Yehova Uding Mutapu Ik?

Ey ukat kutongang anch Yehova uding mutapu ik? Ov, ud ukwatishena wom ni ud kulemp nakash mud mutapu tukata kuyiman atutumbu adia kulemp nakash? Ap ov, utongin anch ukwet dikand nakash pakwez kakwetap kwend mujimbu kanang mud mudingay nzaj? Mutapu ik kamu udingay Yehova? Yehova ulejen mu Dizu diend Bibil mikadil yimwing yikwetingay, ni ulejen kand anch ukubangidin ey.

1. Mulong wak tukumumanangap Nzamb?

“Nzamb udi [spiritu].” (Yohan 4:24) Yehova kakwetingap mujimbu wa mbij. Ud Nzamb wakad kumekanang ku mes udia mwiur, ndond yitwakad kutwish kuman.

2. Mikadil ik yimwing yikwetingay Yehova?

Ap anch Yehova kakumekanangap ku mes, pakwez ud Nzamb wakin ukweta mikadil yiwamp yiyibachikina antu amwija kumusejin piswimp. Bibil ulondin anch: “[Yehova] ukatil kutentam, kakuyilikangap antu end [ashinshamena].” (Kuseng 37:28) Ndiy “wizwil nich kuwap ni riy,” ukat kumekesh mikadil yiney pakampwil kud antu amena mar. (Jakobu 5:11) “[Yehova] udi piswimp nau awiy akweta michim yinenganena, ukat kuyipandish akweta michim yakad ruchingej.” (Kuseng 34:19) Ov, wijing anch yisal yetu yikat kumusangareshang ap kumunenganesh Yehova? Muntu ukata kusal yom yiyimp ukat kumurumbukin Nzamb ni kumunenganesh nakash. (Kuseng 78:40, 41) Pakwez muntu ukata kusal yom yiwamp ukat kumusangaresh.​—Tang Jinswir 27:11.

3. Mutapu ik ukatay kumekesh Yehova anch utukatin?

Mwikadil ujim nakash wa Yehova rid rukat. Chakin kamu, “Nzamb udi rukat.” (1 Yohan 4:8) Yehova ukat kumekesh rukat rend kadiap ching kusu kwau mu Bibil, pakwez kand kusutil yom yatangay. (Tang Midimu 14:17.) Chilakej, shinshikin mutapu watutangay. Watwinkisha mes mulong wa kuman ulombu uwamp, matu mulong wa kutesh mizik yisangareshina, ni rudim mulong wa kwov kutaal kwa yakudia yiwamp. Ukatin anch tusanger mwom.

ILEJA CHIKURIKINA

4. Spiritu utumbila ud usu ukatay Nzamb kusal nich yom

Mud mutapu ukatau antu kusadin makas mau mulong wa kusal midimu, Yehova ndiy ukat kusadin spiritu wend. Bibil ulejen anch spiritu utumbila kadiap Nzamb, pakwez ud usu ukatay kusadin Nzamb mulong wa kusal nich yom. Tang Luka 11:13 ni Midimu 2:17, kupwa isambinany yipul ey:

• Nzamb ukanin anch ukez “kapan” spiritu wend utumbila kud awonsu amwitinay. Pa chinech, ov, utongin anch spiritu utumbila ud Nzamb bil anch ud usu ukatay Nzamb kusal nich yom? Mulong wak?

Yehova ukat kusadinang spiritu wend utumbila mulong wa kusal nich yom yishimokishena. Tang Kuseng 104:30 ni 2 Pita 1:20, 21, kupwa isambinany chipul ech:

• Yom ik yimwing yasadinayap kal Yehova kusutil spiritu wend utumbila?

5. Yehova ukweting mikadil yiwamp nakash

Moses wading kashalapol ushinshamena wa Nzamb, pakwez wakata kumwijik nawamp Sakatang wend. Chawiy Moses wamwita anch: “Nlejap kutenchik kwey chakwel nikwijika ey.” (Kubudik 33:13) Yehova wamwakula Moses, ni wamuleja mikadil yend yimwing. Tang Kubudik 34:4-6, kupwa isambinany yipul ey:

• Mikadil ik yimwing ya Yehova yamulejau Moses?

• Mwikadil ik wa Yehova ukusangareshina ey nakash pakach pa mikadil yiney?

6. Yehova ukat kuyibangin antu

Atushalapol a Nzamb in Hebereu ading aswik mu Idjibit. Mutapu ik wiyovay Yehova mulong wa mar mading mamenau? Teshany MAZU ni londwishany, ap tang Kubudik 3:1-10. Kupwa isambinany yipul ey:

MAZU: Yehova Wayibangina mu Mar Mau (2:45)

• Rusangu riner rikufundishin anch Yehova ukat kwiyovang mutapu ik anch wayiman antu akat kuman mar?​—Tal verse wa 7 ni 8.

• Ov, utongin anch Yehova ukatining kamu kuyikwash antu ni ukwet usu wa kusal mwamu? Rumburil.

7. Yitang yimekeshin mikadil ya Yehova

Mikadil ya Yehova yimeken kusutil yom yatangay. Talany VIDEO. Ni tang Rom 1:20, kupwa isambinany chipul ech:

VIDEO: Yitang Yimekeshin Rukat ra Yehova—Mujimbu wa Muntu (1:57)

• Mikadil ik ya Yehova wamana kal mu yom yatangay?

YOM TWILEJA KAL

Yehova ud Spiritu wakad kumekanang ku mes, ukwet mikadil yisangareshina nakash, pakampwil rukat.

Ov, uvurikin?

• Mulong wak tukumumanangap Yehova?

• Spiritu utumbila chom ik?

• Jimbulaku mikadil yimwing yikwetingay Yehova.

JINGUNIN KAND

Kudish ronganyin rey piur pa Yehova kusutil kwilej mikadil yend yinying ya pakampwil.

“Mikadil Ik Yikwetingay Nzamb?” (Chinong cha Kalam No. 1 2019)

Shinshikin uman umekeshina anch Nzamb kadingap mu michim ap ndond yawonsu.

“Ov, Nzamb Uding Ndond Yawonsu?” (Mutu wa mulong udia pa jw.org)

Shinshikin mulong wak Bibil ukat kumutazuk spiritu utumbila anch makas ma Nzamb.

“Spiritu Utumbila Chom Ik?” (Mutu wa mulong udia pa jw.org)

Chading chimukasikedin ikundj umwing wading mputames kwitiy anch Nzamb umubangidining. Tal yom yaswimpa yitongijok yend.

“Katat Nimen Anch Nikutwish Kuyikwash Antu Akwau” (Chinong cha Kalam cha 1 Ngond wa 10, 2015)