Elizabet Waval kal Mwan

Mivu 400 ni kusut kupwa kwa kutungiril mbumbu ja Yerusalem, kwading mwin kupesh umwing dijin dend Zakariy ni mukajend Elizabet ading ashich piswimp ni musumb winou. Ading atijadin kal pasutin kal mivu yivud, pakwez kadingap ni mwan ap umwing. Dichuku dimwing padingay Zakariy ukat kwosh malash mu tempel, mwangel Gabriyel wamubudikina. Zakariy wova wom nakash, pakwez, Gabriyel wamuleja anch: ‘Kangal wov wom. Nikuletidin rusang ruwamp ridokila kud Yehova. Mukajey, Elizabet, ukuval mwan ikundj, ey ukez kumupil anch Yohan. Yehova wamutonda Yohan mulong wa kusal mudimu wa pakampwil.’ Zakariy wamwipula anch: ‘Mutapu ik nikutwisha kwitiy yom yiney? Mulong am ni mukajam tud kwetu amapal, tukutwishap kuval.’ Gabriyel wamwakula anch: ‘Antumang kud Nzamb mulong wa kukulej rusang ruwamp riner. Pakwez, mulong kiwitiyinap kwey mazu mam, ukwikal kamam djat ni pakuvadikinay mwan.’

Zakariy wimana chisu chilemp mu tempel pakad kusal chom. Chawiy, pabudikay pol, antu ading achingedin chakwel ijika yom yasadika kal. Zakariy wikala kamam. Wasambisha ching kwilok miny. Kupwa, antu ijika anch Zakariy watambul kal rusang ridokila kud Nzamb.

Kwasuta chisu, Elizabet wimisha, kupwa wavala mwan ikundj mud mwalonday kamu mwangel. Arund nend ni anamakwend eza kumutal mwan. Asangara nakash. Elizabet walonda anch: ‘Dijin dend Yohan.’ Awiy amwakula anch: ‘Kwikil muntu ap umwing wa mu dijuku den ukweta dijin da Yohan. Mupila dijin da tatukwend Zakariy.’ Pakwez, Zakariy wafunda anch: ‘Dijin dend Yohan.’ Pa chisu chinicha Zakariy wasambisha kand kulond! Rusang ra kuvadik kwa mwan winou rapalangana mwi ngand ya Yudeya mwawonsu ni antu asambisha kwiyipul anch: ‘Mwan winou anch wapam ukwikal mutapu ik?’

Kupwa, Zakariy wizula nich spiritu utumbila. Wasambisha kubwak anch: ‘El Yehova atumba. Wamushilamu Aburaham anch Ukez katum mupandish, Mesiya mulong wa kutupandish. Yohan ukwikal muprofet ni ukez kwijikish kwez kwa Mesiya.’

Chom chikwau chishimokishina chamushikena Mariy mwanamakwend a Elizabet. El tushinshikinany rusang riner mu shapitre ulondwilaku ou.