Kwikil Chom Chafanyina Kuyikangesh

Kwading muntu umwing chilim kendangap ni katumbukangap pakwez washakamang ku chis cha tempel mulong wa kwit yom dichuku dawonsu. Dichuku dimwing urel, muntu winou wamumana Pita ni Yohan akat kwandam mu tempel. Wayela anch: ‘Nilemb amboku nkwashanaku chom.’ Pita wamwakula anch: ‘Nikwet chom chiwamp nakash kusutamu nfalang chinikimbina kukwink. Mu dijin da Yesu, tumbuk wenda!’ Kupwa Pita wamulama ku chikas wamutumbwish, ni muntu winou wasambisha kwend! Antu asangara nakash mulong wa chilay chinech ni antu avud ikala in kwitiyij.

Pakwez in kupesh nau Asadus ajimana nakash. Ayikwata atwimbuy, ayitwal ku dirumburish, ni ayipula anch: ‘Nany wakwinkishangana usu wa kumwok muntu winou?’ Pita wakula anch: ‘Twatambwil usu winou kud Yesu Kristu muntu wajipanya.’ Antakel a relijon asweja anch: ‘Kangal kulond piur pa Yesu!’ Pakwez atwimbuy akula anch: ‘Tufanyidin kamu kulond piur pend. Tukwimikap.’

Pamulikishau Pita ni Yohan, aya kud in kwilej akwau ni ayileja yom yasadika. Alembila awonsu pamwing, ni amwita Yehova anch: ‘Tukwashap amboku twikala atakamena chakwel tudandamen kusal mudimu wey.’ Yehova wayinkisha spiritu utumbila, ni adandamena kulejan ni kwokan. Antu avud nakash ikala in kwitiyij. Asadus ova mukau chawiy ayikwata atwimbuy ni kuyitek mu rukan. Pakwez uchuku, Yehova watuma mwangel wazurila ku chis cha rukan ni wayileja atwimbuy anch: ‘Chirikany ku tempel, fundishany mwinimwa.’

Mukwacha, ayileja in Sanedrin, in dirumburish dijim da antakel a chirelijon anch: ‘Rukan rid kwau ra kufung pakwez antu wakwatangana mwamwamu! Ad mu tempel akat kufundish antu!’ Atwimbuy ayikwata kand kapamp kakwau ni ayitwal kud in Sanedrin. Mwin kupesh mujim wayileja anch: ‘Twakulejangan anch kangal walondany kand piur pa Yesu!’ Pita walonda anch: “Tufanyidin kumuziyin Nzamb mud nyikel pa ndond pa kuyiziyin antu.”

Antakel a chirelijon ajimana nakash ni akimba kamu kuyijip atwimbuy. Pakwez Mufaris umwing utazukinau anch Gamaliyel wimana ni walonda anch: ‘Babalany! Nzamb ukutwish kwikal nau antu inay. Ov, ukimbinany kamu kurish ni Nzamb?’ Itiya chiyul chend. Kupwa kwa kuyibul atwimbuy nfimbu, ayileja anch kangal kand kulejan, ni ayilikishaku. Pakwez chinech chayikangeshap atwimbuy bwat. Adandamena kulejan nich kutakaman rusang ruwamp, mu tempel ni ku chikumbu ni chikumbu.