Yehova Umutumin Yeremiy Kuya Kulejan

Yehova wamutonda Yeremiy kwikal muprofet wa antu a mu Yuda. Wamuleja kuyilej antu rusang ruwamp ni kuyibabesh chakwel alika kusal yom yiyimp. Yeremiy walonda anch: ‘Pakwez, am nichid kwam nsand. Nikutwishap kulond kurutu kwa antu.’ Yehova wamuleja anch: ‘Kangal wov wom. Nikukulej yom yiufanyidina kulond, ni nikukukwash.’

Yehova wamuleja Yeremiy atazuka amakurump awonsu a antu, chakwel apuchola nnung ya kam kurutu kwau ni ayileja anch: ‘Yerusalem akumupuchol mud nnung ya kam yiney.’ Chisu chalonday Yeremiy piur pa yom yamulejau kud Yehova, amakurump ajimana nakash. Mwin kupesh Pashur wamubula Yeremiy ni wamuteka makas ni mend mu mabay ma kufuril ni ma kupamp nich jimbwambu. Uchuku wa kabuj, Yeremiy katwishap kunyikek. Chisu chamudoshau Yeremiy kud Pashur pamanch, Yeremiy walonda anch: ‘Nikand kal. Nikulejanap kand.’ Pakwez, walika kusal mudimu winou? Bwat. Patongay Yeremiy mulong wa yom yivud, ndiy walonda anch: ‘Uruu wa Yehova ud mud kasu kada mu muchim wam. Nikulikap mudimu wa kulejan.’ Yeremiy wadandamena kuyibabesh antu.

Pasuta mivu yivud, kwikala mwant musu mu Yuda. In kupesh ni aprofet a makasu akisa rusang ra Yeremiy. Ayileja in kutakel anch: ‘Muntu winou ufanyidin kufa.’ Yeremiy walonda anch: ‘Anch wanjipany, ukwinjipany kwam pakad mulong. Nilondining kwam mazu ma Yehova, kadap mazu mam bwat.’ Pateshau in kutakel mazu minam awiy alonda anch: ‘Muntu winou chifanyidinap komb kumujip.’

Padandamenay Yeremiy kulejan, in kutakel ajimana nakash. Awiy amuleja mwant anch chifanyidin kumujip Yeremiy. Mwant wayileja anch afanyidin kusal yom yawonsu yikatinau piur pa Yeremiy. Amukwata Yeremiy ni amudjibwila mu dijiy dilemp dadinga ni malau ni ading atongin anch ukufil mwinimwa. Yeremiy wisampola malau.

Kupwa mukurump wa dirumburish Ebed melek waya kumulej mwant anch: ‘In kutakel amudjibwilang kal Yeremiy mu dijiy! Anch tumudoshinap ukufa.’ Mwant wamuleja Ebed melek asenda antu amakundj 30 chakwel amudosha Yeremiy mu dijiy. Ov, tufanyidinap kwikal mud Yeremiy, kitiyap anch muntu ap umwing amukangesha kusal mudimu wend wa kulejan?