Amutwadin Paul ku Rom

Weny wa kasatu wasalay Paul mu mudimu wa kulejan wapwila mu Yerusalem. Kwinikwa amukwata ni amuteka mu rukan. Uchuku mu chishimushimu Yesu wamuleja anch: ‘Ukuya ku Rom mulong wa kulejan rusang ruwamp.’ Paul amudosha ku Yerusalem amutwal ku Sezarey, kwinikwa wasala mivu yaad mu rukan. Pading pamurumburishinau kud Nyikel Fesitus, Paul walonda anch: ‘Nlika anrumburish kud Sezar, mu Rom.’ Fesitus wakula anch: “Ey wit kal dirumburish da mwant wa in Rom, chawiy ukuya kwey kud mwant wa in Rom.” Amuteka Paul mu waat chakwel amutwal ku Rom, chad akadivar nend in Kristu aad, Luka ni Aristarik, aya nend pamwing.

Padingau pa karung, kweza rinkind mukash, ni rinkind winou wasala machuku mavud. Antu awonsu atonga anch akufa. Pakwez Paul wayileja anch: ‘Mwangel wanlejang mu chilat anch: “Paul, kangal wov wom. Ufanyidin kwiman kurutu kwa Kayisar, tal! Nzamb wakwinkish kal mwom ya antu awonsu uda nau mu waat.” Ikasikeshany! Tukufanyap.’

Rinkind watuta mu machuku 14. Kupwa, divu damekana. Dading ditung da Malta. Waat wibula ku divu ni wabaroka, pakwez antu awonsu 276 ading mu waat apanda. Amwing isaya ni akwau akwata ku yibar ya waat ni apempama kupwa atuntuk. Antu a ku Malta ayisenda ayipepin kasu chakwel ota.

Kupwa kwa angond asatu, amasalay asenda waat ukwau amutwal Paul ku Rom. Pashikau, akadivar eza kumusankan. Payimanay, Paul wamujikitisha Yehova ni wikala ni usu. Ap anch Paul wading muntu wa rukan, amwitiyina kushakam mu chikumbu cha kufutin oku amulamin kud isalay. Wasala mivu yaad mwinimwa. Antu ezang kumutal ni wayilejang piur pa Want wa Nzamb ni wayifundishang piur pa Yesu. Paul wafunda kand mikand mulong wa yikumangen ya mu Aziy Mukemp ni mu Yudeya. Yehova wamusadina chakin kamu Paul mulong wa kupalangesh rusangu ruwamp ku michid.