In Kwilej Atambul kal Spiritu Utumbila

Machuku dikum kupwa kwa kuchirik kwa Yesu mwiur, in kwilej end atambula spiritu utumbila. Chading chisu cha Pantekot mu muvu wa 33 C.C., ni antu adokala ku jindond jivud mulong wa kwez kusal musambu winou mu Yerusalem. Kwading in kwilej a Yesu piswimp 120 akumangana mu kapalikany ka piur ka mu chikumbu. Kapamp kamwing, kwasadika chom cha kushimok. Yom yida mud mizwizu ya kasu yamekana pa mutu wa mwin kwilej win mwawonsu, ni awonsu asambisha kulond mu mazu kushalijan. Chidjimin chading mud rinkind mukash chizula mu chikumbu chawonsu.

Antu adokala mu jingand jikwau mulong wa kwez mu Yerusalem atesha chidjimin chinech ni aya mau ku chikumbu mulong wa kutal yom yasadika kal. Ashimoka nakash pateshau in kwilej akat kulond mu mazu mau. Alonda anch: ‘Antu inay ad in Galaliya. Mutapu ik ulondinau mazu metu?’

Kupwa Pita nau atwimbuy akwau imana kurutu kwa antu. Pita wayileja antu mutapu wamujipau Yesu ni mutapu wamuvumbulau kud Yehova. Pita wayileja anch: ‘Katat Yesu ud mwiur ku chikas cha katatuku cha Nzamb, ndiy watuma kal spiritu winou wakanay. Chawiy wamananya kal ni kutesh yilay yiney.’

Mazu ma Pita mayishika antu ku michim ni amwipula anch: “Yom ik tufanyidina kusal?” Wayakula anch: ‘Karumukany, ni el muntu mwawonsu wa pakach pen amubatish mu dijin da Yesu Kristu. Mwamu ukutambulany chipan cha riy cha spiritu utumbila. Dichuku dinida, abatisha antu piswimp 3 000. Kusambish pinipa, in kwilej asambisha kuvulijan mu Yerusalem. Nich ukwash wa spiritu utumbila, atwimbuy asala yikumangen yivud nakash, chawiy afanyina kuyifundish in kwilej yom yayifundishau kud Yesu.