Ezra Wafundisha Yijil ya Nzamb

Kupwa kwa mivu 70 in Isarel amwing achirika mu Yerusalem, pakwez, akwau ading ashich jindond kushalijan Mwi ngand ya Peris. Pakach pa antu inay padinga mwin kupesh Ezra, wafundisha Yijil ya Yehova. Ezra wajingunina anch antu a mu Yerusalem kadingap ni kulimish Yijil, chawiy chakwatay mupak wa kuya kuyikwash ileja yijil. Mwant Aritaserisis wa mu Peris wamuleja anch: ‘Nzamb wakwinkisha manang chakwel ufundisha Yijil yend. Yang ukimba muntu win mwawonsu ukukata kuya ney.’ Ezra wakumangeja antu awonsu akimbina kuchirik ku Yerusalem. Amulembila Yehova chakwel ayitakela mu weny wau ulemp ukusalau, kupwa achirika pakad kulab.

Asala angond anying mu weny wau kurutu ashika mu Yerusalem. Amakurump amuleja Ezra anch: ‘In Isarel amubwambwidil kal Yehova ni atin kal amband akata kwifukwil anzamb a makasu.’ Chom ik chasalay Ezra? Ezra wasa manungin kurutu kwa antu ni walembila anch: ‘Yehova watusadidin kal yom yivud nakash, pakwez, twasadin kal chitil kurutu kwey.’ Antu akarumuka, pakwez, asambisha kand kusal yom yiyimp. Ezra watonda amakurump ni anzuj chakwel ashinshikina milong yiney. Pasuta angond asatu, antu alika kumwifukwil Yehova ayopata.

Pasuta kand mivu dikum ni yaad. Mu chisu chinicha, mbumbu ja Yerusalem ajitungurila. Chawiy, Ezra wayitazuka antu pa dibur ni wasambisha kuyitangin Yijil ya Nzamb. Chisu chaburilay Ezra muvungur, antu atumbuka. Ezra wamutumbisha Yehova kupwa antu azambula makas mau mwiur mulong wa kumekesh anch itiyin. Chawiy, Ezra watanga ni warumburila Yijil chad antu atesha kamu nawamp. Antu itiya anch ading amubwambwidil kal Yehova ni asambisha kudil. Dichuku dikwau, Ezra wayitangina kand antu Yijil. Antu ijika anch mu machuku makemp afanyidin kusal Musambu wa Ankunku. Pakad kulab asambisha kurijek yom mulong wa musambu winou.

Mu machuku sambwad masalau antu musambu winou, asangara ni amujikitisha Yehova mulong wa mbut jau jiwamp jangulau. Kwasadikap Musambu wa Ankunku mud winou ap mu machuku ma Yoshua. Kupwa kwa musambu, antu akumangana chad alembila anch: ‘Yehova, watukwodil mu uswik, watudisha mwi mpay ni watwinkisha ngand yiney yiwamp. Pakwez, yisu yivud, twakubwambwila. Watuma aprofet mulong wa kutubabesh, pakwez kitwateshap. Chad, ey udandamedin kushimpish muchim wey. Wawanyisha kushilamu kwey ku wamukana Aburaham. Katat twashilamu kal anch tukukuziyin.’ Antu afunda mazu mau malondau chawiy, amakurump, in Levi ni in kupesh afunda niyawiy mulong wa kumekesh anch itiyijin mazu malondangau antu inay.