mband utazukinau anch Abishag wading “wa chifu cha ufun nakash.”—1 Ant 1:4.

Pakwez, ansand avud akat kubangin nakash mijimbu yau. Chinech chikutwish kulet milong yikash. Shinshikin bil:

• Rapor umwing ulejen anch ayangadim 58 pa chitot atongin anch ajimbin nakash, chad komb 17 pa chitot awiy kwau ajimbina.

• Rapor mukwau ulejen anch amband 45 pa chitot atongina anch aumin pakwez akwet akilo avud!

• Mu usu usadinau mulong wa kushadish akilo, ansand amwing akat kushiken ku kushadish impu yakudia—karumbangesh ka kulik kov impu yakudia chom ap chimwing.

Anch wasambish kov impu ya kulik kudia chom ap karumbangesh kin kawonsu ka mukan, it ukwash. Muleja nvaj wey ap muntu mukurump uchingejidina. Bibil ulondin anch: “Murund [muwamp] ukat kumekesh rukat machuku mawonsu. Mwanamaku wavadika mulong wa kukwash mu yom yikash.”—Jinswir 17:17.

YOM YIWAMP UKUTWISHA KUSAL!

Chakin, wuntu wa mukach wawiy ukweta usu wa kupwit antu ap kuyichinish. Shinshikin chilakej cha Abisalom mwan wa Mwant David. Bibil ulondin anch:

“Mu Isarel mwawonsu kimwadingap muntu ap kusu umwing wa ufun mudi Abisalom. . . . Wading wakad ulim.”—2 Samwel 14:25.

Pakwez, nsand winou wading ni chibud nakash, mwin kukimb yom yijim, ni mwin matung! Chad Bibil kalondinap mu uwamp piur pa Abisalom; umumekeshin mudi muntu uburedina kushinshaman ni ukweta rikis ra kujipan.

Chawiy Bibil utwinkishin chiyul chinech:

‘Djalany muntu musu.’—Kolosay 3:10.

“Kangal wikalany in kwiwapish ku mujimbu kusu . . . , ikalany ni untu uwamp ujingamina mu muchim.”—1 Pita 3:3, 4, TMK.

Ap anch chiyipinap kukimb kwikal wa ufun kudi antu, pakwez wuntu wa mukach wawiy udia wa usey nakash kusutamu kuwap kwa chifu. Kupwa, mikadil yey ya muspiritu yawiy yikupwita antu eza kudi ey kusutamu kwikal ni mujimbu ap chifu cha ufun! Changadim utazukinau anch Phylicia ulondina anch “ufun ukat kupwitang antu swa, pakwez wuntu wa mukach ni mikadil yey yiwamp yawiy yikutwishau antu kuvurik swa piur peyey.”

EY NI WUNTU WEY WA MUKACH

Ov, ukat kunengananang yisu yimwing mulong wa mutapu uudia?

Ov, ukat kutongang anch akutwish kukubaril mulong wa kukurijek ap kujil yakudia mulong wa kuwapish mujimbu wey?

Chom ik cha ku mujimbu wey ukutwisha kuswimp anch ukatin? (Tek chijingidij ku chakul chey.)

• CHIMBU

• AKILO

• NSUCH

• MUTAPU UDIA MUJIMBU

• CHIFU

• ULOMBU

Anch wakulang anch mwaning ku yakul yaad yakusambish ni kutek chijingidij ku yipul yikwau yisatu, shinshikin chom chinech: Antu akwau akutwish kukuman nawamp kusutamu mutapu wimena amwiney. Chiswapel kwiyakamish nakash piur pa mutapu udia mujimbu wey.—1 Samwel 16:7.