Nzamb Watanga Ikundj ni Mband Wakusambish

Yehova wadima chir pa ndond yitazukinau anch Eden. Mu chir, mwading yisalamb, mitond yivud, ni annam. Kupwa Nzamb wamutanga muntu wa kusambish, dijin dend: Adam, wanona divu, wadisal muntu, wamupepin mu mazwur rinkind wa mwom. Wij yashikena? Muntu wikala mwom! Yehova wamwinkisha Adam mudimu mu chir, ni wamuleja kupil annam awonsu majin.

Yehova wamwinka Adam chijil cha usey. Wamuleja anch: ‘Ukutwish kuda kwey mabuj ma mitond yawonsu ya mu chir. Pakwez dibuj da mutond ou wa ronganyin ra kuwap ni kuyip kangal kudida. Mulong dichuku diukeza kudida, chakin ukez kufa.’

Kupwa, Yehova walonda anch: ‘Nikimbin kumusadin Adam mwin kumukwash.’ Wamuladika Adam tul tukash, ni wadosha rubavu ra Adam wamutang nich mukajend. Dijin dend wading Ev. Adam ni Ev asala dijuku da kusambish. Mutapu ik wiyovay Adam pamumanay mukajend? Adam wova musangar nakash ni walonda anch: ‘Tal chom chasalay kal Yehova ni rubavu! Chawiy! Winou ud muntu mud am.’

Yehova wamuleja Adam ni Ev kuval an ni kwizwish divu. Wakata anch asala mudimu ni musangar mulong wa kusal divu dakabuj dikal paradis, ap ndond yiwamp ya kulamin annam, mud chir cha Eden. Pakwez yom yasadikap mu mutapu winou. Mulong wak? Tukwilej yom yivud mu shapitre wambakedinap.