CHIPUL CHA 5

Nikusal Nchik Anch Ansarumun ku Shikol?

MULONG WAK CHIDI CHA USEY

Mutapu wey wa kwakul ukutwish kuwapish yom—ap kuyiyipish.

**CHOM IK UFANYIDINA KUSAL?**

Tongin bil chom chinech: Thomas kakatinap kuya ku shikol nlel. Ap diamashik. Ap dichuku dikwau. Mulong winou wasambisha kupwa kwa angond asatu chisu chapalangeshau arund nend a ku shikol jinsangu jiyimp piur pendendiy. Kupwa asambisha kumupil majin. Yisu yimwing ansand amutambulang ma kaye ni asalang mudi kamenap, ap umwing wa mu chisak chau wamubachika, ni pakarumukay Thomas mulong wa kutal, kamanap nany wasala kal mwamu. Chikwacha, wom wa Thomas wapandakana chisu chatambulay mesaj mayimp ma kumusarumun pa Internet . . .

Anch yeya wadia Thomas, mutapu ik wela kwakul?

TONG BIL!

Uburedinap kamu kwey usu! Pakwez, ukutwish kurish ni kusarumun kwinoku pakad kusadin matend. Mutapu ik?

KANGAL WAKUL. Bibil ulondin anch: “Chisup ukat kumekesh ujim wend wawonsu, pakwez mwin manangu ukat kuudutish.” (Jinswir 29:11) Anch waninet— mu chisu chiwanyidina—antu akusarumwina akulik.
KANGAL WASAL UYIMP. Bibil ulondin anch: ‘Kangal wachirishany uyimp ku uyimp.’ (Rom 12:17) Kukimb kufundakesh kukat kuyipishang yom.
IPUK MILONG. Bibil ulondin anch: “Muntu wa manangu anch waman yom yikash, ukat kujingam.” (Jinswir 22:3) Anch kudi mutapu, ipuk antu akutwisha kuletish milong ni ipuk yom yikutwisha kusal anch antu akusarumuna.
SAL USU WA KWAKUL NAWAMP. Bibil ulondin anch: “Kwakul kwa kalimish kukat kudiosh ujim.” (Jinswir 15:1) Ukutwish kusalaku ap maswimbu. Chilakej, anch mwin kukusarumun wakwel anch ujimbin nakash, ukutwish kusil makij ni kulond anch, “Nitongin anch nikutwish kushadishaku a kilo!”
YANG KWEY. Nora ukweta mivu 19 ulondin anch “kuninet kukat kumekesh anch udi muntu wapamina kal ni ukwet usu kumusutamu muntu ukusarumwina. Kukat kumekesh kwitudish—chom chiburedinay mwin kukusarumun.”—2 Timote 2:24.
ICHINGEJINA AMWINEY. In kusarumun akutwish kujingunin muntu wakad kwichingejin ni wakad kutwish kupwish milong yend. Chad, in kusarumun avud akat kuziyang anch aman anch uyakwilap.
MULEJAMU MUNTU MUKWAU. Mulej umwing ulondin anch: “Niyikasikeshin antu awonsu asarumwinau chakwel alonda piur pa mulong winou. Chiwapin kusal mwamu, ni chikutwish kumuchidij muntu chakwel kangal amusarumun kand.”

Nsand umwing ukwet kashinsh kurutu kwa mwin kumusarumun — Kwichingejin amwiney kukutwish kukwinkish usu kusutamu ukwetay mwin kukusarumun

**YIPUL PIUR PA KUSARUMUN**
MWAWIY AP BWAT	YAKUL
1 Kusarumun kwasambisha kudiosh kamu pakuru.	1 Mwawiy. Chilakej, Bibil ulejen piur pa Anefilim—dijin dined dirumburikin “Antu Akata Kuyiwish Akwau Pansh.”—Disambishil 6:4.
2 Kusarumun kudiap kwau kwa ubaj nakash. Madi kwau maswimbu.	2 Bwat. Kusarumun kukat nikwawiy kuyibachik ansand avud ku kwijip.
3 Mutapu uwamp wa kumuninetish mwin kukusarumun udi kubulijan nend.	3 Bwat. Yisu yivud in kusarumun akweting usu kuyisutamu antu asarumwinau, komb chidiap kwau cha usey kuchirish uyimp ku uyimp.
4 Chiwapin kwau kuninet anch waman anch amusarumwin muntu kanang.	4 Bwat. Pa mulong winou, kwikil kaman wakad mulong. Anch waman muntu amusarumwin ni walik kulondap chom, ukutwish niyey kwikal ni mulong anch waninet.
5 Anch wakul kwey nawamp, in kusarumun akat kuchin.	5 Mwawiy. Ap anch in kusarumun amwing akat kupimang, akat kusalang mwamu mulong wa kuyiziyish antu asarumwinau.
6 In kusarumun akutwish kuswimp.	6 Mwawiy. Anch ayikwash, in kusarumun akutwish kuswimp yaku yau ni mutapu wau wa kutong.